Rohit Sharma Viral Video / ‘ମୋତେ ୨୦୨୭ ବିଶ୍ୱକପ୍ ଖେଳିବାର ଅଛି’, ମନର କଥା କହିଦେଲେ ରୋହିତ ଶର୍ମା...ଭିଡିଓ ଭାଇରାଲ୍

ଭାରତୀୟ କ୍ରିକେଟ୍ ଦଳର ଷ୍ଟାର୍ ବ୍ୟାଟ୍ସମ୍ୟାନ୍‌ ରୋହିତ ଶର୍ମାଙ୍କୁ ନେଇ ପୁଣି ଚର୍ଚ୍ଚା ଜୋର୍ ଧରିଛି । ୨୦୨୭ ମସିହାରେ ହେବାକୁ ଥିବା ଦିନିକିଆ ବିଶ୍ୱକପ୍‌ରେ ରୋହିତ ଖେଳିବେ କି ନାହିଁ, ତାକୁ ନେଇ ପୂର୍ବରୁ ଅନେକ ଆଲୋଚନା ହେଉଥିଲା । ଏପରିକି ସେ ଦିନିକିଆ କ୍ରିକେଟ୍‌ରୁ ଅବସର ନେଇପାରନ୍ତି ବୋଲି ମଧ୍ୟ ଚର୍ଚ୍ଚା ହୋଇଥିଲା । କିନ୍ତୁ ଏବେ ତାଙ୍କର ଏକ ଭିଡିଓ ସୋସିଆଲ୍ ମିଡିଆରେ ଭାଇରାଲ୍ ହେବା ପରେ ଏହି ଚର୍ଚ୍ଚା ପୁଣି ତେଜିଛି ।

ରୋହିତ ଶର୍ମା ଏବେ କେବଳ ଦିନିକିଆ ଫର୍ମାଟ୍‌ରେ ଭାରତ ପାଇଁ ଖେଳୁଛନ୍ତି । ସେ ଟେଷ୍ଟ ଏବଂ ଟି-୨୦ ଅନ୍ତର୍ଜାତୀୟ କ୍ରିକେଟ୍‌ରୁ ଅବସର ନେଇସାରିଛନ୍ତି । ଅନ୍ୟପଟେ, ଦିନିକିଆ ଦଳର ଅଧିନାୟକ ପଦରୁ ତାଙ୍କୁ ହଟାଇ ଶୁବମନ ଗିଲ୍‌ଙ୍କୁ ନୂଆ ଅଧିନାୟକ ଦାୟିତ୍ୱ ଦିଆଯାଇଛି । ଆଗାମୀ ୨୦୨୭ ଦିନିକିଆ ବିଶ୍ୱକପ୍‌ରେ ମଧ୍ୟ ଗିଲ୍ ଦଳର ନେତୃତ୍ୱ ନେବେ ବୋଲି ଚର୍ଚ୍ଚା ହେଉଛି ।

ଇଂଲଣ୍ଡ ଗସ୍ତ ସମୟରେ ରୋହିତଙ୍କ ବ୍ୟାଟ୍‌ରୁ ବଡ଼ ସ୍କୋର୍ ନ ଆସିବା ପରେ ତାଙ୍କ ଅବସରକୁ ନେଇ ଅନେକ ଖବର ପ୍ରକାଶ ପାଇଥିଲା । କିନ୍ତୁ ଲର୍ଡସ୍‌ରେ ହୋଇଥିବା ମ୍ୟାଚ୍ ପରେ ସେ ଦିନିକିଆ କ୍ରିକେଟ୍‌ରୁ ଅବସର ନେଇପାରନ୍ତି ବୋଲି ମଧ୍ୟ କୁହାଯାଉଥିଲା । ତେବେ ବିସିସିଆଇ ପକ୍ଷରୁ ସେହି ଖବରକୁ ଖଣ୍ଡନ କରାଯାଇଥିଲା ।

ଭାଇରାଲ୍ ଭିଡିଓରେ କ’ଣ କହିଲେ ରୋହିତ ?

ରୋହିତ ଶର୍ମାଙ୍କ ନିଜସ୍ୱ ଶୋ’ Family Full House with Rohit Sharmaର ଏକ ଭିଡିଓ ଏବେ ଭାଇରାଲ୍ ହେଉଛି । ଏଥିରେ ତାଙ୍କୁ ଏକ ମଜାଦାର ପ୍ରଶ୍ନ ପଚରାଯାଇଥିଲା । ଜରୁରୀ ପରିସ୍ଥିତିରେ ସେ କାହାକୁ ଫୋନ୍ କରିବେ—ଶୁବମନ ଗିଲ୍ ନା ଶ୍ରେୟସ ଆୟର ?

ଏହାର ଉତ୍ତରରେ ରୋହିତ କହିଥିଲେ, “ଦୁହେଁ ଅଧିନାୟକ । ଶୁବମନ ଗିଲ୍ ଏବେ ମୋର ଅଧିନାୟକ । ମୋତେ ୨୦୨୭ ଦିନିକିଆ ବିଶ୍ୱକପ୍ ଖେଳିବାର ଅଛି । ତାକୁ ଖୁସି ରଖିବାକୁ ପଡ଼ିବ ।”

ରୋହିତଙ୍କ ଏହି ମଜାଳିଆ ଉତ୍ତର ଶୁଣିବା ପରେ ଭିଡିଓଟିକୁ ନେଇ କ୍ରିକେଟ୍ ପ୍ରଶଂସକଙ୍କ ମଧ୍ୟରେ ଚର୍ଚ୍ଚା ଆରମ୍ଭ ହୋଇଛି । ବିଶେଷ କରି ୨୦୨୭ ବିଶ୍ୱକପ୍ ଖେଳିବା ନେଇ ରୋହିତଙ୍କ ମନ୍ତବ୍ୟ ସମସ୍ତଙ୍କ ଧ୍ୟାନ ଆକର୍ଷଣ କରିଛି ।

ଟି-୨୦କୁ ଫେରିବା ନେଇ ବି କଲେ ମଜା

ଏହି କଥାବାର୍ତ୍ତା ସମୟରେ ରୋହିତ ଆଉ ଏକ ମଜାଳିଆ କଥା କହିଥିଲେ। ସେ କହିଥିଲେ ଯେ, ୨୦୨୭ ପରେ ଯଦି ଟି-୨୦ କ୍ରିକେଟ୍‌କୁ ଫେରିବାକୁ ପଡ଼େ, ତେବେ ଶ୍ରେୟସ ଆୟରଙ୍କୁ ଖୁସି ରଖିବାକୁ ହେବ ।

ସୂଚନା ଅନୁସାରେ, ରୋହିତ ଶର୍ମାଙ୍କ ଅଧିନାୟକତ୍ୱରେ ଭାରତ ୨୦୨୪ ଟି-୨୦ ବିଶ୍ୱକପ୍ ଜିତିଥିଲା । ଏହା ପରେ ସେ ଟି-୨୦ ଅନ୍ତର୍ଜାତୀୟ କ୍ରିକେଟ୍‌ରୁ ଅବସର ଘୋଷଣା କରିଥିଲେ ।