India Pakistan Cricket Match / ଏହି ବର୍ଷ ପୁଣି ହେବ ଭାରତ-ପାକିସ୍ତାନ ଲଢ଼େଇ ! ଏହି ମ୍ୟାଚ୍‌ରେ ଖେଳିବେ କି ରୋହିତ-ବିରାଟ ?

ଭାରତ ଓ ପାକିସ୍ତାନ ମଧ୍ୟରେ କ୍ରିକେଟ୍ ମ୍ୟାଚକୁ ସବୁବେଳେ କ୍ରିକେଟ୍‌ ପ୍ରେମୀ ଉତ୍ସୁକତାର ସହ ଅପେକ୍ଷା କରିଥାନ୍ତି । ଦୁଇ ଦେଶ ମଧ୍ୟରେ ବର୍ତ୍ତମାନ ଦ୍ୱିପାକ୍ଷିକ ସିରିଜ୍ ଖେଳାଯାଉନଥିବାରୁ, କୌଣସି ବଡ଼ ଟୁର୍ଣ୍ଣାମେଣ୍ଟରେ ମୁହାଁମୁହିଁ ହେଲେ ମ୍ୟାଚ୍‌ର ଉତ୍ସାହ ଆହୁରି ବଢ଼ିଯାଏ ।

୨୦୨୬ ମସିହା ଟି-୨୦ ବିଶ୍ବକପ୍‌ରେ ଭାରତ ଓ ପାକିସ୍ତାନ ମୁହାଁମୁହିଁ ହୋଇଥିଲେ । ଆଉ ଏବେ ବର୍ଷର ବାକି ସମୟରେ ମଧ୍ୟ ଦୁଇ ଦଳ ମଧ୍ୟରେ ଆଉ ଏକ ହାଇଭୋଲଟେଜ୍ ମ୍ୟାଚ୍ ହୋଇପାରେ । ଆସନ୍ତା ୨୦୨୬ ଏସିଆନ୍ ଗେମ୍ସରେ ଭାରତ-ପାକିସ୍ତାନ କ୍ରିକେଟ୍ ମୁକାବିଲାର ସମ୍ଭାବନା ରହିଛି ।

ତେବେ ଏହି ମ୍ୟାଚ୍‌ରେ ଭାରତୀୟ ଫ୍ୟାନ୍ସମାନେ ବିରାଟ କୋହଲି ଓ ରୋହିତ ଶର୍ମାଙ୍କୁ ମଇଦାନରେ ଦେଖିପାରିବେ ନାହିଁ। କାରଣ ଏସିଆନ୍ ଗେମ୍ସରେ କ୍ରିକେଟ୍ ଟି-୨୦ ଫର୍ମାଟ୍‌ରେ ଖେଳାଯିବ। ବିରାଟ କୋହଲି ଓ ରୋହିତ ଶର୍ମା ୨୦୨୪ ମସିହାରେ ଟି-୨୦ ଆନ୍ତର୍ଜାତୀୟ କ୍ରିକେଟ୍‌ରୁ ଅବସର ନେଇସାରିଛନ୍ତି ।

ଏସିଆନ୍ ଗେମ୍ସ ପାଇଁ ପୁରୁଷ ଓ ମହିଳା କ୍ରିକେଟ୍‌ର କାର୍ଯ୍ୟସୂଚୀ ଜାରି ହୋଇଛି। ପୁରୁଷ ବର୍ଗରେ ଭାରତ, ପାକିସ୍ତାନ, ଶ୍ରୀଲଙ୍କା ଓ ବାଂଲାଦେଶ ରାଙ୍କିଂ ଆଧାରରେ ସିଧାସଳଖ ନକ୍ଆଉଟ୍ ପର୍ଯ୍ୟାୟରେ ସ୍ଥାନ ପାଇଛନ୍ତି । ଅନ୍ୟ ଦଳଗୁଡ଼ିକ କ୍ୱାଲିଫାୟର ମାଧ୍ୟମରେ ଯୋଗ୍ୟତା ହାସଲ କରିବେ ।

ଅଧିକ ପଢ଼ନ୍ତୁ: କ୍ରିକେଟରରୁ ସିଧା ‘ସରକାରୀ ବାବୁ’! RBIରେ ଈଶାନ କିଶନଙ୍କୁ କେମିତି ମିଳିଲା ନିଯୁକ୍ତି ?

ପୁରୁଷ ବର୍ଗରେ ମୋଟ ୧୦ଟି ଦଳ ଅଂଶଗ୍ରହଣ କରିବେ, ଯେତେବେଳେ ମହିଳା ବର୍ଗରେ ୮ଟି ଦଳ ଖେଳିବେ । ଭାରତ, ପାକିସ୍ତାନ, ଶ୍ରୀଲଙ୍କା ଓ ବାଂଲାଦେଶ ସିଧାସଳଖ କ୍ୱାର୍ଟରଫାଇନାଲ୍‌ରେ ପହଞ୍ଚିବେ ।

କ୍ୱାର୍ଟରଫାଇନାଲ୍‌ରେ ଭାରତ ଓ ପାକିସ୍ତାନ ମୁହାଁମୁହିଁ ହେବାର ସମ୍ଭାବନା କମ୍, କାରଣ ଦୁଇ ଦଳକୁ ଭିନ୍ନ ଗ୍ରୁପ୍‌ରେ ରଖାଯାଇଛି । ଭାରତ ଓ ବାଂଲାଦେଶ ଗୋଟିଏ ଗ୍ରୁପରେ ଥିବା ବେଳେ ପାକିସ୍ତାନ ଓ ଶ୍ରୀଲଙ୍କା ଅନ୍ୟ ଗ୍ରୁପ୍‌ରେ ରହିଛନ୍ତି ।

ଏହାର ଅର୍ଥ ହେଉଛି, ଭାରତ ଓ ପାକିସ୍ତାନ ନିଜ ନିଜ କ୍ୱାର୍ଟରଫାଇନାଲ୍ ଓ ସେମିଫାଇନାଲ୍ ଜିତିଲେ ହିଁ ଫାଇନାଲ୍‌ରେ ପରସ୍ପରକୁ ଭେଟିପାରନ୍ତି । ଅର୍ଥାତ୍, ଗୋଲ୍ଡ ମେଡାଲ୍ ମ୍ୟାଚ୍‌ରେ ହିଁ ଭାରତ-ପାକିସ୍ତାନ ମହାମୁକାବିଲା ଦେଖିବାକୁ ମିଳିପାରେ ।

ଏସିଆନ୍ ଗେମ୍ସରେ ମହିଳା କ୍ରିକେଟ୍ ପ୍ରତିଯୋଗିତା ୧୭ରୁ ୨୨ ସେପ୍ଟେମ୍ବର ପର୍ଯ୍ୟନ୍ତ ଚାଲିବ, ଯେତେବେଳେ ପୁରୁଷ କ୍ରିକେଟ୍ ପ୍ରତିଯୋଗିତା ୨୪ ସେପ୍ଟେମ୍ବରରୁ ଆରମ୍ଭ ହୋଇ ୧ ଅକ୍ଟୋବର ପର୍ଯ୍ୟନ୍ତ ଚାଲିବ । ଏବେ ସମସ୍ତଙ୍କ ନଜର ରହିଛି—୨୦୨୬ ଏସିଆନ୍ ଗେମ୍ସରେ କ୍ରିକେଟ୍‌ ପ୍ରେମୀ ପୁଣି ଥରେ ଭାରତ-ପାକିସ୍ତାନର ରୋମାଞ୍ଚକର କ୍ରିକେଟ୍ ମୁକାବିଲା ଦେଖିପାରିବେ କି ନାହିଁ ।