ଇଣ୍ଡିଆନ୍ ପ୍ରିମିୟର ଲିଗ୍ ୨୦୨୬ ଆରମ୍ଭ ହେବା ପାଇଁ ଆହୁରି ବହୁତ ସମୟ ବାକି ଅଛି । କିନ୍ତୁ ଏବେଠାରୁ ପ୍ରସ୍ତୁତି ଆରମ୍ଭ ହୋଇସାରିଛି । ମିଡିଆ ରିପୋର୍ଟ ଅନୁଯାୟୀ ନଭେମ୍ବର ୧୫ ସୁଦ୍ଧା ସମସ୍ତ ଫ୍ରାଞ୍ଚାଇଜ୍ ସେମାନଙ୍କ ରେଟେନସନ୍ ଲିଷ୍ଟ ଦେବାକୁ ପଡ଼ିବ । ତେବେ ଏହାରି ମଧ୍ୟରେ କିଛି ଷ୍ଟାର ଖେଳାଳିଙ୍କ ଅଦଳବଦଳ ପ୍ରକ୍ରିୟା ମଧ୍ୟ ଆରମ୍ଭ ହୋଇଥିବା ଖବର ସାମ୍ନାକୁ ଆସିଛି ।

ଜାତୀୟ ଗଣମାଧ୍ୟମର ରିପୋର୍ଟ ଅନୁଯାୟୀ, ଭାରତର ଷ୍ଟାର ବ୍ୟାଟ୍ସମ୍ୟାନ୍ କେଏଲ ରାହୁଲ ଏବଂ ସଞ୍ଜୁ ସାମସନ ସେମାନଙ୍କର ପୂର୍ବ ଦଳ ଛାଡ଼ି ନୂଆ ଫ୍ରାଞ୍ଚାଇଜରେ ଯୋଗ ଦେଇପାରନ୍ତି । ଏକ ରିପୋର୍ଟ ଅନୁଯାୟୀ, ଦିଲ୍ଲୀ କ୍ୟାପିଟାଲ୍ସ ରାଜସ୍ଥାନ ରୟାଲ୍ସ (RR) ସହିତ ଏକ ବଡ଼ ଟ୍ରେଡ୍‌ ଡିଲ୍‌ କରିବାକୁ ପ୍ରସ୍ତୁତ ଥିବା ସୂଚନା ମିଳୁଛି । ସେହିପରି ଶାହରୁଖ ଖାନଙ୍କ କୋଲକାତା ନାଇଟ୍ ରାଇଡର୍ସ (KKR) ମଧ୍ୟ ଭାରତୀୟ ଓ୍ବିକେଟ କିପର ବ୍ୟାଟ୍ସମ୍ୟାନ୍‌ କେଏଲ ରାହୁଲଙ୍କୁ ନିଜ ଦଳକୁ ଆଣିବାକୁ ଆଗ୍ରହୀ ରହିଛି ।

ଅଧିକ ପଢ଼ନ୍ତୁ: ଅବସର ନା ବିଶ୍ବକପ୍‌ ପ୍ରସ୍ତୁତି ? ଅଷ୍ଟ୍ରେଲିଆ ପହଞ୍ଚିବା ପରେ ଭାଇରାଲ ହେଉଛି କୋହଲିଙ୍କ ପୋଷ୍ଟ

କେଏଲ ରାହୁଲଙ୍କ ପାଇଁ KKR ଏକ ବଡ଼ ବିଡ୍ କରିବ

କେଏଲ ରାହୁଲ ଆଇପିଏଲ ୨୦୨୫ରେ ଦିଲ୍ଲୀ କ୍ୟାପିଟାଲ୍ସର ଅଂଶ ଥିଲେ । ସେ ତାଙ୍କ ବ୍ୟାଟିଂ ଉପରେ ଅଧିକ ଧ୍ୟାନ ଦେବା ପାଇଁ ଆଇପିଏଲର ୧୮ତମ ସିଜିନରେ ଅଧିନାୟକ ପଦରୁ ଓହରି ଯାଇଥିଲେ । ଗତ ସିଜିନରେ ରାହୁଲଙ୍କ ପ୍ରଦର୍ଶନ ମଧ୍ୟ ଉତ୍କୃଷ୍ଟ ଥିଲା । ସେ ୧୩ ମ୍ୟାଚ୍ ରେ ୫୩.୯ ହାରରେ ୫୩୯ ରନ୍ କରିଥିଲେ ।
ଜାତୀୟ ଗଣମାଧ୍ୟମର ଏକ ରିପୋର୍ଟ ଅନୁଯାୟୀ, କୋଲକାତା ନାଇଟ୍ ରାଇଡର୍ସ (KKR) ଏବେ କେଏଲ ରାହୁଲଙ୍କୁ ନିଜ ଦଳରେ ସାମିଲ କରିବାକୁ ଚାହୁଁଛି । ଯାହାଫଳରେ ସେ KKRରେ ଜଣେ ୱିକେଟକିପର-ବ୍ୟାଟ୍ସମ୍ୟାନ୍ ଏବଂ ଜଣେ ଓପନିଂ ବ୍ୟାଟ୍ସମ୍ୟାନ୍ ଭାବେ ଖେଳିପାରିବେ ।

ସେହିପରି ସଞ୍ଜୁ ସାମସନ ବହୁତ ଦିନ ଧରି ରାଜସ୍ଥାନ ରୟାଲ୍ସ ସହିତ ଅଛନ୍ତି । କିନ୍ତୁ ଏବେ ସେ ନିଜେ ଫ୍ରାଞ୍ଚାଇଜ୍ ଛାଡିବାକୁ ଚାହୁଁଛନ୍ତି । ସେ ତାଙ୍କୁ ରିଲିଜ୍‌ କରିବାକୁ RRକୁ ମଧ୍ୟ ଅନୁରୋଧ କରିଛନ୍ତି । ରିପୋର୍ଟ ଅନୁସାରେ, ଦିଲ୍ଲୀ କ୍ୟାପିଟାଲ୍ସ ସାମସନଙ୍କୁ କିଣିବା ପାଇଁ ରାଜସ୍ଥାନ ରୟାଲ୍ସ ସହିତ ଏକ ଟ୍ରେଡ୍ ଡିଲ୍‌ କରିପାରେ । ଦିଲ୍ଲୀ ସଞ୍ଜୁ ସାମସନଙ୍କୁ କିଣିବାକୁ ନିଷ୍ପତ୍ତି ନେଇଥିବାବେଳେ, ସେମାନେ ଏପର୍ଯ୍ୟନ୍ତ ନିଷ୍ପତ୍ତି ନେଇନାହାଁନ୍ତି ଯେ ସେମାନେ ତାଙ୍କ ବଦଳରେ କେଉଁ ଖେଳାଳିଙ୍କୁ ବଦଳାଇବେ । ଏହି ସବୁ ସୂଚାଇ ଦେଉଛି ଯେ ସଞ୍ଜୁ ସାମସନ IPL ୨୦୨୬ରେ ଏକ ନୂଆ ଦଳରେ ଖେଳୁଥିବାର ଦେଖିବାକୁ ମିଳିପାରେ ।