Vaibhav vs Sanju / ସଞ୍ଜୁଙ୍କୁ ଅଣଦେଖା, ବୈଭବଙ୍କୁ ସୁଯୋଗ; ଚୟନକର୍ତ୍ତାଙ୍କ ଉପରେ ବର୍ଷିଲେ ଏହି ପୂର୍ବତନ କ୍ରିକେଟର

ନୂଆଦିଲ୍ଲୀ: ଇଂଲଣ୍ଡ ବିପକ୍ଷ ଟି-୨୦ ସିରିଜରେ ଭାରତୀୟ ଟିମର ଚୟନକୁ ନେଇ ବିବାଦ ଲାଗି ରହିଛି । ଇଂଲିଶ ଟିମଠାରୁ ଭାରତୀୟ ଟିମ ସିରିଜ ହାରିଥିବାବେଳେ ଗତ ମ୍ୟାଚରେ ଏକ ଲଜ୍ଜାଜନକ ପରାଜୟର ସାମ୍ନା କରିଛି । ଏହାରି ମଧ୍ୟରେ ଭାରତର ପୂର୍ବତନ ୱିକେଟକିପର୍ ପାର୍ଥିବ ପଟେଲ ଯୁବ ବ୍ୟାଟ୍ସମ୍ୟାନ୍ ବୈଭବ ସୂର୍ଯ୍ୟବଂଶୀ ଓ ସଞ୍ଜୁ ସାମସନଙ୍କୁ ନେଇ ମତ ପ୍ରକାଶ କରିଛନ୍ତି । ୧୫ ବର୍ଷୀୟ ବୈଭବଙ୍କୁ ସୁଯୋଗ ଦିଆଯାଇଥିବାବେଳେ ସଞ୍ଜୁଙ୍କୁ ଟିମରୁ ବାଦ୍ ଦିଆଯାଇଥିଲା, ଯାହାକୁ ସେ ନାପସନ୍ଦ କରିଛନ୍ତି ।

'ଜିଓଷ୍ଟାର'ରେ କଥାବାର୍ତ୍ତା ସମୟରେ ପାର୍ଥିବ ପଟେଲ ବାର୍ତ୍ତାଳାପ ସମୟରେ କହିଛନ୍ତି ଯେ ବୈଭବ ସୂର୍ଯ୍ୟବଂଶୀଙ୍କୁ ଟିମରେ ସ୍ଥାନ ଦେବା ନିହାତି ଭାବନାତ୍ମକ ରୂପରେ ସଠିକ୍ ହୋଇପାରେ, କିନ୍ତୁ ଯଦି ଚୟନ ପ୍ରକ୍ରିୟାକୁ ତର୍କ ଓ ପ୍ରଦର୍ଶନ ଆଧାରରେ ଦେଖାଯାଏ ତେବେ ସଞ୍ଜୁ ସାମସନଙ୍କୁ ଦଳରୁ ବାଦ୍ ଦିଆଗଲା କାହିଁକି ତାହା ବୁଝାପଡୁନାହିଁ । ଗତ ୧୧ରୁ ୧୨ ବର୍ଷ ଧରି ସଞ୍ଜୁ ସାମସନଙ୍କ ସହିତ ଏପରି ହେଉଛି । ତାଙ୍କ ନିରନ୍ତରତା ବା କନସିଷ୍ଟେନ୍ସି ପାଇଁ ତାଙ୍କୁ ଦଳରୁ ବାଦ ଦିଆଯାଉଥିବା କୁହାଯାଉଛି, ହେଲେ ଏଥର ଯାହା ହେଲା ତାହାର ସ୍ଥିତି ସମ୍ପୂର୍ଣ୍ଣ ଭିନ୍ନ ।

• 'ସବୁବେଳେ ସଞ୍ଜୁ ହିଁ କାହିଁକି'

କ୍ରିକେଟର ପାର୍ଥିବ ପଟେଲ କହିଛନ୍ତି, "ପ୍ରତି ଥର ସଞ୍ଜୁ ସାମସନ କାହିଁକି ଦଳରୁ ବାଦ୍ ପଡୁଛନ୍ତି ? ପୂର୍ବରୁ କୁହାଯାଉଥିଲା ଯେ ସେ ଲଗାତାର ରନ୍ କରୁନାହାନ୍ତି ବା ଦ୍ରୁତ ଗତିରେ ସ୍କୋର ଯୋଡୁ ନାହାନ୍ତି । ମାତ୍ର ଆପଣ ଜଣେ ଖେଳାଳିଙ୍କୁ ଭିନ୍ନ ଭିନ୍ନ ପାରାମିଟରରେ ବିଚାର କରିପାରିବ ନାହିଁ । ବୈଭବ ସୂର୍ଯ୍ୟବଂଶୀଙ୍କୁ ସୁଯୋଗ ଦେବ ଭାବନାଗତ ଦୃଷ୍ଟିରୁ ଠିକ୍ ହୋଇପାରେ କାରଣ ସେ ଜଣେ ପ୍ରତିଭାଶାଳୀ ଯୁବ ଚେହେରା । ମାତ୍ର ଯଦି ଚୟନ ପ୍ରକ୍ରିୟାକୁ ପ୍ରଦର୍ଶନ ଓ ତର୍କ ଉପରେ ଦେଖାଯାଏ ତେବେ ସଞ୍ଜୁଙ୍କୁ ଦଳରୁ ବାହାର କରିବାର କୌଣସି ସଠିକ୍ କାରଣ ନଜର ଆସୁନାହିଁ ।"

• ସଞ୍ଜୁଙ୍କ ସ୍ଥାନରେ ଆସି ବି ବୈଭବ ଫେଲ୍

୧୫ ବର୍ଷୀୟ ବୈଭବ ସୂର୍ଯ୍ୟବଂଶୀଙ୍କୁ ସେତେବେଳେ ଭାରତୀୟ ଟି-୨୦ ଟିମରେ ସ୍ଥାନ ମିଳିଲା, ଯେତେବେଳେ ଟି-୨୦ ବିଶ୍ଵକପର 'ପ୍ଲେୟାର ଅଫ ଦି ଟୁର୍ଣ୍ଣାମେଣ୍ଟ' ହୋଇଥିବା ସଞ୍ଜୁ ସାମସନ ଲଗାତାର ୩ଟି ପାଳିରେ ବଡ଼ ସ୍କୋର କରିବାରେ ବିଫଳ ହୋଇଥିଲେ । ଚୟନକର୍ତ୍ତା ଭବିଷ୍ୟତକୁ ଦୃଷ୍ଟିରେ ରଖି ଯୁବ ବ୍ୟାଟ୍ସମ୍ୟାନ ବୈଭବଙ୍ଗ ଉପରେ ଭରସା କରିଥିଲେ । ମାତ୍ର ଏଯାବତ୍ ବୈଭବ ସେହି ଭରସାକୁ ପ୍ରମାଣିତ କରିବାରେ ଅସଫଳ ରହିଛନ୍ତି । ନିକଟରେ ଭାରତୀୟ ଟିମ ଇଂଲଣ୍ଡ ବିପକ୍ଷ ୫ ମ୍ୟାଚ୍ ବିଶିଷ୍ଟ ସିରିଜକୁ ୦-୩ରେ ହାରିଯାଇଛି । ସିରିଜର ପଞ୍ଚମ ତଥା ଶେଷ ମୁକାବିଲା ଆଜି (ଶନିବାର) ଖେଳାଯିବ ।

• କ୍ରିକେଟ୍ ପ୍ରଶଂସକଙ୍କ ମାନସିକତା କିପରି ରୁହେ ?

ପାର୍ଥିବ ପଟେଲ୍ କ୍ରିକେଟ ପ୍ରଶଂସକଙ୍କ ମାନସିକତା କିପରି ରୁହେ ସେ ସମ୍ପର୍କରେ ଆଲୋଚନା କରିଛନ୍ତି । ସେ କହିଛନ୍ତି ଯେ ଭାରତୀୟ କ୍ରିକେଟରେ ଯେତେବେଳେ କୌଣସି ଖେଳାଳି ଟିମରୁ ବାଦ୍ ପଡ଼େ, ସେତେବେଳେ ତାକୁ ହିଁ ସବୁଠୁ ଭଲ ବିକଳ୍ପ ଭାବି ନିଆଯାଏ । ସେ ଉଦାହରଣ ଦେଇ କହିଥିଲେ ଯେ ଗତ ଟି-୨୦ ବିଶ୍ଵକପରେ ଯେତେବେଳେ ଶ୍ରେୟସ ଆୟର ଟିମରେ ନଥିଲେ ସେତେବେଳେ ସମସ୍ତେ ପଚାରୁଥିଲେ ତାଙ୍କୁ କାହିଁକି ଚୟନ କରାଗଲା ନାହିଁ । ଏବେ ଯେତେବେଳେ ସେ ଟିମରେ ଅଛନ୍ତି ସେତେବେଳେ ଲୋକେ ରଜତ ପଟିଦାରଙ୍କୁ ସୁଯୋଗ ମିଳିବା ଉଚିତ ବୋଲି କହୁଛନ୍ତି । ଏହି ଧାରଣା ସଦାବେଳେ ରୁହେ ଯେ ଯେଉଁ ଖେଳାଳି ଦଳରେ ନାହିଁ, ସେ ଭଲ ପ୍ରଦର୍ଶନ କରୁଛି ।

ପଢନ୍ତୁ ଏହି ଖବର: ଇଂଲଣ୍ଡ ସିରିଜ୍‌ ପରେ ଶେଷ ହେବ କି ଏହି ୩ ଖେଳାଳିଙ୍କ T20 କ୍ୟାରିୟର ? ବାରମ୍ବାର ହେଉଛନ୍ତି ଫେଲ୍‌

ଏଠାରେ କହିରଖୁଛୁ କି, ପାର୍ଥିବ ପଟେଲଙ୍କ ଏପରି ମନ୍ତବ୍ୟ ସେତେବେଳେ ଆସିଛି ଯେତେବେଳେ ବୈଭବ ସୂର୍ଯ୍ୟବଂଶୀ ଓ ସଞ୍ଜୁ ସାମସନଙ୍କୁ ନେଇ କ୍ରିକେଟ ଜଗତରେ ବିଶେଷ ଆଲୋଚନା ହେଉଛି । ଗୋଟିଏ ପଟେ ଭବିଷ୍ୟତକୁ ଦେଖି ଯୁବ ବ୍ୟାଟ୍ସମ୍ୟାନ୍ ବୈଭବଙ୍କୁ ସୁଯୋଗ ଦିଆଯାଉଛି । ଅନ୍ୟପଟେ କେଉଁ ଆଧାରରେ ଖେଳାଳିଙ୍କୁ ଦଳରେ ସ୍ଥାନ ମିଳୁଛି ତାକୁ ନେଇ ବି ଚର୍ଚ୍ଚା ହେଉଛି ।