India Asia Cup Win / ମହିଳା T20 ଏସିଆ କପ୍ ଟାଇଟଲ ଜିତିଲା ଭାରତ; ପାକିସ୍ତାନର ନକଭିଙ୍କ ହାତରୁ ଟ୍ରଫି ନେବାକୁ ମନାକଲେ

ଦୁବାଇରେ ପାକିସ୍ତାନକୁ ମୁହଁତୋଡ଼ ଜବାବ ଦେଲେ ଭାରତୀୟ ମହିଳା କ୍ରିକେଟ ଦଳ । ଏସିଆ କପ୍ ଟି-୨୦ରେ ଚାମ୍ପିୟନ ହେବା ସତ୍ତ୍ବେ ପାକିସ୍ତାନ ଗୃହମନ୍ତ୍ରୀ ମହସିନ ନକଭିଙ୍କ ହାତରୁ ଟ୍ରଫି ନେବାକୁ ମନା କରିଦେଲେ । ଫଳରେ ପୁଣି ଥରେ ଅନ୍ତର୍ଜାତୀୟ ଗ୍ରାଉଣ୍ଡରେ ଅପଦସ୍ତ ହୋଇଛି ପାକିସ୍ତାନ । କେବଳ ଶ୍ରୀଲଙ୍କାକୁ ରନର ଅପ୍ ଟ୍ରଫି ଦେଇ ପଡ଼ିଆରୁ ଫେରିଗଲେ ମହସିନ । ଅଷ୍ଟମ ଥର ଲାଗି ଟି-୨୦ ଏସିଆ କପ୍ ଟାଇଟଲ ଜିତିଛି ଇଣ୍ଡିଆ। ଏହି ରୋମାଞ୍ଚକର ମହାଲଢ଼େଇରେ ଡିଫେଣ୍ଡିଂ ଚାମ୍ପିଅନ୍ ଶ୍ରୀଲଙ୍କାକୁ ୭୨ ରନ୍‌ରେ ପରାସ୍ତ କରି ଭାରତ ରେକର୍ଡ ସଂଖ୍ୟକ ଅଷ୍ଟମ ଥର ପାଇଁ ଏସିଆ କପ୍ ମୁକୁଟ ନିଜ ନାମରେ କରିଛି ।

• ସେଫାଳୀ ବର୍ମା ଓ ସ୍ମୃତି ମନ୍ଧାନାଙ୍କ ଧୂଆଁଧାର ବ୍ୟାଟିଂ

୨୦୨୪ ଫାଇନାଲ୍ ପରାଜୟର ପ୍ରତିଶୋଧ ନେଇଛି ହରମନପ୍ରୀତ କୌରଙ୍କ ନେତୃତ୍ବାଧୀନ ଟିମ୍ ଇଣ୍ଡିଆ । ଦଳର ଦୁଇ ବିସ୍ଫୋରକ ଓପନର ଶେଫାଳୀ ବର୍ମା ଓ ସ୍ମୃତି ମାନ୍ଧନା ଶ୍ରୀଲଙ୍କା ବୋଲରଙ୍କୁ ନିର୍ଧୁମ ପିଟିଥିଲେ। ଶେଫାଳୀ ମାତ୍ର ୩୯ ବଲ୍‌ରୁ ୯ଟି ଚୌକା ଓ ୨ଟି ଛକା ସହାୟତାରେ ଦ୍ରୁତ ୬୮ ରନ୍ ସଂଗ୍ରହ କରିଥିବା ବେଳେ ସ୍ମୃତି ମାନ୍ଧନା ୫୯ ରନ୍‌ର ଏକ ଦାୟିତ୍ଵପୂର୍ଣ୍ଣ ଇନିଂସ ଖେଳିଥିଲେ । ଉଭୟଙ୍କ ମଧ୍ୟରେ ହୋଇଥିବା ୧୨୯ ରନ୍‌ର ଓପନିଂ ପାର୍ଟନରସିପ୍ ବଳରେ ଭାରତ ନିର୍ଦ୍ଧାରିତ ୨୦ ଓଭରରେ ୫ ୱିକେଟ ହରାଇ ୧୮୩ ରନ୍‌ର ଏକ ବିଶାଳ ସ୍କୋର ଛିଡ଼ା କରିଥିଲା ।

𝗖. 𝗛. 𝗔. 𝗠. 𝗣. 𝗜. 𝗢. 𝗡. 𝗦 🏆

A flawless campaign capped by sheer brilliance 🇮🇳🥳

Congratulations to #TeamIndia on winning the #WomensAsiaCup 👏👏

Scorecard ▶️ https://t.co/knKLXGSfOd #INDvSL pic.twitter.com/O3KaZ0oA3p

— BCCI Women (@BCCIWomen) September 13, 2026

• ଆରମ୍ଭରୁ ନିୟମିତ ୱିକେଟ୍ ହରାଇଥିଲା ଶ୍ରୀଲଙ୍କା

୧୮୪ ରନ୍‌ର ବଡ଼ ବିଜୟ ଲକ୍ଷ୍ୟକୁ ପିଛା କରୁଥିବା ଶ୍ରୀଲଙ୍କା ଦଳ ଆରମ୍ଭରୁ ହିଁ ନିୟମିତ ବ୍ୟବଧାନରେ ୱିକେଟ ହରାଇ ସଙ୍କଟରେ ପଡ଼ିଥିଲା । ଅଧିନାୟିକା ଚାମାରୀ ଆଥାପାଥୁ ସର୍ବାଧିକ ୩୬ ରନ୍ କରିଥିଲେ ମଧ୍ୟ ଅନ୍ୟ କୌଣସି ବ୍ୟାଟର ଭାରତୀୟ ବୋଲିଂ ଆଗରେ ତିଷ୍ଠି ପାରିନଥିଲେ । ଭାରତ ପକ୍ଷରୁ ଘାତକ ବୋଲିଂ କରି ଶ୍ରୀଚରଣୀ ମାତ୍ର ୨୦ ରନ୍ ଦେଇ ୪ଟି ପ୍ରମୁଖ ୱିକେଟ ଅକ୍ତିଆର କରିଥିଲେ ।

ପଢନ୍ତୁ ଏହି ଖବର: ସେମିଫାଇନାଲରେ ହାରିଲା ଦଳ, ପଡ଼ିଆ ମଝିରେ ଭୋ ଭୋ ହୋଇ କାନ୍ଦିଲେ ପାକିସ୍ତାନ କ୍ୟାପ୍‌ଟେନ୍‌

ଦୀପ୍ତି ଶର୍ମା ମଧ୍ୟ ୩ଟି ଗୁରୁତ୍ଵପୂର୍ଣ୍ଣ ୱିକେଟ ନେଇ ଶ୍ରୀଲଙ୍କାର ମେରୁଦଣ୍ଡ ଭାଙ୍ଗି ଦେଇଥିଲେ । ଫଳରେ ଶ୍ରୀଲଙ୍କା ଦଳ ୨୦ ଓଭରରେ ସମସ୍ତ ୱିକେଟ ହରାଇ ମାତ୍ର ୧୧୧ ରନ୍ କରିବାକୁ ସକ୍ଷମ ହୋଇଥିଲା । ଶେଫାଳୀ ବର୍ମାଙ୍କୁ ତାଙ୍କର ଚମତ୍କାର ବ୍ୟାଟିଂ ପାଇଁ 'ପ୍ଲେୟାର ଅଫ୍ ଦି ମ୍ୟାଚ୍' ଘୋଷଣା କରାଯାଇଛି । ଏହି ବିଜୟ ସହିତ ଅଷ୍ଟମ ଥର ପାଇଁ ଏସିଆ କପ୍‌ର ଦଶମ ସଂସ୍କରଣରେ ଟ୍ରଫି ବିଜେତା ହୋଇପାରିଛି ଟିମ୍ ଓମେନ ଇନ୍ ବ୍ଲୁ । ଭାରତୀୟ ମହିଳା ଦଳର ଏହି ଗୌରବମୟ ବିଜୟ ପାଇଁ ସାରା ଦେଶରୁ ଶୁଭେଚ୍ଛାର ସୁଅ ଛୁଟିବାରେ ଲାଗିଛି ।