Kavya Maran Wedding Date / ଅନିରୁଦ୍ଧଙ୍କୁ ବିବାହ କରିବେ SRHର ମାଲିକାଣୀ କାବ୍ୟା; ଉଭୟଙ୍କ ସମ୍ପତ୍ତି କେତେ ଜାଣନ୍ତୁ

ମୁମ୍ବାଇ: ଆଇପିଏଲ ଟିମ ସନରାଇଜର୍ସ ହାଇଦ୍ରାବାଦ (SRH) ତଥା ସନ୍ ଗ୍ରୁପ୍‌ର ଉତ୍ତରାଧିକାରୀ କାବ୍ୟା ମରାନ ଖୁବଶୀଘ୍ର ହାତକୁ ଦିହାତ ହେଉଛନ୍ତି । ସେ ଭାରତୀୟ ସିନମାର ଜଣାଶୁଣା ମ୍ୟୁଜିକ୍ କମ୍ପୋଜର୍ ଅନିରୁଦ୍ଧ ରବିଚନ୍ଦରଙ୍କୁ ବିବାହ କରିବେ । ଉଭୟ ପରିବାର ବିବାହ ପାଇଁ ପ୍ରସ୍ତୁତ ହେଉଥିବାବେଳେ ଅତିଥିମାନଙ୍କୁ ନିମନ୍ତ୍ରଣ ପତ୍ର ମଧ୍ୟ ପହଞ୍ଚିସାରିଛି । କାବ୍ୟା ହେଉଛନ୍ତି ୨୫ ହଜାର କୋଟିର ମାଲିକାଣୀ । ତାଙ୍କ ଭାବି ସ୍ଵାମୀଙ୍କ ସମ୍ପତ୍ତି ବିଷୟରେ ଜାଣିବାକୁ ଅନେକଙ୍କ ମନରେ ଆଗ୍ରହ ରହିଛି ।

ଉଭୟ ଆସନ୍ତା ନଭେମ୍ବର ୨୧ ତାରିଖରେ ବିବାହ କରିବେ । ଏହି କପଲ୍ ନିଜ ବିବାହ ପାଇଁ ଗ୍ରୀସକୁ ବାଛିଛନ୍ତି । ଅନେକ ସମୟରେ କାବ୍ୟା ମରାନଙ୍କ ସୁନ୍ଦରତାକୁ ନେଇ ବେଶ ଚର୍ଚ୍ଚା ହୋଇଥାଏ । ସେ ବିଶେଷ କରି ଆଇପିଏଲ ଚାଲିଥିବାବେଳେ ନଜର ଆସିଥାନ୍ତି । ୩୪ ବର୍ଷୀୟ କାବ୍ୟା ଏବେ ବିବାହ ପାଇଁ ନିଷ୍ପତ୍ତି ନେଇଛନ୍ତି ।

• କାବ୍ୟା ମରାନଙ୍କ ମୋଟ ସମ୍ପତ୍ତି

ସନରାଇଜର୍ସ ହାଇଦ୍ରାବାଦର ମାଲିକାଣୀ କାବ୍ୟା ହେଉଛନ୍ତି ସନ୍ ଗ୍ରୁପ୍ ଚେୟାରମ୍ୟାନ୍ କଲାନିଧି ମାରନଙ୍କ ଝିଅ । ପ୍ରାୟ ୨୫,୦୦୦ କୋଟି ଟଙ୍କାର ସନ୍ ଟିଭି ନେଟୱର୍କର ଉତ୍ତରାଧିକାରୀ । ଏହାବ୍ୟତୀତ ୧୮,୦୦୦ କୋଟି ମୂଲ୍ୟର ଆଇପିଏଲ ଫ୍ରାଞ୍ଚାଇଜ୍ ସନ୍‌ରାଇଜର୍ସ ହାଇଦ୍ରାବାଦର ମାଲିକାଣୀ । ରିପୋର୍ଟ ଅନୁସାରେ, କାବ୍ୟା ମରାନଙ୍କ ନିଜସ୍ଵ ମୋଟ ସମ୍ପତ୍ତି ୪୦୯ କୋଟି ଟଙ୍କା । ଯଦି କାବ୍ୟାଙ୍କ ପାଠପଢା କଥା କହିଲେ, ଚେନ୍ନାଇର ସ୍ଟେଲା ମରିସ୍ କଲେଜରେ ବି.କମ୍ କରିଛନ୍ତି । ଏହାପରେ ନ୍ୟୁୟର୍କ ୟୁନିଭର୍ସିଟିର ପ୍ରତିଷ୍ଠିତ ଲିୟୋନାର୍ଡ ଏନ୍. ଷ୍ଟର୍ଣ୍ଣ ସ୍କୁଲ ଅଫ୍ ବିଜନେସ୍‌ରୁ MBA ଡିଗ୍ରୀ ହାସଲ କରିଛନ୍ତି । କାବ୍ୟାଙ୍କୁ ଦାମି ଗାଡ଼ି ଚଢିବା ବେଶ ପସନ୍ଦ । ତାଙ୍କ ଲଗ୍ଜୁରୀ କାର କଲେକ୍ସନରେ ରୋଲ୍ସ-ରଏସ ଫ୍ଯାଣ୍ଟମ, ବେଣ୍ଟଲେ ବେଣ୍ଟାୟଗା ଓ ବିଏମଡବ୍ଲୁ ୭୬୦ଏଲଆଇ ସାମିଲ ।

ପଢନ୍ତୁ ଏହି ଖବର: ବଲିଉଡ ଅଭିନେତା ଟାଇଗର ଶ୍ରଫ୍‌ଙ୍କୁ ଗୁଳିମାଡ଼

• କାବ୍ୟାଙ୍କ ବର କିଏ ?

କାବ୍ୟା ମରାନଙ୍କ ଭାବି ସ୍ଵାମୀ ହେଉଛନ୍ତି ଅନିରୁଦ୍ଧ ରବିଚନ୍ଦର । ସେ ଭାରତୀୟ ଫିଲ୍ମ ଇଣ୍ଡଷ୍ଟ୍ରିର ସବୁଠୁ ମହଙ୍ଗା ମ୍ୟୁଜିକ୍ କମ୍ପୋଜର୍ ଭାବେ ଜଣାଶୁଣା । ସେ କୌଣସି ବଡ଼ ପ୍ରୋଜେକ୍ଟ ଲାଗି ୮ରୁ ୧୦ କୋଟି ଟଙ୍କା ନିଅନ୍ତି । ଅନିରୁଦ୍ଧଙ୍କ ମୋଟ ସମ୍ପତ୍ତିର ମୂଲ୍ୟ ୫୦କୋଟି । ମ୍ୟୁଜିକ୍ ବ୍ୟତୀତ ସେ ବ୍ୟବସାୟ ଜଗତରେ ମଧ୍ୟ ବେଶ ସକ୍ରିୟ । ସେ ଲୋକପ୍ରିୟ ଫିଲ୍ଟର କଫି ଷ୍ଟାର୍ଟଅପ୍ 'VS Mani & Co'ର ସହପ୍ରତିଷ୍ଠାତା ଓ ବ୍ରାଣ୍ଡ ଆମ୍ବାସାଡର । ଏହାବ୍ୟତୀତ ସେ ଅନ୍ୟ କିଛି ବ୍ୟବସାୟ ମଧ୍ୟ କରନ୍ତି।