Surya Kumar Yadav / ଆଜିର ମ୍ୟାଚ୍ ହେବ ଖାସ; କେବଳ ପାଦ ରଖିଲେ ରେକର୍ଡ କରିବେ କ୍ୟାପ୍ଟେନ ସୂର୍ଯ୍ୟ

ଟି-୨୦ ବିଶ୍ଵକପ୍ ୨୦୨୬ରେ ଆଜି ସୁପର ସଣ୍ଡେରେ ଅଛି ସୁପର ମ୍ୟାଚ୍ । ଭାରତ ପାଇଁ ଆଜି 'କର ବା ମର' ସ୍ଥିତି । ୱେଷ୍ଟଇଣ୍ଡିଜ୍ ସହ ମୁହାଁମୁହିଁ ହେବ ଟିମ୍ ଇଣ୍ଡିଆ । ଯିଏ ଜିତିବ ସେ ସିଧାସଳଖ ସେମିଫାଇନାଲ ଖେଳିବ । କୋଲକାତାର ଇଡେନ୍ ଗାର୍ଡେନରେ ଖେଳାଯାଉଥିବା ଏହି ମ୍ୟାଚରେ ଭାରତକୁ ସେମିଫାଇନାଲ ଖେଳିବା ଲାଗି ଯେକୌଣସି ପରିସ୍ଥିତିରେ ୱେଷ୍ଟଇଣ୍ଡିଜକୁ ପରାସ୍ତ କରିବାକୁ ପଡ଼ିବ । ଏହାରି ମଧ୍ୟରେ ଭାରତୀୟ ଅଧିନାୟକ ସୂର୍ଯ୍ୟକୁମାର ଯାଦବ ମୈଦାନକୁ ଓହ୍ଲାଇବା ମାତ୍ରେ ନିଜ ନାଁରେ ଏକ ରେକର୍ଡ ସ୍ଥାପନ କରିବାକୁ ଯାଉଛନ୍ତି ।

ଆଜି କ୍ୟାପ୍ଟେନ ସୂର୍ଯ୍ୟକୁମାର ଯେତେବେଳେ ଇଡେନ୍ ଗାର୍ଡେନ ଗ୍ରାଉଣ୍ଡକୁ ଓହ୍ଲାଇବେ ସେତେବେଳେ ସେ ଭାରତୀୟ ଅଧିନାୟକ ଭାବେ ୫୦ତମ ଟି-୨୦ ଅନ୍ତର୍ଜାତୀୟ ମ୍ୟାଚ୍ ଖେଳିବେ । ଯାହାକି ତାଙ୍କ ପାଇଁ ଅଧିନାୟକ ଭାବେ ଏକ ବଡ଼ ରେକର୍ଡ ହେବାକୁ ଯାଉଛି । ଏହି ତାଲିକାରେ ପୂର୍ବରୁ ମହେନ୍ଦ୍ର ସିଂ ଧୋନି, ରୋହିତ ଶର୍ମା ଓ ବିରାଟ କୋହଲିଙ୍କ ନାଁ ଯୋଡ଼ି ହୋଇସାରିଛି ।

• ତାଲିକାର ଶୀର୍ଷରେ କିଏ ?

ସର୍ବାଧିକ ଟି-୨୦ ଅନ୍ତର୍ଜାତୀୟ ମ୍ୟାଚ୍ ଖେଳିଥିବା ଭାରତୀୟ ଅଧିନାୟକଙ୍କ ତାଲିକାରେ ମହେନ୍ଦ୍ର ସିଂହ ଧୋନି ଶୀର୍ଷରେ ଅଛନ୍ତି । ସେ ୭୨ଟି ମ୍ୟାଚ୍ ଖେଳି ଟିମ୍ ଇଣ୍ଡିଆର ନେତୃତ୍ୱ ନେଇଥିବାବେଳେ ସେଥିରମଧ୍ୟରୁ ୪୧ଟି ମ୍ୟାଚ୍ ଜିତିଥିଲେ । ସେହିପରି ରୋହିତ ଶର୍ମା ଦ୍ୱିତୀୟ ସ୍ଥାନରେ ଅଛନ୍ତି । ସେ ୬୨ଟି ଟି-୨୦ ଅନ୍ତର୍ଜାତୀୟ ମ୍ୟାଚ୍ ଖେଳି ଟିମ୍ ଇଣ୍ଡିଆର ନେତୃତ୍ୱ ନେଇଥିଲେ, ଯେତେବେଳେ ବିରାଟ କୋହଲି ତୃତୀୟ ସ୍ଥାନରେ ଅଛନ୍ତି, ଯିଏ ୫୦ଟି ମ୍ୟାଚ୍ ଖେଳି ଟିମ୍ ଇଣ୍ଡିଆର ଅଧିନାୟକତ୍ୱ କରିଛନ୍ତି ।

ପଢନ୍ତୁ ଏହି ଖବର: ଲାଇଭ୍ ଟିଭିରେ ଟିମ ଇଣ୍ଡିଆକୁ ଚ୍ୟାଲେଞ୍ଜ ! ଦୁଇ ପାକିସ୍ତାନୀ ଖେଳାଳି ମୁହାଁମୁହିଁ

ଭାରତୀୟ ଟିମ ସୁପର-୮ ରାଉଣ୍ଡ ଦକ୍ଷିଣ ଆଫ୍ରିକା ବିପକ୍ଷରେ ପରାଜୟ ସହିତ ଆରମ୍ଭ କରିଥିଲା । ଦକ୍ଷିଣ ଆଫ୍ରିକା ବିରୋଧରେ ୭୬ ରନର ବଡ଼ ପରାଜୟ ଭାରତର ନେଟ୍ ରନ୍ ରେଟକୁ ବିଶେଷ ଭାବରେ ପ୍ରଭାବିତ କରିଥିଲା । ଏହାପରେ ସୂର୍ଯ୍ୟକୁମାରଙ୍କ ବାହିନୀ ଫେବୃଆରୀ ୨୬ ତାରିଖରେ ଜିମ୍ବାୱେ ବିପକ୍ଷରେ ଏକ ଉଲ୍ଲେଖନୀୟ ପ୍ରତ୍ୟାବର୍ତ୍ତନ କରିଥିଲେ । ଭାରତୀୟ ଦଳ ଜିମ୍ବାୱେକୁ ଏକପାଖିଆ ୭୨ ରନରେ ପରାସ୍ତ କରିଥିଲା ।

ଅଭିଷେକ ଶର୍ମା ବ୍ୟାଟ୍ ସହିତ ଉତ୍କୃଷ୍ଟ ଫର୍ମରେ ଥିଲେ, ଟୁର୍ଣ୍ଣାମେଣ୍ଟର ପ୍ରଥମ ଅର୍ଦ୍ଧଶତକ ହାସଲ କରିଥିଲେ । ହାର୍ଦ୍ଦିକ ପାଣ୍ଡ୍ୟା ଏବଂ ତିଲକ ବର୍ମା ମଧ୍ୟ ବ୍ୟାଟ୍ ସହିତ ବିସ୍ଫୋରକ ବ୍ୟାଟିଂ କରି ଗୁରୁତ୍ୱପୂର୍ଣ୍ଣ ଅବଦାନ ଦେଇଥିଲେ । ଅର୍ଶଦୀପ ସିଂହ ମାତ୍ର ୨୪ ରନ ଦେଇ ତିନୋଟି ୱିକେଟ୍ ନେଇଥିଲେ, ଯେତେବେଳେ ବରୁଣ ଚକ୍ରବର୍ତ୍ତୀ ଏବଂ ଅକ୍ଷର ପଟେଲ ମଧ୍ୟ ଦୃଢ଼ ପ୍ରଦର୍ଶନ କରିଥିଲେ ।

ଅଧିକ ଖବର ପଢନ୍ତୁ....