ଆଇପିଏଲ ୨୦୨୭ ମିନି ଅକ୍ସନ ପୂର୍ବରୁ ମୁମ୍ବାଇ ଇଣ୍ଡିଆନ୍ସକୁ ନେଇ ଏକ ବଡ଼ ଖବର ସାମ୍ନାକୁ ଆସିଛି । ମହେଲା ଜୟବର୍ଦ୍ଧନେ ନିଜ ପଦରୁ ଇସ୍ତଫା ଦେବା ପରେ କିରନ୍ ପୋଲାର୍ଡଙ୍କୁ ଦଳର ନୂଆ ହେଡ୍ କୋଚ୍ ଭାବେ ନିଯୁକ୍ତ କରାଯାଇଛି । ମୁମ୍ବାଇ ଇଣ୍ଡିଆନ୍ସ ସହ ଦୀର୍ଘ ବର୍ଷର ସମ୍ପର୍କ ରଖିଥିବା ପୋଲାର୍ଡ ଏବେ ନୂଆ ଭୂମିକାରେ ଦଳର ଦାୟିତ୍ୱ ସମ୍ଭାଳିବେ ।

Mumbai Indians elevate Kieron Pollard as Head Coach A defining figure in MI’s success, the remarkable 16-year association of Kieron Pollard within the #OneFamily enters a new chapter. Read more - https://t.co/ORZz4gruIr https://t.co/BMI38BYH1f

— Mumbai Indians (@mipaltan) October 24, 2026

୩୯ ବର୍ଷୀୟ ୱେଷ୍ଟଇଣ୍ଡିଜ୍‌ର ଏହି ପୂର୍ବତନ ଅଲରାଉଣ୍ଡର ଆଇପିଏଲ୍‌ରେ କେବଳ ମୁମ୍ବାଇ ଇଣ୍ଡିଆନ୍ସ ପାଇଁ ଖେଳିଛନ୍ତି । ୨୦୧୦ରୁ ୨୦୨୨ ପର୍ଯ୍ୟନ୍ତ ସେ ଏହି ଦଳର ପ୍ରତିନିଧିତ୍ୱ କରିଥିଲେ । ଏବେ ସେ ହେଡ୍ କୋଚ୍ ଭାବେ ଦଳର ଦାୟିତ୍ବ ନେଇଛନ୍ତି ।
ଏଥି ସହ ପଢନ୍ତୁ:   MI ଛାଡ଼ିଲେ ମହେଲା ଜୟବର୍ଦ୍ଧନେ, ହେଡ୍ କୋଚ୍ ପଦରୁ ଦେଲେ ଇସ୍ତଫା

ହେଡ୍ କୋଚ୍ ହେବା ପରେ କ’ଣ କହିଲେ ପୋଲାର୍ଡ ?

ନୂଆ ଦାୟିତ୍ୱ ମିଳିବା ପରେ କିରନ୍ ପୋଲାର୍ଡ ଖୁସି ପ୍ରକାଶ କରିବା ସହ ମୁମ୍ବାଇ ଇଣ୍ଡିଆନ୍ସ ସହ ଥିବା ତାଙ୍କର ଭାବପ୍ରବଣ ସମ୍ପର୍କ ବିଷୟରେ କହିଛନ୍ତି ।
ସେ କହିଛନ୍ତି, “ମୁମ୍ବାଇ ଇଣ୍ଡିଆନ୍ସର ହେଡ୍ କୋଚ୍ ଭୂମିକା ଗ୍ରହଣ କରିବା ମୋ ପାଇଁ ଗର୍ବ ଓ ସମ୍ମାନର ବିଷୟ । MI ମୋ ଜୀବନ ଓ କ୍ୟାରିୟରର ଏକ ବଡ଼ ଅଂଶ ହୋଇ ରହିଛି । ଏହି ଦଳ ଏବଂ ଖେଳାଳିମାନଙ୍କ ସହ ମୋର ସମ୍ପର୍କ ମୋ ପାଇଁ ବହୁତ ମୂଲ୍ୟବାନ ।”

ସେ ଆହୁରି କହିଛନ୍ତି ଯେ ଜଣେ ଖେଳାଳି ଏବଂ ପରେ ଜଣେ କୋଚ୍ ଭାବେ ଏହି ଯାତ୍ରାର ଅଂଶ ହୋଇଥିବାରୁ ମୁମ୍ବାଇ ଇଣ୍ଡିଆନ୍ସର ଗୁରୁତ୍ୱ ଓ ଦଳର ଦାୟିତ୍ୱକୁ ସେ ଭଲ ଭାବେ ବୁଝିଛନ୍ତି ।

ନୀତା ଅମ୍ବାନୀ ଓ ଆକାଶ ଅମ୍ବାନୀଙ୍କୁ ଜଣାଇଲେ କୃତଜ୍ଞତା

ନୂଆ ଦାୟିତ୍ୱ ପାଇଁ ପୋଲାର୍ଡ ମୁମ୍ବାଇ ଇଣ୍ଡିଆନ୍ସର ମାଲିକ ଏବଂ ପୂରା ଦଳକୁ ଧନ୍ୟବାଦ ଜଣାଇଛନ୍ତି । ସେ ନୀତା ଅମ୍ବାନୀ, ଆକାଶ ଅମ୍ବାନୀ ଓ ଏମ୍‌ଆଇ ପରିବାର ପ୍ରତି କୃତଜ୍ଞତା ପ୍ରକାଶ କରିଛନ୍ତି ।

LLORD's legacy from player to coach was built brick by brick! 🧱 https://t.co/HKwRt3HKdP

— Mumbai Indians (@mipaltan) October 24, 2026

ଆଗାମୀ ଦିନରେ ଖେଳାଳି ଓ ସପୋର୍ଟ ଷ୍ଟାଫ୍‌ଙ୍କ ସହ ମିଶି କାମ କରିବା, ଦଳର ଗୌରବମୟ ଐତିହ୍ୟକୁ ଆଗକୁ ନେବା, ନୂଆ ପ୍ରତିଭାଙ୍କୁ ଗଢ଼ି ତୋଳିବା ଏବଂ ପ୍ରଶଂସକଙ୍କୁ ଅଧିକ ଉତ୍ସବ ପାଳନ କରିବାର ସୁଯୋଗ ଦେବା ତାଙ୍କର ଲକ୍ଷ୍ୟ ବୋଲି ସେ କହିଛନ୍ତି ।

୨୨ ବର୍ଷ ବୟସରେ କରିଥିଲେ ଆଇପିଏଲ୍ ଡେବ୍ୟୁ

କିରନ୍ ପୋଲାର୍ଡ ୨୦୧୦ରେ ମାତ୍ର ୨୨ ବର୍ଷ ବୟସରେ ମୁମ୍ବାଇ ଇଣ୍ଡିଆନ୍ସ ପାଇଁ ଆଇପିଏଲ୍ ଡେବ୍ୟୁ କରିଥିଲେ । ଏହା ପରେ ସେ ଦୀର୍ଘ ୧୨ ବର୍ଷ ଧରି ଦଳ ସହ ଜଡ଼ିତ ରହିଥିଲେ ଏବଂ ନିଜର ଧୁଆଁଧାର ବ୍ୟାଟିଂ ଓ ବୋଲିଂ ଦ୍ୱାରା ଦଳକୁ ଅନେକ ସଫଳତା ଦେଇଥିଲେ ।

ମୁମ୍ବାଇ ଇଣ୍ଡିଆନ୍ସ ପକ୍ଷରୁ ଖେଳିଥିବା ୧୮୯ଟି ମ୍ୟାଚ୍‌ରେ ପୋଲାର୍ଡ ୩,୪୧୨ ରନ୍ ସଂଗ୍ରହ କରିବା ସହ ୬୯ଟି ୱିକେଟ୍ ନେଇଥିଲେ । ଏବେ ଖେଳାଳି ଭାବେ ଦଳକୁ ଅନେକ ସଫଳତା ଦେଇଥିବା ପୋଲାର୍ଡ ହେଡ୍ କୋଚ୍ ଭାବେ ମୁମ୍ବାଇ ଇଣ୍ଡିଆନ୍ସକୁ ଆଗାମୀ ଆଇପିଏଲ୍‌ରେ କେତେ ସଫଳତା ଦେଉଛନ୍ତି, ତାହା ଉପରେ ସମସ୍ତଙ୍କ ନଜର ରହିବ ।