ଭାରତ ଆସିବେ ଲିଜେଣ୍ଡ ଫୁଟବଲର ଲିଓନେଲ୍ ମେସି । ୧୪ ବର୍ଷ ପରେ ପୁଣି ଥରେ ଭାରତ ଆସିବେ ମେସି । ଏନେଇ ପୂର୍ବରୁ ସୂଚନା ମିଳିସାରିଥିବା ବେଳେ ଏବେ ଏନେଇ ନିଜେ ସ୍ପଷ୍ଟ କରିଛନ୍ତି ମେସି । ଗୁରୁବାର ଆର୍ଜେଣ୍ଟିନାର କିମ୍ବଦନ୍ତୀ ଫୁଟବଲର ଲିଓନେଲ ମେସି 'GOT ଟୁର୍ ଇଣ୍ଡିଆ ୨୦୨୫'ରେ ସେ ଅଂଶ ଗ୍ରହଣ କରିବେ ବୋଲି ସ୍ପଷ୍ଟ କରିଛନ୍ତି। ସେ କହିଛନ୍ତି, ଭାରତ ହେଉଛି ଏକ ଫୁଟବଲର ମହାନ ଦେଶ । ଆଉ ଏହି ଦେଶକୁ ପୁଣି ଫେରିବା ଏକ ସମ୍ମାନର କଥା ବୋଲି ସେ କହିଛନ୍ତି ।

ଅର୍ଜେଣ୍ଟିନାର ଷ୍ଟାର ଫୁଟବଲର ମେସି ଶେଷ ଥର ପାଇଁ ୨୦୧୧ରେ ଭାରତ ଆସିଥିଲେ । ସେ କୋଲକାତାର ସଲ୍ଟ ଲେକ୍ ଷ୍ଟାଡିୟମରେ ଭେନେଜୁଏଲା ବିପକ୍ଷରେ ଆର୍ଜେଣ୍ଟିନାର ଅଧିନାୟକତ୍ୱ କରିଥିଲେ । ମେସି କହିଛନ୍ତି, 'ଭାରତ ମୋ ପାଇଁ ଏକ ଅତ୍ୟନ୍ତ ସ୍ୱତନ୍ତ୍ର ଦେଶ । ୧୪ ବର୍ଷ ପୂର୍ବେ ଏଠାରେ ବିତାଇଥିବା ସୁନ୍ଦର ସ୍ମୃତି ଏବେ ବି ରହିଛି । ଭାରତରେ ପ୍ରଶଂସକଙ୍କ ଉତ୍ସାହ ଆଶ୍ଚର୍ଯ୍ୟଜନକ ଥିଲା । ଏଥର ମୁଁ ଏକ ନୂତନ ପିଢ଼ିକୁ ଭେଟିବା ଏବଂ ଫୁଟବଲ୍ ପ୍ରତି ମୋର ଆଗ୍ରହ ବାଣ୍ଟିବା ପାଇଁ ବହୁତ ଉତ୍ସାହିତ।"

ଅଧିକ ପଢ଼ନ୍ତୁ: ପ୍ରଥମ ଟେଷ୍ଟରେ ଭାରତର ଆକ୍ରମଣାତ୍ମକ ବୋଲିଂ, ୧୬୨ ରନରେ ଓ୍ବେଷ୍ଟଇଣ୍ଡିଜ୍ ଅଲଆଉଟ୍

ସୂଚନା ଅନୁସାରେ, ମେସିଙ୍କ ଚାରି ଦିନିଆ ଗସ୍ତ ଡିସେମ୍ବର ୧୩ରେ କୋଲକାତାରେ ଆରମ୍ଭ ହେବ । ତା'ପରେ ସେ ଅହମ୍ମଦାବାଦ, ମୁମ୍ବାଇ ଏବଂ ନୂଆଦିଲ୍ଲୀ ଯାତ୍ରା କରିବେ । ଡିସେମ୍ବର ୧୫ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ସାକ୍ଷାତ ସହିତ ମେସିଙ୍କ ଭାରତ ଟୁର୍ ଶେଷ ହେବ ।

କୋଲକାତାରେ ମେସିଙ୍କ କାର୍ଯ୍ୟକ୍ରମ କୋଲକାତାର ପ୍ରତିଷ୍ଠିତ ସଲ୍ଟ ଲେକ୍ ଷ୍ଟାଡିୟମରେ ହେବ । ଯେଉଁଠାରେ ସେ 'GOAT କନସର୍ଟ' ଏବଂ 'GOAT କପ୍'ରେ ସାମିଲ ହେବେ । ଏହି ମ୍ୟାଚ୍‌ରେ ସୌରଭ ଗାଙ୍ଗୁଲି, ବାଇଚୁଙ୍ଗ ଭୁଟିଆ ଏବଂ ଲିଆଣ୍ଡର ପେସ୍ ଭଳି କିମ୍ବଦନ୍ତୀ ଭାରତୀୟ ଖେଳାଳିମାନେ ମଧ୍ୟ ମେସିଙ୍କ ସହ ପଡ଼ିଆରେ ଉପସ୍ଥିତ ରହିବେ ।

ଏହି ଗସ୍ତ ସମୟରେ ମେସି କନସର୍ଟ, ଫୁଡ୍ ଫେଷ୍ଟିଭାଲ, ଫୁଟବଲ୍ ମାଷ୍ଟରକ୍ଲାସ୍ ଏବଂ ପ୍ୟାଡେଲ୍ ପ୍ରଦର୍ଶନୀ ଭଳି କାର୍ଯ୍ୟକ୍ରମରେ ଅଂଶଗ୍ରହଣ କରିବେ। ସେହିପରି ମୁମ୍ବାଇରେ "ପ୍ୟାଡଲ୍ GOAT କପ୍" ଅନୁଷ୍ଠିତ ହେବ । ଏଥିରେ ଶାହରୁଖ ଖାନ, ସଚିନ୍ ତେନ୍ଦୁଲକର ଓ ମହେନ୍ଦ୍ର ସିଂ ଧୋନିଙ୍କ ଭଳି ତାରକାମାନେ ମଧ୍ୟ ଉପସ୍ଥିତ ରହିବେ ବୋଲି ଆଶା କରାଯାଉଛି ।

ସବୁଠୁ ବଡ଼ କଥା ହେଉଛି, ନଭେମ୍ବରରେ ଆର୍ଜେଣ୍ଟିନା ଜାତୀୟ ଫୁଟବଲ୍ ଦଳ କେରଳରେ ଏକ ବନ୍ଧୁତ୍ୱପୂର୍ଣ୍ଣ ମ୍ୟାଚ୍ ମଧ୍ୟ ଖେଳିପାରେ । ତେବେ ଏପର୍ଯ୍ୟନ୍ତ ପ୍ରତିଦ୍ୱନ୍ଦ୍ୱୀ ଏବଂ ମ୍ୟାଚ୍ ଭେନ୍ୟୁ ଚୁଡ଼ାନ୍ତ ହୋଇନାହିଁ । ଯଦି ଏହା ହୁଏ, ତେବେ ମେସି ଦୁଇ ମାସ ମଧ୍ୟରେ ଦ୍ୱିତୀୟ ଥର ପାଇଁ ଭାରତ ଗସ୍ତ କରିପାରନ୍ତି । ଅଲିମ୍ପିକ୍ ସ୍ୱର୍ଣ୍ଣ ପଦକ ବିଜେତା ଏବଂ ୨୦୨୨ ବିଶ୍ୱକପ୍ ଚାମ୍ପିଅନ୍ ଅଧିନାୟକ ମେସିଙ୍କୁ ବିଶ୍ୱର ସବୁଠାରୁ ଲୋକପ୍ରିୟ ଫୁଟବଲ୍ ଖେଳାଳିଙ୍କ ମଧ୍ୟରୁ ଅନ୍ୟତମ । ତାଙ୍କର ଗସ୍ତକୁ ଭାରତରେ ଅନୁଷ୍ଠିତ ହୋଇଥିବା ସବୁଠାରୁ ବଡ଼ ଫୁଟବଲ୍ ସମ୍ବନ୍ଧୀୟ ଇଭେଣ୍ଟ ଭାବରେ ବିବେଚନା କରାଯାଉଛି ।

Argus News | argus news | Odisha Latest News, Breaking News, Trending News, Live TV