Gautam Gambhir / ଛୁଟିରେ ବି ଟିମର ପିଛା ଛାଡ଼ିଲେନି ଗମ୍ଭୀର; ଦେଲେ ଏହି ହୋମୱର୍କ

ନୂଆଦିଲ୍ଲୀ: ନ୍ୟୁଜିଲାଣ୍ଡକୁ ମାତ୍ ଦେଇ ଟି-୨୦ ସିରିଜ୍ କବ୍‌ଜା କରିଛି ଟିମ୍ ଇଣ୍ଡିଆ । ଦମଦାର ବିଜୟ ପରେ ଖେଳାଳିଙ୍କୁ ମିଳିଛି ବ୍ରେକ୍ । ହେଲେ ଏହି ଛୁଟି କେବଳ ଆରାମ ପାଇଁ ନୁହେଁ । କାରଣ ଛୁଟିରେ ବି ଖେଳାଳିଙ୍କ ପିଛା ଛାଡ଼ିନାହାନ୍ତି ହେଡ୍ କୋଚ୍ ଗୌତମ ଗମ୍ଭୀର । ଖେଳାଳିଙ୍କୁ ଦେଇଛନ୍ତି ସ୍ପେଶାଲ ଫିଟନେସ୍ ହୋମୱର୍କ । ଆଗାମୀ ଶ୍ରୀଲଙ୍କା ସିରିଜ୍ ପୂର୍ବରୁ ଖେଳାଳିଙ୍କୁ ଫିଟ୍ ରଖିବା ପାଇଁ ଗମ୍ଭୀରଙ୍କ ଏହି ନୂଆ ରଣନୀତି ।

ନ୍ୟୁଜିଲାଣ୍ଡ ବିପକ୍ଷ ଶେଷ ଟି-୨୦ ମ୍ୟାଚ୍ ପରେ ଡ୍ରେସିଂ ରୁମ୍‌ରେ ଟିମ୍ ଇଣ୍ଡିଆର ପ୍ରଦର୍ଶନକୁ ଖୁବ୍ ପ୍ରଶଂସା କରିଥିଲେ ଗମ୍ଭୀର । ସିରିଜ୍ ବିଜୟ ପାଇଁ ଖେଳାଳିଙ୍କୁ ଅଭିନନ୍ଦନ ଜଣାଇବା ସହ ଦଳର ଏହି ପ୍ରଦର୍ଶନ ଏକ ଭଲ ମାହୋଲ ସୃଷ୍ଟି କରିଛି ବୋଲି କହିଥିଲେ । କିନ୍ତୁ ଏହି ବିଜୟ ପରେ ଆତ୍ମସନ୍ତୋଷ ନୁହେଁ, ବରଂ ଆଗାମୀ ଚ୍ୟାଲେଞ୍ଜ ପାଇଁ ପ୍ରସ୍ତୁତ ରହିବା ହେଉଛି ଟିମ୍ ଇଣ୍ଡିଆର ଲକ୍ଷ୍ୟ ।

• ଫିଟନେସ୍ ଉପରେ ଗମ୍ଭୀରଙ୍କ ଗୁରୁତ୍ଵ

ଏପଟେ ଖେଳାଳିଙ୍କୁ ମିଳିଛି ଏକ ମାସରୁ ଅଧିକ ସମୟର ବ୍ରେକ୍ । କିନ୍ତୁ ଏହି ବ୍ରେକ୍‌ରେ ଫିଟନେସ୍‌କୁ ଅଣଦେଖା କରିବାକୁ ଚାହୁଁନାହାନ୍ତି ଗମ୍ଭୀର । ଛୁଟିରେ ରହିଲେ ବି ଫିଟନେସ୍‌ରେ କୌଣସି ସାଲିସ୍ ନକରିବାକୁ ଖେଳାଳିଙ୍କୁ ଦେଇଛନ୍ତି ପରାମର୍ଶ । ଆଗାମୀ ଶ୍ରୀଲଙ୍କା ସିରିଜ୍ ପାଇଁ ନିଜକୁ ଶାରୀରିକ ଭାବେ ପ୍ରସ୍ତୁତ ରଖିବା ସହ ନିଜ ଖେଳରେ ଉନ୍ନତି ଆଣିବାକୁ କହିଛନ୍ତି ଗମ୍ଭୀର । ଏହାସହ ଶ୍ରୀଲଙ୍କା ଦଳକୁ ହାଲୁକା ଭାବେ ନେବା ଭୁଲ୍ ହେବ ବୋଲି ମଧ୍ୟ ମନେ ପକାଇ ଦେଇଛନ୍ତି ।

ପଢନ୍ତୁ ଏହି ଖବର: ନ୍ୟୁଜିଲାଣ୍ଡ ସିରିଜ୍ ପୂର୍ବରୁ ପନ୍ତଙ୍କୁ ଫିଟନେସ୍ ଝଟକା; ୨ ଦିନ ପରେ ପୁଣି ଅଗ୍ନିପରୀକ୍ଷା

କେବଳ ଫିଟନେସ୍ ନୁହେଁ, ଟିମ୍ ଇଣ୍ଡିଆର ମନ୍ତ୍ର ହେଉଛି କନ୍ସିଷ୍ଟେନ୍ସି । ଗୋଟିଏ ସିରିଜ୍ ଜିତିବା ପରେ ଆତ୍ମସନ୍ତୋଷ ନୁହେଁ, ପ୍ରତ୍ୟେକ ମ୍ୟାଚ୍‌ରେ ନିଜକୁ ଆହୁରି ଭଲ କରିବା ଉପରେ ଗମ୍ଭୀର ଦେଇଛନ୍ତି ଗୁରୁତ୍ୱ । ବ୍ୟକ୍ତିଗତ ରେକର୍ଡ ଅପେକ୍ଷା ଦଳର ଲକ୍ଷ୍ୟକୁ ଆଗରେ ରଖିବା ସହ ଏକଜୁଟ୍ ହୋଇ ଖେଳିବାକୁ ଖେଳାଳିଙ୍କୁ ଦେଇଛନ୍ତି ମନ୍ତ୍ର ।

• ଡିସେମ୍ବରରେ ଶ୍ରୀଲଙ୍କା ବିପକ୍ଷରେ ମ୍ୟାଚ୍

ନ୍ୟୁଜିଲାଣ୍ଡ ପରେ ଏବେ ଶ୍ରୀଲଙ୍କା ସହ ଟିମ୍ ଇଣ୍ଡିଆର ମୁକାବିଲା । ଡିସେମ୍ବରରେ ଭାରତରେ ଖେଳାଯିବ ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ । ତେଣୁ ଛୁଟି ସରିବା ପରେ ଖେଳାଳିମାନେ କେତେ ଫିଟ୍ ହୋଇ ଫେରୁଛନ୍ତି ଏବଂ ଗମ୍ଭୀରଙ୍କ ହୋମୱାର୍କ କେତେ ପ୍ରଭାବ ପକାଉଛି ତାହା ଉପରେ ରହିବ ସମସ୍ତଙ୍କ ନଜର ।