ରବିବାର ଖେଳାଯିବ ଏସିଆ କପ୍-୨୦୨୫ ଫାଇନାଲ । ୪୧ ବର୍ଷରେ ପ୍ରଥମ ଥର ପାଇଁ ଫାଇନାଲରେ ମୁହାଁମୁହିଁ ହେବାକୁ ଯାଉଛନ୍ତି ଭାରତ-ପାକିସ୍ତାନ । ଦୁବାଇ ଇଣ୍ଟରନ୍ୟାସନାଲ ଷ୍ଟାଡିୟମରେ ଏହି ମ୍ୟାଚ୍ ଖେଳାଯିବ । ଭାରତୀୟ ସମୟ ରାତି ୮ଟାରେ ଏହି ହାଇଭୋଲଟେଜ୍ ମ୍ୟାଚ୍ ଖେଳାଯିବ ।

ଚଳିତ ଏସିଆ କପରେ ପୂର୍ବରୁ ଦୁଇ ଥର ଭାରତ-ପାକିସ୍ତାନ ମୁହାଁମୁହିଁ ହୋଇଥିଲେ । ଗ୍ରୁପ୍ ପର୍ଯ୍ୟାୟରେ ଓ ସୁପର-୪ରେ ଦୁଇ ପାରମ୍ପାରିକ ପ୍ରତିଦ୍ବନ୍ଦୀ ପରସ୍ପରକୁ ଭେଟିଥିଲେ । ଆଉ ଉଭୟ ମ୍ୟାଚରେ ଭାରତ ପାକିସ୍ତାନକୁ ଶୋଚନୀୟ ଭାବେ ପରାସ୍ତ କରିଥିଲା । ଫାଇନାଲ ମ୍ୟାଚରେ ମଧ୍ୟ ଭାରତ ପାକିସ୍ତାନକୁ ହରାଇ ନବମ ଥର ପାଇଁ ଟାଇଟଲ ଜିତିବାକୁ ଚେଷ୍ଟା କରିବ । ସେପଟେ ପାକିସ୍ତାନ ଫାଇନାଲ ମ୍ୟାଚକୁ ଜିତି ଦୁଇ ଥର ପରାଜୟର ପ୍ରତିଶୋଧ ନେବାକୁ ଚେଷ୍ଟା କରିବ।

କିନ୍ତୁ ଚଳିତ ଏସିଆ କପରେ ଅପରାଜେୟ ରହିଥିବା ଭାରତକୁ ହରାଇବା ଏତେ ସହଜ ନୁହେଁ । ଦଳର ସମସ୍ତ ବ୍ୟାଟ୍ସମ୍ୟାନ୍ ଓ ବୋଲର ଦମଦାର ଫର୍ମରେ ଅଛନ୍ତି । ବିଶେଷ କରି ଓପନର ବ୍ୟାଟ୍ସମ୍ୟାନ୍ ଅଭିଷେକ ଶର୍ମା ପାକିସ୍ତାନୀ ବୋଲରଙ୍କ ନିଦ ହଜାଇ ଦେଇଛନ୍ତି । ସେହିପରି କୁଲଦୀପ ଯାଦବ ଓ ବରୁଣ ଚକ୍ରବର୍ତ୍ତୀଙ୍କ ସ୍ପିନ ଜାଲ ବୁଝିବାରେ ବ୍ୟାଟ୍ସମ୍ୟାନ୍ ବିଫଳ ହୋଇଛନ୍ତି ।

ଅଧିକ ପଢ଼ନ୍ତୁ: ଫାଇନାଲ ପୂର୍ବରୁ ସାମ୍ବାଦିକ ସମ୍ମିଳନୀ କଲାନି ଭାରତ, ପ୍ରାକ୍ଟିସ୍ କରିବାକୁ ଆସିଲେନି ଖେଳାଳି
ଅନ୍ୟପଟେ ଚଳିତ ଏସିଆ କପରେ ପାକିସ୍ତାନ ଖେଳ କମ୍ ବିବାଦ ପାଇଁ ବେଶ୍ ଚର୍ଚ୍ଚାରେ ରହିଛି । ଆଉ ଏବେ ଫାଇନାଲ ଫାଇଟ୍ ପୂର୍ବରୁ ନୂଆ ନାଟକ କରିଛି ପାକିସ୍ତାନ । ଏହି ବିବାଦ ପାକିସ୍ତାନ ଖେଳାଳି ନୁହେଁ ବରଂ ପାକିସ୍ତାନ କ୍ରିକେଟ୍ ବୋର୍ଡ (ପିସିବି) ଅଧ୍ୟକ୍ଷ ମୋହସିନ୍ ନକଭି ସୃଷ୍ଟି କରିଛନ୍ତି ।

ସେପ୍ଟେମ୍ବର ୨୧ ତାରିଖରେ ସୁପର-୪ ରାଉଣ୍ଡ ମ୍ୟାଚ୍‌ରେ ଭାରତ ପାକିସ୍ତାନକୁ ୬ ୱିକେଟ୍‌ରେ ପରାସ୍ତ କରିଥିଲା। ସେହି ମ୍ୟାଚ୍‌ ସମୟରେ, ହାରିସ୍‌ ରୈଫ ୬-୦ ଏବଂ ଏକ ଯୁଦ୍ଧ ବିମାନ ଖସାଇବାର ଔଦ୍ଧତ ଇଙ୍ଗିତ କରିଥିଲେ । ସେହିପରି ସାହିବଜାଦା ଫରହାନ୍‌ ମଧ୍ୟ ଅର୍ଦ୍ଧଶତକ ହାସଲ କରିବା ପରେ ଗନ୍ ସେଲିବ୍ରେସନ୍ କରି ବିବାଦ ସୃଷ୍ଟି କରିଥିଲେ । ଏଭଳି ଅଭଦ୍ରାମୀ ପାଇଁ ବିସିସିଆଇ ହାରିସ୍ ରୈଫ ଓ ଫରହାନଙ୍କ ବିରୋଧରେ ଆଇସିସି ନିକଟରେ ଅଭିଯୋଗ ଦାଖଲ କରିଥିଲା ।

ଏହି ମାମଲାରେ ଆଇସିସି ହାରିସ୍‌ ରୈଫଙ୍କୁ ତାଙ୍କ ମ୍ୟାଚ୍‌ ଫି'‌ର ୩୦ ପ୍ରତିଶତ ଜରିମାନା ଲଗାଇଥିଲେ । ଅନ୍ୟପଟେ ସାହିବଜାଦା ଫରହାନ୍‌ଙ୍କୁ ଚେତାବନୀ ଦେଇଥିଲେ । ପାକିସ୍ତାନୀ ଗଣମାଧ୍ୟମର ରିପୋର୍ଟ ଅନୁଯାୟୀ, ପିସିବି ଅଧ୍ୟକ୍ଷ ବ୍ୟକ୍ତିଗତ ଭାବରେ ହାରିସ୍‌ ରୈଫଙ୍କ ଉପରେ ଲାଗୁ ହୋଇଥିବା ଜରିମାନା ଦେବାକୁ ପ୍ରତିଶ୍ରୁତି ଦେଇଛନ୍ତି । ମୋହସିନ୍ ନକଭିଙ୍କ ଏହି କାର୍ଯ୍ୟ ଏହା ସ୍ପଷ୍ଟ କରୁଛି ପଡ଼ିଆରେ ହାରିସ୍ ରୈଫ୍ କରିଥିବା ଅଭଦ୍ରାମୀକୁ ସେ ସମ୍ପୂର୍ଣ୍ଣ ଭାବେ ସମର୍ଥନ କରୁଛନ୍ତି ।

ସମ୍ଭାବ୍ୟ ଦଳ ଭାରତ: ଅଭିଷେକ ଶର୍ମା, ଶୁବମନ ଗିଲ, ସୂର୍ଯ୍ୟକୁମାର ଯାଦବ (ଅଧିନାୟକ), ସଞ୍ଜୁ ସାମସନ, ତିଳକ ବର୍ମା, ହାର୍ଦ୍ଦିକ ପାଣ୍ଡ୍ୟା, ଶିବମ ଦୁବେ, ଅକ୍ଷର ପଟେଲ, କୁଲଦୀପ ଯାଦବ, ଯଶପ୍ରୀତ ବୁମ୍ରା, ବରୁଣ ଚକ୍ରବର୍ତ୍ତୀ

ସମ୍ଭାବ୍ୟ ଦଳ ପାକିସ୍ତାନ: ସାହିବଜାଦା ଫରହାନ, ଫକର ଜମାନ, ସାଏମ୍ ଆୟୁବ, ସଲମାନ ଅଲି ଆଘା (ଅଧିନାୟକ), ହୁସେନ ତଲତ, ମହମ୍ମଦ ନଓ୍ବାଜ, ମହମ୍ମଦ ହାରିସ, ଫହିମ ଅଶରଫ, ସାହିନ ଆଫ୍ରିଦି, ହ୍ୟାରିସ ରୈଫ, ଅବରାର ଅହମ୍ମଦ