ହିଟମ୍ୟାନ୍ ରୋହିତ ଶର୍ମା ଆଇପିଏଲ ୨୦୨୬ର ଶୁଭାରମ୍ଭ ଏକ ଦମଦାର ଢଙ୍ଗରେ କରିଛନ୍ତି । ମୁମ୍ବାଇ ଇଣ୍ଡିଆନ୍ସର ଏହି ପୂର୍ବତନ କ୍ୟାପ୍ଟେନ ଦଳର ପ୍ରଥମ ମ୍ୟାଚରୁ ହିଁ ଉତ୍କୃଷ୍ଟ କ୍ରିକେଟ ଖେଳିଛନ୍ତି । ଏହାସହିତ ସେ ନିଜ ନାଁରେ ଏକାଧିକ ରେକର୍ଡ ସୃଷ୍ଟି କରିଛନ୍ତି । ସେ ମାତ୍ର ୨୩ଟି ବଲରେ ଅର୍ଦ୍ଧଶତକ ହାସଲ କରିଛନ୍ତି । ଏହି ପାଳିରେ ହିଟମ୍ୟାନ୍ ଏକ ରେକର୍ଡ ନିଜ ନାଁରେ କରିଛନ୍ତି । ଏହା ତାଙ୍କ ଆଇପିଏଲ କ୍ୟାରିଅରର ସବୁଠୁ ଦ୍ରୁତତମ ଅର୍ଦ୍ଧଶତକ ହୋଇଛି ।

ରୋହିତ ଶର୍ମା ଏହି ମ୍ୟାଚରେ ମୋଟ ୬ଟି ଛକା ମାରିଛନ୍ତି । ହେଲେ କେବଳ ୩ଟି ଛକା ମାରିବା ବେଳେ ସେ ନିଜ ନାଁରେ ଏକ ରେକର୍ଡ ଯୋଡ଼ିଛନ୍ତି । କେକେଆର ବିରୋଧରେ ୩ଟି ଛକା ମାରିବା ସହ ନିଜ କ୍ରିକେଟ କ୍ୟାରିଅର ମଧ୍ୟରେ ୫୫୦ଟି ଛକା ପୂରା କରିଛନ୍ତି । ଏହି ଉପଲବ୍ଧି ସହିତ ଟି-୨୦ କ୍ରିକେଟରେ ୫୦୦ ଛକା ମାରିଥିବା ଖେଳାଳିଙ୍କ ମଧ୍ୟରେ ଏସିଆରୁ ନମ୍ବର-୧ ହୋଇପାରିଛନ୍ତି । ସେହିପରି ପୁରା ଦୁନିଆରୁ ଏହି ରେକର୍ଡ ହାସଲ କରିବାରେ ସେ ନବମ କ୍ରିକେଟର ହୋଇପାରିଛନ୍ତି ।

ଏହାବ୍ୟତୀତ ରୋହିତ ଶର୍ମା କୋଲକାତ ନାଇଟ ରାଇଡର୍ସ ବିରୋଧରେ ନିଜର ମୋଟ ରନ ସ୍କୋର ୧୧୦୦କୁ ପାର କରିଛନ୍ତି । କେକେଆର ବିରୋଧରେ ଏତେ ରନ ହାସଲ କରିବାରେ ସେ ପ୍ରଥମ କ୍ରିକେଟର ହୋଇଛନ୍ତି । ଏହା ପୂର୍ବରୁ ଏହି ତାଲିକାର ପ୍ରଥମରେ ଡେଭିଡ୍ ୱାର୍ଣ୍ଣର ଥିଲେ ।

ପଢନ୍ତୁ ଏହି ଖବର: ରୋହିତଙ୍କ ବ୍ୟାଟରୁ ଛକା-ଚୌକା ବର୍ଷା; ୧୩ ବର୍ଷ ପରେ ଭାଙ୍ଗିଲା ପ୍ରଥମ ମ୍ୟାଚ୍ ପରାଜୟର ଧାରା

ଏହା ସହିତ ହିଟମ୍ୟାନ୍ ରୋହିତ ଶର୍ମା ତାଙ୍କ IPL କ୍ୟାରିୟରରେ ୫୦ତମ ଥର ପାଇଁ ୫୦ ରନ ସ୍କୋର କରିଛନ୍ତି । ଏହି ସଫଳତା ହାସଲ କରିବାରେ ସେ କେବଳ ଚତୁର୍ଥ ଖେଳାଳି ହୋଇଛନ୍ତି । ବିରାଟ କୋହଲିଙ୍କ ପରେ ସେ ଏହି ସଫଳତା ହାସଲ କରିବାରେ କେବଳ ଦ୍ୱିତୀୟ ଭାରତୀୟ ଖେଳାଳି ହୋଇପାରିଛନ୍ତି ।

ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ରୋହିତ ଶର୍ମା ପାୱାରପ୍ଲେ ମଧ୍ୟରେ ତାଙ୍କର ଅର୍ଦ୍ଧଶତକ ପୂରଣ କରିଥିଲେ । ଏହା ତାଙ୍କ ଆଇପିଏଲ କ୍ୟାରିୟରରେ ପ୍ରଥମ ଥର ପାଇଁ ପାୱାରପ୍ଲେରେ ୫୦ ରନ ଥିଲା । ପ୍ରାରମ୍ଭିକ ଓଭରଗୁଡ଼ିକରେ ତାଙ୍କର ଆକ୍ରମଣାତ୍ମକ ବ୍ୟାଟିଂ ମୁମ୍ବାଇ ଇଣ୍ଡିଆନ୍ସକୁ ଏକ ଦୃଢ଼ ଆରମ୍ଭ ଦେଇଥିଲା ଏବଂ କେକେଆର ବୋଲିଂ ଉପରେ ଚାପ ପକାଇଥିଲା । ଫଳରେ ମୁମ୍ବାଇ ଦୀର୍ଘ ୧୩ ବର୍ଷ ପରେ ଆଇପିଏଲ ସିଜିନର ପ୍ରଥମ ମ୍ୟାଚରେ ବିଜୟ ହାସଲ କରିଛି ଏବଂ ପ୍ରଥମ ମ୍ୟାଚ ପରାଜୟ ଧାରାକୁ ଭାଙ୍ଗିଛି ।