ଭାରତର ଟି-୨୦ ଅଧିନାୟକ ସୂର୍ଯ୍ୟକୁମାର ଯାଦବ କିଛି ଦିନ ଧରି ଖରାପ ଫର୍ମରେ ଅଛନ୍ତି । ବିଗତ କିଛି ମ୍ୟାଚ୍ ହେବ ତାଙ୍କ ବ୍ୟାଟରୁ ବଡ଼ ସ୍କୋର ଦେଖିବାକୁ ମିଳୁନି । ସେ ଦକ୍ଷିଣ ଆଫ୍ରିକା ବିପକ୍ଷରେ ପାଞ୍ଚ ମ୍ୟାଚ୍ ବିଶିଷ୍ଟ ଟି-୨୦ ସିରିଜରେ ମାତ୍ର ୩୪ ରନ୍ କରିପାରିଥିଲେ । ଏମିତିକି ସେ ୨୦୨୫ରେ ଗୋଟିଏ ବି ଅର୍ଦ୍ଧଶତକୀୟ ଇନିଂସ ଖେଳିପାରିନାହାନ୍ତି । ଏସବୁ ମଧ୍ୟ ତାଙ୍କ ଖରାପ ଫର୍ମ ବିଷୟରେ ତାଙ୍କୁ ଲଗାତାର ପ୍ରଶ୍ନ କରାଯାଉଛି । ନିକଟରେ ସୂର୍ଯ୍ୟଙ୍କୁ ତାଙ୍କ ଫର୍ମକୁ ନେଇ ଏକ ପ୍ରଶ୍ନ କରାଯାଇଥିଲା । ଆଉ ସେ ଉତ୍ତରରେ ଯାହା କହିଲେ ତାହା ସୋସିଆଲ ମିଡିଆରେ ବେଶ୍ ଭାଇରାଲ ହେଉଛି ।

ସମ୍ବାଦ ସରବରାହ ସଂସ୍ଥା ପିଟିଆଇକୁ ଏକ ପ୍ରତିକ୍ରିୟାରେ ସୂର୍ଯ୍ୟକୁମାର ଯାଦବ କହିଛନ୍ତି, "ମୋର ସୁରକ୍ଷା ପାଇଁ ୧୪ ଜଣ ସୈନିକ ଅଛନ୍ତି । ସେମାନେ ଜାଣନ୍ତି ଯେ ଯେତେବେଳେ ମୁଁ ବିସ୍ଫୋରଣ କରିବି କ'ଣ ହେବ । ମୁଁ ବହୁତ ସକାରାତ୍ମକ ଏବଂ କଠିନ ପରିଶ୍ରମ କରୁଛି, ଏବଂ ମୁଁ ନିଶ୍ଚିତ ଯେ ଆପଣମାନେ ସମସ୍ତେ ମଧ୍ୟ ସେହିପରି କରିବେ।" ସୂର୍ଯ୍ୟଙ୍କ ଏହି ବୟାନ ସୋସିଆଲ ମିଡିଆରେ ଭାଇରାଲ ହେଉଛି, ଏବଂ ପ୍ରଶଂସକମାନେ ଏହାକୁ ବହୁଳ ଭାବରେ ସେୟାର କରୁଛନ୍ତି ।

ଅଧିକ ପଢ଼ନ୍ତୁ: ବିଶ୍ବକପ୍‌ ପରାଜୟ ପରେ ଭାଙ୍ଗି ପଡ଼ିଥିଲେ ରୋହିତ, କହିଲେ, 'ମୁଁ ଆଉ କ୍ରିକେଟ୍‌ ଖେଳିବାକୁ ଚାହୁଁନଥିଲି'

ଦକ୍ଷିଣ ଆଫ୍ରିକା ବିପକ୍ଷରେ ଚାରି ଇନିଂସରେ କେବଳ ୩୪ ରନ୍

ସୂର୍ଯ୍ୟକୁମାର ଯାଦବ ଦକ୍ଷିଣ ଆଫ୍ରିକା ବିପକ୍ଷରେ ପାଞ୍ଚ ମ୍ୟାଚ୍ ବିଶିଷ୍ଟ ଟି-୨୦ ସିରିଜର ଚାରି ଇନିଂସରେ ମାତ୍ର ୩୪ ରନ୍ କରିପାରିଥିଲେ । ଦକ୍ଷିଣ ଆଫ୍ରିକା ବିପକ୍ଷ ସିରିଜର ପ୍ରଥମ ମ୍ୟାଚରେ ସୂର୍ଯ୍ୟକୁମାର ଯାଦବ ୧୨ ରନ୍ କରି ଆଉଟ ହୋଇଥିଲେ । କଟକରେ ପ୍ରଥମ ଟି-୨୦ ପରେ ନ୍ୟୁ ଚଣ୍ଡିଗଡ଼ରେ ତାଙ୍କର ଫର୍ମ ଖରାପ ହେବାକୁ ଲାଗିଲା। ଦ୍ୱିତୀୟ ଟି-୨୦ରେ ସେ ୫ ରନ୍ କରି ଆଉଟ୍ ହୋଇଥିଲେ । ପରେ ଧର୍ମଶାଳାରେ ତୃତୀୟ ଟି-୨୦ରେ ସେ ମାତ୍ର ୧୨ ରନ୍ କରିପାରିଥିଲେ। ପରେ ପଞ୍ଚମ ଟି-୨୦ରେ ସେ ମାତ୍ର ୫ ରନ୍ କରିଥିଲେ ।

୨୦୨୫ ସୂର୍ଯ୍ୟକୁମାର ଯାଦବଙ୍କ ପାଇଁ ଏକ ଦୁଃସ୍ୱପ୍ନ ସାବ୍ୟସ୍ତ ହୋଇଛି। ଏହି ବର୍ଷ ଭାରତର ଟି-୨୦ ଅଧିନାୟକଙ୍କ ବ୍ୟାଟିଂ ହାର ୧୪ରୁ କମ୍ ଥିଲା । ସେ ୨୧ ଇନିଂସରେ କେବଳ ୨୧୮ ରନ୍ କରିପାରିଥିଲେ । ୨୦୨୫ରେ ସେ ଗୋଟିଏ ବି ଅର୍ଦ୍ଧଶତକ କରିପାରି ନଥିଲେ।