Mohammed Shami / ପତ୍ନୀ ହସିନଙ୍କୁ କଡ଼ା ଜବାବ ଦେଲେ କ୍ରିକେଟର ମହମ୍ମଦ ସାମି

ଲକ୍ଷ୍ନୌ: ଭାରତୀୟ ଟିମର ସୁପରଷ୍ଟାର ଦ୍ରୁତ ବୋଲର ମହମ୍ମଦ ସାମି ପୁଣି ପତ୍ନୀଙ୍କ ସହ ଏକ ବିବାଦକୁ ନେଇ ଚର୍ଚ୍ଚାକୁ ଆସିଛନ୍ତି । ପତ୍ନୀ ହସିନଙ୍କୁ କଡ଼ା ଜବାବ ଦେଇଛନ୍ତି ସାମି । କିଛି ମାସ ପୂର୍ବରୁ ସାମି ପ୍ରଥମେ ରାଷ୍ଟ୍ରୀୟ ଲୋକଦଳର ଜାତୀୟ ସଭାପତି ଜୟନ୍ତ ଚୌଧୁରୀଙ୍କୁ ଭେଟିଥିଲେ ଏହାପରେ ସେ ଉତ୍ତର ପ୍ରଦେଶ ନିର୍ବାଚନ ୨୦୨୭ରେ ମୈଦାନକୁ ଓହ୍ଲାଇବେ ବୋଲି ଚର୍ଚ୍ଚା ହୋଇଥିଲା । ଏହାପରେ ପତ୍ନୀ ହସିନ ସାମିଙ୍କ ସମେତ ତାଙ୍କ ପରିବାରକୁ ଖୋଲା ଚ୍ୟାଲେଞ୍ଜ ଦେଇଥିଲେ । ସେ ସାମିଙ୍କ ବିପକ୍ଷରେ ନିର୍ବାଚନ ଲଢିବେ ବୋଲି କହିଥିଲେ । ଏବେ ଏହା ଉପରେ ନିଜ ଜବାବ ରଖିଛନ୍ତି ସାମି ।

• କଡ଼ା ଜବାବ ଦେଲେ ସାମି

ହସିନ ଜହାଁ ସାମିଙ୍କ ପରିବାରକୁ ଚ୍ୟାଲେଞ୍ଜ କରି ସେପ୍ଟେମ୍ବର ମାସ ଶେଷ ସୁଦ୍ଧା କହିଥିଲେ ଯେ ଯଦି ତାଙ୍କ ପରିବାରର କେହି ନିର୍ବାଚନ ଲଢେ, ତେବେ ସେ ତାଙ୍କ ବିପକ୍ଷରେ ମୈଦାନକୁ ଓହ୍ଲାଇବେ । ଗତ ୮ ବର୍ଷ ଧରି ଏହି ଦମ୍ପତିଙ୍କ ମଧ୍ୟରେ ପାରିବାରିକ କଳହ ଲାଗି ରହିଛି । ଏବେ ଉଭୟଙ୍କ ଛାଡ଼ପତ୍ର ମାମଲା କୋର୍ଟରେ ବିଚାରଧୀନ ରହିଛି । ଏପରି ସ୍ଥିତିରେ ଉଭୟକୁ ଜବାବ ଦେଉଥିବା ନଜିର ରହିଛି । ହସିନ ଜହାଁଙ୍କ ସେହି ଚ୍ୟାଲେଞ୍ଜ ପରେ ସମସ୍ତେ ସାମିଙ୍କ ଜବାବକୁ ଅପେକ୍ଷା କରିଥିଲେ । ଏବେ ସାମି ମୁହଁ ଖୋଲିଛନ୍ତି ।

ସାମି ରୁରକିର ସ୍ଵାଧୀନ ବିଧାୟକ ଉମେଶ କୁମାରଙ୍କୁ ଭେଟିବାକୁ ଯାଇଥିଲେ । ଏହି ସମୟରେ ଗଣମାଧ୍ୟମ ପ୍ରତିନିଧିଙ୍କ ସହିତ କଥାବାର୍ତ୍ତା ସମୟରେ ସେ କହିଛନ୍ତି, "ଯାହାକୁ ଯେଉଁଠୁ ନିର୍ବାଚନ ଲଢିବାକୁ ଅଛି, ସେ ଲଢୁ । ମୋତେ କୌଣସି ସମସ୍ୟା ନାହିଁ । ଏଠି ତ ଖୋଲା ମୈଦାନ ଅଛି । ଯାହାକୁ ଆସିବାକୁ ଅଛି ଆସନ୍ତୁ ।" ପତ୍ନୀ ହସିନଙ୍କ ସେହି କଥା ଉପରେ ସାମି ଏହି ଜବାବ ରଖିଥିବା ପରି ମନେ ହେଉଛି । କୁହାଯାଉଛି ସାମି ନିଜେ ନିର୍ବାଚନ ଲଢିପାରନ୍ତି । ଯଦି ସେ ଟିମ ଇଣ୍ଡିଆ ପାଇଁ ଖେଳନ୍ତି, ତେବେ ତାଙ୍କ ଭାଇ ରାଷ୍ଟ୍ରୀୟ ଲୋକଦଳରୁ ନିର୍ବାଚନ ଲଢିପାରନ୍ତି ।

• ଟିମକୁ କମବ୍ୟାକ୍ କରିପାରନ୍ତି ସାମି

ନିକଟରେ ଭାରତୀୟ ଟିମର ଅନ୍ୟତମ ସୁପରଷ୍ଟାର ଦ୍ରୁତ ବୋଲର ଭୁବନେଶ୍ଵର କୁମାର ଟିମ ଇଣ୍ଡିଆୁ ଫେରିଛନ୍ତି । ଏହାପରେ ମହମ୍ମଦ ସାମି ବି ଫେରିପାରନ୍ତି ବୋଲି ଆଶା କରାଯାଉଛି । ସାମି ଶେଷ ଥର ଲାଗି ଟିମ ଇଣ୍ଡିଆ ଲାଗି ୨୦୨୫ ଚାମ୍ପିଆନ୍ସ ଟ୍ରଫି ପାଇଁ ଖେଳିଥିଲେ । ଏହାପରେ ସେ କିଛି ସମୟ ଇଞ୍ଜୁରୀ ପାଇଁ ବସିଥିଲେ । ମାତ୍ର ଫିଟ୍ ହେବାପରେ ମଧ୍ୟ ତାଙ୍କୁ ଭାରତ ପାଇଁ ଖେଳିବାକୁ ସୁଯୋଗ ଦିଆଯାଇନାହିଁ । ସେ ଅନ୍ତର୍ଜାତୀୟ ଟିମରେ ନୁହେଁ, ବରଂ ଘରୋଇ କ୍ରିକେଟରେ ଲଗାତାର ଖେଳୁଥିବା ଦେଖିବାକୁ ମିଳିଛି ।

ପଢନ୍ତୁ ଏହି ଖବର: ଡାନ୍ସ ଟିଚର୍ ସାଜିଲେ ବିରାଟ କୋହଲି; ଜୈସୱାଲଙ୍କୁ ଶିଖାଇଲେ ଠୁମକା...

• ଘରୋଇ କ୍ରିକେଟରେ ଜବରଦସ୍ତ ସାମି

ମହମ୍ମଦ ସାମି ଘରୋଇ କ୍ରିକେଟରେ ଦମଦାର ପ୍ରଦର୍ଶନ କରୁଛନ୍ତି । ଏହାପରେ ମଧ୍ଯ ତାଙ୍କୁ ଅନ୍ତର୍ଜାତୀୟ ମ୍ୟାଚ୍ ଖେଳିବା ଲାଗି ସୁଯୋଗ ଦିଆଯାଇନାହିଁ । ମାତ୍ର ଏବେ ମୁଖ୍ୟ ଚୟନକର୍ତ୍ତା ପଦରୁ ଅଜିତ ଅଗରକର ହଟିଯାଇଛନ୍ତି । ତାଙ୍କ ସ୍ଥାନରେ ପ୍ରଜ୍ଞାନ ଓଝାଙ୍କୁ ଏହି ଦାୟିତ୍ଵ ଦିଆଯାଇଛି । ଏପରି ସ୍ଥିତିରେ ନ୍ୟୁଜିଲାଣ୍ଡ ବିପକ୍ଷ ଦିନିକିଆ କିମ୍ବା ଟେଷ୍ଟ ସିରିଜରେ କୌଣସି ଏକ ଫର୍ମାଟରେ ସାମିଙ୍କୁ ସୁଯୋଗ ଦିଆଯାଇପାରେ । ଯଦି ସେହି ମ୍ୟାଚରେ ସାମି ଭଲ ପ୍ରଦର୍ଶନ କରନ୍ତି, ତେବେ ସେ ଟିମ୍ ଇଣ୍ଡିଆ ଲାଗି ଉଭୟ ଫର୍ମାଟରେ ଖେଳିପାରନ୍ତି ।