ସେପ୍ଟେମ୍ବର ୨୮ରେ ଖେଳାଯିବ ଏସିଆ କପ୍-୨୦୨୫ର ଫାଇନାଲ ମ୍ୟାଚ୍ । ୪୧ ବର୍ଷରେ ପ୍ରଥମ ଥର ପାଇଁ ଫାଇନାଲରେ ମୁହାଁମୁହିଁ ହେବେ ଭାରତ-ପାକିସ୍ତାନ । ଦୁବାଇ ଇଣ୍ଟରନ୍ୟାସନାଲ ଷ୍ଟାଡିୟମରେ ଖେଳାଯିବ ଏହି ମ୍ୟାଚ୍ । ଏହି ମ୍ୟାଚ୍ ଜିତି ଭାରତୀୟ ଦଳ ନବମ ଥର ପାଇଁ ଏସିଆ କପ୍ ଜିତିବାକୁ ଲକ୍ଷ୍ୟ ରଖିଛି । ପାକିସ୍ତାନ ଯେଉଁ ଫର୍ମରେ ଅଛି, ତାହା ଦେଖିଲେ ଭାରତକୁ ଟାଇଟଲ୍ ଜିତିବାରେ କୌଣସି ଅସୁବିଧା ହେବା ନାହିଁ ।

ବହୁ-ରାଷ୍ଟ୍ରୀୟ ଇଭେଣ୍ଟଗୁଡ଼ିକରେ ସାଧାରଣତଃ ଫାଇନାଲ୍ ମ୍ୟାଚର ଗୋଟିଏ ଦିନ ପୂର୍ବରୁ ଉଭୟ ଦଳ ଦ୍ୱାରା ଏକ ସାମ୍ବାଦିକ ସମ୍ମିଳନୀ କରାଯାଏ । ଯେଉଁଥିରେ ଅଧିନାୟକମାନେ ଟ୍ରଫି ସହିତ ଫଟୋସୁଟ୍ କରନ୍ତି । ତେବେ ଏସିଆ କପ୍ ଫାଇନାଲ ପୂର୍ବରୁ ଟ୍ରଫି ସହିତ କୌଣସି ଫଟୋସୁଟ୍ ହୋଇନାହିଁ ।

ଅଧିକ ପଢ଼ନ୍ତୁ: ଫାଇନାଲ ପୂର୍ବରୁ ପାକିସ୍ତାନର ନୂଆ ଡ୍ରାମା, ହାରିସ୍ ରୈଫଙ୍କ ପାଇଁ ଜରିମାନା ଦେବେ ପିସିବି ମୁଖ୍ୟ

ସେପଟେ ସେପ୍ଟେମ୍ବର ୨୭ ତାରିଖରେ ଅର୍ଥାତ ଫାଇନାଲ ମ୍ୟାଚର ଗୋଟିଏ ଦିନ ପୂର୍ବରୁ ଭାରତୀୟ ଦଳ ଅଭ୍ୟାସ ମଧ୍ୟ କରିନଥିଲା । ଖେଳାଳିଙ୍କ ଥକ୍କାପଣ ପାଇଁ ଭାରତୀୟ ଦଳର ଖେଳାଳି ମାନେ ପ୍ରାକ୍ଟିସ୍ କରିବାକୁ ଆସିନଥିଲେ । କାହିଁକି ନା ଗତ ୪ ଦିନ ମଧ୍ୟରେ ଭାରତ ଦୁଇଟି ଗୁରୁତ୍ବପୂର୍ଣ୍ଣ ମ୍ୟାଚ୍ ଖେଳିଛି । ତେଣୁ ଫାଇନାଲ ପୂର୍ବରୁ ଖେଳାଳିଙ୍କୁ ଯଥେଷ୍ଟ ଆରାମ ପାଇଁ ଆଜି ଟିମ୍ ଇଣ୍ଡିଆ ପ୍ରାକ୍ଟିସ୍ ପାଇଁ ଆସିନଥିଲା । ଏହା ସହିତ, ଭାରତୀୟ ଦଳ ମ୍ୟାଚ୍ ପୂର୍ବରୁ ସାମ୍ବାଦିକ ସମ୍ମିଳନୀ ମଧ୍ୟ କରିବ ନାହିଁ ।

ଭାରତୀୟ ଖେଳାଳିମାନେ ହୋଟେଲରେ ବିଶ୍ରାମ ଏବଂ ରଣନୀତି ଉପରେ ଧ୍ୟାନ ଦେଉଛନ୍ତି। ଏହି ପଦକ୍ଷେପ ଖେଳାଳିମାନଙ୍କୁ ମାନସିକ ଭାବରେ ପ୍ରସ୍ତୁତ ଏବଂ ସତେଜ ରଖିବା ପାଇଁ ଉଦ୍ଦିଷ୍ଟ । ଶ୍ରୀଲଙ୍କା ବିପକ୍ଷରେ ସୁପର ଫୋର୍ ମ୍ୟାଚ୍ ପରେ ଭାରତୀୟ ଖେଳାଳିମାନଙ୍କ ପାଇଁ ବିଶ୍ରାମ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଥିଲା।

ସେପଟେ ଚଳିତ ଏସିଆ କପରେ ପୂର୍ବରୁ ଦୁଇ ଥର ଭାରତ-ପାକିସ୍ତାନ ମୁହାଁମୁହିଁ ହୋଇସାରିଛନ୍ତି । ପ୍ରଥମେ ଗ୍ରୁପ୍ ପର୍ଯ୍ୟାୟ ପରେ ସୁପର-୪ରେ ଉଭୟ ଦଳ ମୁହାଁମୁହିଁ ହୋଇଥିଲେ । ଆଉ ଦୁଇ ଥର ଭାରତ ପାକିସ୍ତାନକୁ ଶୋଚନୀୟ ଭାବେ ପରାସ୍ତ କରିଥିଲା । ଆଉ ଏବେ ଫାଇନାଲ ମ୍ୟାଚରେ ମଧ୍ୟ ପାକିସ୍ତାନକୁ ହରାଇ ଏସିଆ କପ୍ ଟାଇଟଲ ଜିତିବାକୁ ଚେଷ୍ଟା କରିବ ।

ଅନ୍ୟପଟେ ଚଳିତ ଏସିଆ କପରେ ପାକିସ୍ତାନ ଖେଳ କମ୍ ବିବାଦ ପାଇଁ ବେଶ୍ ଚର୍ଚ୍ଚାରେ ରହିଛି । ଆଉ ଏବେ ଫାଇନାଲ ଫାଇଟ୍ ପୂର୍ବରୁ ନୂଆ ନାଟକ କରିଛି ପାକିସ୍ତାନ । ଏହି ବିବାଦ ପାକିସ୍ତାନ ଖେଳାଳି ନୁହେଁ ବରଂ ପାକିସ୍ତାନ କ୍ରିକେଟ୍ ବୋର୍ଡ (ପିସିବି) ଅଧ୍ୟକ୍ଷ ମୋହସିନ୍ ନକଭି ସୃଷ୍ଟି କରିଛନ୍ତି ।

ସେପ୍ଟେମ୍ବର ୨୧ ତାରିଖରେ ସୁପର-୪ ରାଉଣ୍ଡ ମ୍ୟାଚ୍‌ରେ ଭାରତ ପାକିସ୍ତାନକୁ ୬ ୱିକେଟ୍‌ରେ ପରାସ୍ତ କରିଥିଲା। ସେହି ମ୍ୟାଚ୍‌ ସମୟରେ, ହାରିସ୍‌ ରୈଫ ୬-୦ ଏବଂ ଏକ ଯୁଦ୍ଧ ବିମାନ ଖସାଇବାର ଔଦ୍ଧତ ଇଙ୍ଗିତ କରିଥିଲେ । ସେହିପରି ସାହିବଜାଦା ଫରହାନ୍‌ ମଧ୍ୟ ଅର୍ଦ୍ଧଶତକ ହାସଲ କରିବା ପରେ ଗନ୍ ସେଲିବ୍ରେସନ୍ କରି ବିବାଦ ସୃଷ୍ଟି କରିଥିଲେ । ଏଭଳି ଅଭଦ୍ରାମୀ ପାଇଁ ବିସିସିଆଇ ହାରିସ୍ ରୈଫ ଓ ଫରହାନଙ୍କ ବିରୋଧରେ ଆଇସିସି ନିକଟରେ ଅଭିଯୋଗ ଦାଖଲ କରିଥିଲା ।

ଏହି ମାମଲାରେ ଆଇସିସି ହାରିସ୍‌ ରୈଫଙ୍କୁ ତାଙ୍କ ମ୍ୟାଚ୍‌ ଫି'‌ର ୩୦ ପ୍ରତିଶତ ଜରିମାନା ଲଗାଇଥିଲେ । ଅନ୍ୟପଟେ ସାହିବଜାଦା ଫରହାନ୍‌ଙ୍କୁ ଚେତାବନୀ ଦେଇଥିଲେ । ପାକିସ୍ତାନୀ ଗଣମାଧ୍ୟମର ରିପୋର୍ଟ ଅନୁଯାୟୀ, ପିସିବି ଅଧ୍ୟକ୍ଷ ବ୍ୟକ୍ତିଗତ ଭାବରେ ହାରିସ୍‌ ରୈଫଙ୍କ ଉପରେ ଲାଗୁ ହୋଇଥିବା ଜରିମାନା ଦେବାକୁ ପ୍ରତିଶ୍ରୁତି ଦେଇଛନ୍ତି । ମୋହସିନ୍ ନକଭିଙ୍କ ଏହି କାର୍ଯ୍ୟ ଏହା ସ୍ପଷ୍ଟ କରୁଛି ପଡ଼ିଆରେ ହାରିସ୍ ରୈଫ୍ କରିଥିବା ଅଭଦ୍ରାମୀକୁ ସେ ସମ୍ପୂର୍ଣ୍ଣ ଭାବେ ସମର୍ଥନ କରୁଛନ୍ତି।