ଶନିବାର ଏସିଆନ୍ ଗେମ୍ସର ଫାଇନାଲ ମ୍ୟାଚ୍‌ ଖେଳାଯାଉଛି । ଏହି ମ୍ୟାଚ୍‌ରେ ମୁହାଁମୁହିଁ ହେଉଛନ୍ତି ଭାରତ-ପାକିସ୍ତାନ । ଏହି ମ୍ୟାଚ୍‌ରେ ଭାରତୀୟ ଓପନର୍ ବୈଭବ ସୂର୍ଯ୍ୟବଂଶୀଙ୍କଠାରୁ ବଡ଼ ଇନିଂସ୍‌ର ଆଶା ରହିଥିଲା । କିନ୍ତୁ ବୈଭବ ମାତ୍ର ୧୫ ରନ୍‌ରେ ଆଉଟ୍ ହୋଇଥିଲେ । ବୈଭବ ୯ଟି ବଲ୍‌ରେ ୨ଟି ଛକା ସହ ୧୫ ରନ୍ କରିଥିଲେ । ତାଙ୍କୁ ପାକିସ୍ତାନର ଅଫ୍‌ସ୍ପିନର୍ ସାମ ଆୟୁବ ଆଉଟ୍ କରିଥିଲେ ।

ସାମ୍‌ ଆୟୁବଙ୍କ ବଲ୍‌ରେ ବୈଭବ ରିଭର୍ସ ସ୍ୱିପ୍ ଖେଳିବାକୁ ଚେଷ୍ଟା କରିଥିଲେ । କିନ୍ତୁ ଶଟ୍‌ଟି ଠିକ୍ ଭାବେ ବ୍ୟାଟ୍‌ରେ ଲାଗିନଥିଲା । ଆଉ ମାତ୍ର ୧୫ ରନ୍‌ କରି ଆଉଟ୍ ହୋଇଥିଲେ ବୈଭବ ।

ବୈଭବଙ୍କ ୱିକେଟ୍ ପରେ ସାମ ଆୟୁବଙ୍କ ସେଲିବ୍ରେସନ୍ ଚର୍ଚ୍ଚାରେ

ଯୁବ ବ୍ୟାଟ୍ସମ୍ୟାନ୍‌ ବୈଭବ ସୂର୍ଯ୍ୟବଂଶୀଙ୍କୁ ଆଉଟ୍ କରିବା ପରେ ସାମ ଆୟୁବଙ୍କ ସେଲିବ୍ରେସନ୍ ଚର୍ଚ୍ଚାର ବିଷୟ ହୋଇଥିଲା । ଆୟୁବ ଛୋଟ ପିଲାକୁ ଝୁଲାଇବା ଭଳି ଅଭିନୟ କରି ସେଲିବ୍ରେସନ୍ କରିଥିଲେ ।

ବୈଭବଙ୍କ ବୟସ ମାତ୍ର ୧୫ ବର୍ଷ ଏବଂ ତାଙ୍କ ବିସ୍ଫୋରକ ବ୍ୟାଟିଂ ପାଇଁ ତାଙ୍କୁ ‘ବେବି ବସ୍‌’ ବୋଲି ମଧ୍ୟ କୁହାଯାଏ । ତେଣୁ ଆୟୁବଙ୍କ ଏହି ‘କ୍ରାଡଲ୍ ସେଲିବ୍ରେସନ୍’କୁ ବୈଭବଙ୍କ ବୟସ ସହ ଯୋଡ଼ି ଦେଖାଯାଉଛି ।

ମ୍ୟାଚ୍‌ର ଆରମ୍ଭରୁ ବୈଭବ ଆକ୍ରମଣାତ୍ମକ ମନୋଭାବ ଦେଖାଇଥିଲେ । ଦ୍ୱିତୀୟ ଓଭରରେ ସାଦ ମସୁଦଙ୍କ ବିପକ୍ଷରେ ସେ ଲଗାତାର ଦୁଇଟି ଛକା ମାରି ନିଜ ମନୋଭାବ ସ୍ପଷ୍ଟ କରିଥିଲେ । ଭାରତୀୟ ଦଳ ତାଙ୍କଠାରୁ ଏକ ଦ୍ରୁତ ଆରମ୍ଭ ଆଶା କରିଥିଲା । କିନ୍ତୁ ସାମ ଆୟୁବଙ୍କ ଓଭରରେ ନିଆଯାଇଥିବା ଏକ ରିସ୍କ ଶଟ୍ ତାଙ୍କ ଇନିଂସ୍‌ର ଅନ୍ତ ଘଟାଇଥିଲା ।

ୱିକେଟ୍ ନେବା ପରେ ଆୟୁବ ନିଜ ସାଥୀ ଖେଳାଳିଙ୍କ ସହ ଏହାର ସେଲିବ୍ରେସନ୍ କରିଥିଲେ ଏବଂ ସମସ୍ତଙ୍କୁ ଆଲିଙ୍ଗନ କରିଥିଲେ। ତାଙ୍କର କ୍ରାଡଲ୍ ସେଲିବ୍ରେସନ୍ ବୈଭବଙ୍କ ବୟସକୁ ଇଙ୍ଗିତ କରୁଥିବା ଭାବେ ଦେଖାଯାଇଥିଲା ।

ଏଥି ସହ ପଢନ୍ତୁ: ଏସୀୟ କ୍ରୀଡ଼ା… ଅଭିଷେକ-ତିଲକଙ୍କ ଦମଦାର ବ୍ୟାଟିଂ…ପାକିସ୍ତାନକୁ ୨୧୨ ରନର ଟାର୍ଗେଟ ଦେଲା ଭାରତ

ବୈଭବଙ୍କ ଶଟ୍‌ରେ ଅଭିଷେକ ମଧ୍ୟ ନିରାଶ

ବୈଭବ ସୂର୍ଯ୍ୟବଂଶୀ ଆଉଟ୍ ହେବା ପରେ ନନ୍-ଷ୍ଟ୍ରାଇକର୍ ଏଣ୍ଡରେ ଥିବା ଅଭିଷେକ ଶର୍ମାଙ୍କ ପ୍ରତିକ୍ରିୟା ମଧ୍ୟ କ୍ୟାମେରାରେ କଏଦ ହୋଇଥିଲା । ଶଟ୍ ଚୟନରେ ଅଭିଷେକ ଖୁସି ନଥିବା ଭଳି ଦେଖାଯାଇଥିଲେ ଏବଂ ସେ ଡଗ୍‌ଆଉଟ୍ ଆଡ଼କୁ ମୁହଁ କରି ବୈଭବଙ୍କୁ କିଛି ଇସାରା କରୁଥିବା ନଜର ଆସିଥିଲେ ।