ରବିବାର ଖେଳାଯିବ ମହାମୁକାବିଲା । ମୁହାଁମୁହିଁ ହେବେ ଭାରତ-ଓ୍ବେଷ୍ଟଇଣ୍ଡିଜ୍ । କୋଲକାତାର ଇଡେନ୍ ଗାର୍ଡେନ୍‌ରେ ଖେଳାଯିବ ଏହି ହାଇଭୋଲଟେଜ୍ ମ୍ୟାଚ୍ । ଆଉ ଏହି ମ୍ୟାଚ୍ ଦୁଇ ଦଳ ପାଇଁ ବେଶ୍ ଗୁରୁତ୍ବପୂର୍ଣ୍ଣ । କାହିଁକି ନା ଆଜିର ମ୍ୟାଚ୍ ଯେଉଁ ଦଳ ଜିତିବ ସେହି ଦଳ ବିଶ୍ବକପ୍ ସେମିଫାଇନାଲରେ ନିଜ ସ୍ଥାନ ପକ୍କା କରିବ । ଏହା ସହ ୧୦ ବର୍ଷ ତଳର ପ୍ରତିଶୋଧ ନେବାକୁ ଚେଷ୍ଟା କରିବ ଭାରତ । ସେପଟେ ଟିମ୍ ଇଣ୍ଡିଆ ମୁଣ୍ଡରୁ ଟଳିନି ସଙ୍କଟ । ସେମିକୁ ରାସ୍ତା ଏବେବି ହୋଇନି ସହଜ। ବର୍ଷା ହେଲେ ବିଶ୍ୱକପରୁ ବିଦା ହେବ ଭାରତ ।

ସୁପର-୮ର ପ୍ରଥମ ମ୍ୟାଚ୍ରେ ଦକ୍ଷିଣ ଆଫ୍ରିକା ବିପକ୍ଷରେ ବଡ଼ ପରାଜୟ ପରେ ବ୍ୟାକଫୁଟକୁ ଆସିଥିଲା ଭାରତ । କିନ୍ତୁ ଦକ୍ଷିଣ ଆଫ୍ରିକା ଓ୍ବେଷ୍ଟଇଣ୍ଡିଜ୍‌କୁ ପରାସ୍ତ କରିବା ପରେ ଓ ଭାରତ ଜିମ୍ବାଓ୍ବେ ବିପକ୍ଷରେ ବଡ଼ ବିଜୟ ହାସଲ କରି ଦମଦାର କମବ୍ୟାକ୍ କରିଛି । ସବୁଠୁ ଗୁରୁତ୍ବପୂର୍ଣ୍ଣ କଥା ହେଉଛି ଫର୍ମକୁ ଫେରିଛନ୍ତି ଅଭିଷେକ ଶର୍ମା । ସେହିପରି ଜିମ୍ବାଓ୍ବେ ବିପକ୍ଷରେ ହାର୍ଦ୍ଦିକ ଓ ତିଲକଙ୍କ ବ୍ୟାଟରୁ ରନର ବର୍ଷା ବି ହୋଇଛି । ଆଉ ଏବେ କୋଲକାତାରେ ଓ୍ବେଷ୍ଟଇଣ୍ଡିଜ୍‌କୁ ପରାସ୍ତ କରି ସେମିଫାଇନାଲ ଟିକେଟ୍ ହାସଲ କରିବାକୁ ଚେଷ୍ଟା କରିବ ଟିମ୍ ଇଣ୍ଡିଆ ।

ଟି-୨୦ ବିଶ୍ୱକପରେ ଏପର୍ଯ୍ୟନ୍ତ ଦୁଇ ଦଳ ମଧ୍ୟରେ ମୋଟ ଚାରୋଟି ମ୍ୟାଚ୍ ଖେଳାଯାଇଛି । ୱେଷ୍ଟଇଣ୍ଡିଜ୍ ଏଥିମଧ୍ୟରୁ ତିନୋଟି ମ୍ୟାଚ୍ ଜିତିଛି, ଯେତେବେଳେ ଭାରତ କେବଳ ଥରେ ଜିତିଛି ।

ପଢନ୍ତୁ ସମ୍ପୂର୍ଣ: କାଲି ଭାରତର ବିଶ୍ଵକପ୍ ଭାଗ୍ୟ ପରୀକ୍ଷା; ମ୍ୟାଚ୍ ପୂର୍ବରୁ ଜାଣିନିଅନ୍ତୁ ପିଚ୍ ରିପୋର୍ଟ

୨୦୦୯ ଏବଂ ୨୦୧୦ରେ ୱେଷ୍ଟଇଣ୍ଡିଜ୍ ପ୍ରାଧାନ୍ୟ

୨୦୦୯ରେ ଇଂଲଣ୍ଡରେ ପ୍ରଥମ ଥର ଭାରତ-ୱେଷ୍ଟଇଣ୍ଡିଜ୍ ମୁହାଁମୁହିଁ ହୋଇଥିଲା । ସେହି ମ୍ୟାଚରେ ଭାରତ ଏକ ବଡ଼ ସ୍କୋର କରିପାରିନଥିଲା ଏବଂ ୱେଷ୍ଟଇଣ୍ଡିଜ୍ ସହଜରେ ଲକ୍ଷ୍ୟ ହାସଲ କରିଥିଲା । ତା'ପରେ ୨୦୧୦ରେ କାରିବିଆନରେ ଦୁଇ ଦଳ ପୁଣି ପରସ୍ପରର ମୁହାଁମୁହିଁ ହୋଇଥିଲେ । ସେହି ମ୍ୟାଚରେ ୱେଷ୍ଟଇଣ୍ଡିଜ୍ ପୁଣି ଥରେ ଦୃଢ଼ ବ୍ୟାଟିଂ ଏବଂ ସଠିକ୍ ବୋଲିଂ ସହିତ ଭାରତକୁ ପରାସ୍ତ କରିଥିଲା ।

୨୦୧୪ରେ ଭାରତ ବଦ୍‌ଲା ନେଇଥିଲା

ଏହା ପରେ ଭାରତ ୨୦୧୪ ଟି-୨୦ ବିଶ୍ୱକପରେ ପ୍ରଥମ ଥର ପାଇଁ ୱେଷ୍ଟଇଣ୍ଡିଜକୁ ପରାସ୍ତ କରିଥିଲା । ସେମାନଙ୍କର ଉତ୍କୃଷ୍ଟ ବୋଲିଂ ପାଇଁ ଭାରତ ପ୍ରତିପକ୍ଷ ଦଳକୁ କମ୍ ସ୍କୋରରେ ସୀମିତ କରିଥିଲା । ତା'ପରେ ଭାରତୀୟ ବ୍ୟାଟ୍ସମ୍ୟାନମାନେ ସଂଯମତାର ସହ ବ୍ୟାଟିଂ କରି ଲକ୍ଷ୍ୟ ହାସଲ କରିଥିଲେ। ଏହି ବିଜୟ ଭାରତ ପାଇଁ ଗୁରୁତ୍ୱପୂର୍ଣ୍ଣ ଥିଲା ଏବଂ ଦଳ ଫାଇନାଲରେ ପହଞ୍ଚିଥିଲା।

୨୦୧୬ ସେମି-ଫାଇନାଲର ଯନ୍ତ୍ରଣା

ସବୁଠାରୁ ସ୍ମରଣୀୟ ମ୍ୟାଚ୍ ଥିଲା ୨୦୧୬ ସେମିଫାଇନାଲ । ଭାରତ ଏକ ବଡ଼ ସ୍କୋର କରିଥିଲା । କିନ୍ତୁ ୱେଷ୍ଟଇଣ୍ଡିଜ୍ ଚମତ୍କାର ବ୍ୟାଟିଂ କରି ସହଜରେ ଲକ୍ଷ୍ୟ ହାସଲ କରିଥିଲା। ସେହି ପରାଜୟ ଭାରତୀୟ ପ୍ରଶଂସକମାନଙ୍କୁ ଗଭୀର ଭାବରେ ଆଘାତ କରିଥିଲା ଏବଂ ୱେଷ୍ଟଇଣ୍ଡିଜ୍ ପରେ ଚାମ୍ପିଅନ୍ ହୋଇଥିଲା।