Sri Lanka All Out / ୦,୦,୦,୦,୦,୦: ଶ୍ରୀଲଙ୍କାର ଅଧା ଟିମ୍ ଖାତା ଖୋଲିପାରିଲାନି, ୧୨୪ ରନ୍‌ରେ ଜିତିଲା ଭାରତ

ଟୋକିଓ: ଏସିଆନ ଗେମ୍ସ ୨୦୨୬ର ଦ୍ଵିତୀୟ ସେମିଫାଇନାଲ ମୁକାବିଲା ଆଜି (ସେପ୍ଟେମ୍ବର ୧) ଭାରତ ଓ ଶ୍ରୀଲଙ୍କା ମଧ୍ୟରେ ଖେଳାଯାଇଥିଲା । ବିପକ୍ଷ ଟିମ ଉପରେ ଭାରି ପଡ଼ିଛନ୍ତି ମେନ୍ ଇନ୍ ବ୍ଲୁ । ଭାରତୀୟ ଟିମ ଶ୍ରୀଲଙ୍କାକୁ ୧୦ କି ୨୦ ରନ୍‌ରେ ନୁହେଁ, ବରଂ ୧୨୪ ରନ୍‌ରେ ପରାସ୍ତ କରିଛି । ଶ୍ରୀଲଙ୍କା ୧୭୦ ରନ୍‌ର ପିଛା କରି ମାତ୍ର ୪୫ ରନ୍‌ରେ ଅଲଆଉଟ୍ ହୋଇଛି । ସବୁଠୁ ବଡ଼ କଥା ହେଉଛି ଶ୍ରୀଲଙ୍କାର ୬ଜଣ ଖେଳାଳି ଶୂନରେ ଆଉଟ୍ ହୋଇଛନ୍ତି । ଭାରତୀୟ ବୋଲରଙ୍କ ଆକ୍ରମଣାତ୍ମକ ବୋଲିଂରେ ଏମାନେ ଖାତା ଖୋଲିପାରିନାହାନ୍ତି ।

• କେଉଁ ୬ ଖେଳାଳି ଶୂନରେ ଅଲଆଉଟ୍ ?

ଖାତା ଖୋଲିନପାରି ଶୂନରେ ପାଭିଲିୟନ ଫେରିଥିବା ଶ୍ରୀଲଙ୍କା ଖେଳାଳିମାନେ ହେଉଛନ୍ତି ସିନେଥ ଜୟବର୍ଦ୍ଧନା, ଲାସିଥ୍ କ୍ରୁସପୁଲ୍,‍ ସୋହନ ଡିଲିଭେରା, ଅଶେନ ବଣ୍ଡାରା ଓ ବିନୁରା ଫର୍ଣ୍ଣାଡୋ । ଏହି ମ୍ୟାଚ୍‌ରେ ବିଜୟକାନ୍ତ ବିୟସକାନ୍ତ ଶୂନ ରନ୍ କରିଛନ୍ତି ସତ, ହେଲେ ସେ ଆଉଟ୍ ହୋଇନଥିଲେ । ୬ଜଣ ଖେଳାଳି ୦ ରନ୍ କରିଥିବାରୁ ଶ୍ରୀଲଙ୍କା ଟିମ୍ ମାତ୍ର ୪୫ ରନ୍‌ରେ ଅଲଆଉଟ୍ ହୋଇଥିଲା । ଯାହାକି ଟି୨୦ ଅନ୍ତର୍ଜାତୀୟ କ୍ରିକେଟରେ ସବୁଠୁ କ୍ଷୁଦ୍ର ସ୍କୋର । ଏହି ମ୍ୟାଚ୍ ପୂର୍ବରୁ ଶ୍ରୀଲଙ୍କା ଟିମ୍ ଟି୨୦ ଅନ୍ତର୍ଜାତୀୟ ମ୍ୟାଚ୍‌ରେ ସବୁଠୁ କମ୍ ସ୍କୋର ଥିଲା ୭୭ । ୨୦୨୪ ଜୁନ ୩ରେ ଆଫ୍ରିକା ବିପକ୍ଷରେ ଏହି ଅଲୋଡା ରେକର୍ଡ କରିଥିଲା ଶ୍ରୀଲଙ୍କା ।

• ଭାରତୀୟ କ୍ରିକେଟରଙ୍କ ଆକ୍ରମଣାତ୍ମକ ବୋଲିଂ

ମ୍ୟାଚ୍ ସମୟରେ ଭାରତୀୟ ବୋଲରଙ୍କ ଜଲୱା ଦେଖିବାକୁ ମିଳିଥିଲା । ଦଳ ଲାଗି ଜସପ୍ରୀତ ବୁମରାହ, ଅକ୍ଷର ପଟେଲ ଓ ଅଭିଷେକ ଶର୍ମା ୨ଟି ଲେଖାଏଁ ୱିକେଟ୍ ନେଇଥିଲେ । ଏମାନଙ୍କ ବ୍ୟତୀତ ୱାଶିଂଟନ ସୁନ୍ଦର ମଧ୍ଯ ଗୋଟିଏ ୱିକେଟ୍ ନେଇଥିଲେ । ମାତ୍ର ରବି ବିଷ୍ଣୋଇଙ୍କୁ ଗୋଟିଏ ବି ୱିକେଟ୍ ମିଳିନାହିଁ ।

📸 𝗠𝗮𝗿𝗰𝗵𝗶𝗻𝗴 𝗶𝗻𝘁𝗼 𝘁𝗵𝗲 𝗙𝗶𝗻𝗮𝗹 🏅

A commanding 1️⃣2️⃣4️⃣-run victory in the semi-final takes #TeamIndia into the Gold Medal match on Saturday 🇮🇳

Scorecard ▶️ https://t.co/DjHV9q6htT#AsianGames pic.twitter.com/kr6h7UlyyG

— BCCI (@BCCI) October 1, 2026

• ଦୁଇ ଅଙ୍କ ରନ୍ କିଏ କଲା ?

ଆଜିର ମ୍ୟାଚ୍‌ରେ ଶ୍ରୀଲଙ୍କା ନାକେଦମ ହୋଇଥିଲା । ଟିମ୍‌ର ମାତ୍ର ଜଣେ ଖେଳାଳି ନୁୱାନିଦୁ ଫର୍ଣ୍ଣାଡୋ ଦୁଇ ଅଙ୍କ ବିଶିଷ୍ଟ ରନ୍ (୧୫) ରନ୍ କରିପାରିଥିଲେ । ଟିମ୍ ଲାଗି ସେ ଚତୁର୍ଥ କ୍ରମରେ ବ୍ୟାଟିଂ କରିବାକୁ ଆସିଥିଲେ ଓ ୧୧ ବଲ୍ ଖେଳି ସେଥିରୁ ୧୫ ରନ୍ ହାସଲ କରିଥିଲେ । ତାଙ୍କ ବ୍ୟତୀତ କ୍ୟାପ୍ଟେନ୍ ସହାନ ଅରାଛିଗୋ ୯ ରନ୍, ଥରିଣ୍ଡୁ ରତ୍ନାୟକେ ୧୫ ବଲ୍ ଖେଳି ୫ ରନ୍ ଏବଂ ଚାମିକା କରୁଣାରତ୍ନେ ୮ ବଲ୍ ଖେଳି ୪ ରନ୍ ହାସଲ କରିଥିଲେ ।

ପଢନ୍ତୁ ଏହି ଖବର: ୨୦୨୭ ODI ବିଶ୍ୱକପ୍ କାର୍ଯ୍ୟସୂଚୀ ତୟାର; ନୋଟ୍ କରନ୍ତୁ ତାରିଖ, ଏହି ଦିନ ଘୋଷଣା କରିବ ICC

• ୧୬୯ ରନ୍ କରିଥିଲା ଭାରତ

ଏହା ପୂର୍ବରୁ ଟସ୍ ହାରି ପ୍ରଥମେ ବ୍ୟାଟିଂ କରିଥିବା ଭାରତୀୟ ଟିମ ମୋଟ ୨୦ ଓଭରରେ ୧୬୯ ରନ୍ ହାସଲ କରିଥିଲା । ଦଳ କେବଳ ୭ ୱିକେଟ୍ ହରାଇଥିଲା । ଈଶାନ କିଷନ ସର୍ବୋଚ୍ଚ ସ୍କୋରର ହୋଇଥିଲେ । ସେ ୪୬ଟି ବଲ୍ ଖେଳି ୮୦ ରନ୍ ହାସଲ କରି ଅର୍ଦ୍ଧଶତକୀୟ ପାଳି ଖେଳିଥିଲେ । ତାଙ୍କ ବ୍ୟତୀତ ଯୁବ ବ୍ୟାଟ୍ସମ୍ୟାନ୍ ବୈଭବ ସୂର୍ଯ୍ୟବଂଶୀ ୨୧ ବଲ୍‌ରେ କେବଳ ୩୮ ରନ୍ ହାସଲ କରିଥିଲେ । ଶ୍ରୀଲଙ୍କାର ବୋଲର ଥରିଣ୍ଡୁ ରତ୍ନାୟକା ଓ ସହାନ ଅରାଛିଗୋ ୨ଟି ଲେଖାଏଁ ୱିକେଟ୍ ନେଇଥିଲେ ।