ପ୍ରଥମେ ଆର୍ୟଲାଣ୍ଡ । ଆଉ ଏବେ ଇଂଲଣ୍ଡ । ଲଗାତର ଦୁଇଟି ସିରିଜରେ ପରାଜୟ ବରଣ କରିଛି ଭାରତ । ଟି-୨୦ କ୍ରିକେଟରେ ଟିମ୍‌ ଇଣ୍ଡିଆର ଖରାପ ପ୍ରଦର୍ଶନ ପରେ ଏବେ ବଡ଼ ଝଟକା ଆସିବାକୁ ଯାଉଛି । ଭାରତୀୟ ଦଳ ଭିତରେ ଏକ ବଡ଼ ପରିବର୍ତ୍ତନ ହୋଇପାରେ ବୋଲି ଚର୍ଚ୍ଚା ହେଉଛି । ରିପୋର୍ଟ ଅନୁସାରେ, ଭାରତୀୟ ଦଳର କୋଚିଂ ଷ୍ଟାଫର ଜଣେ ପ୍ରମୁଖ ସଦସ୍ୟ ଖୁବ ଶୀଘ୍ର ଦଳ ଛାଡ଼ିପାରନ୍ତି । ତେବେ କିଏ ସେହି କୋଚ୍‌ ? କାହିଁକି ହେଉଛି ଏହି ବଡ଼ ପରିବର୍ତ୍ତନ, ଆସନ୍ତୁ ଜାଣିବା...

ଟିମ୍ ଇଣ୍ଡିଆର ସପୋର୍ଟ ଷ୍ଟାଫର ଜଣେ ପ୍ରମୁଖ ସଦସ୍ୟ ଖୁବ ଶୀଘ୍ର ନିଜ ପଦ ଛାଡ଼ିପାରନ୍ତି । ତେବେ ସେ କିଏ, ତାଙ୍କ ନାମ ଏପର୍ଯ୍ୟନ୍ତ ସାମ୍ନାକୁ ଆସିନାହିଁ । ସେ ଦଳ ଭିତରେ ମତଭେଦ ଯୋଗୁଁ ଏହି ନିଷ୍ପତ୍ତି ନେଉଛନ୍ତି କିମ୍ବା ଅନ୍ୟ କୌଣସି ଟିମ୍‌ ସହ ଯୋଗ ଦେବାକୁ ଯାଉଛନ୍ତି, ତାହା ମଧ୍ୟ ସ୍ପଷ୍ଟ ହୋଇନାହିଁ ।

ଅଧିକ ପଢ଼ନ୍ତୁ: ସଞ୍ଜୁଙ୍କୁ ଅଣଦେଖା, ବୈଭବଙ୍କୁ ସୁଯୋଗ; ଚୟନକର୍ତ୍ତାଙ୍କ ଉପରେ ବର୍ଷିଲେ ଏହି ପୂର୍ବତନ କ୍ରିକେଟର

ଖବର ଅନୁଯାୟୀ, ସମ୍ପୃକ୍ତ କୋଚଙ୍କ ସହ ଜଣେ IPL ଫ୍ରାଞ୍ଚାଇଜ ଆଲୋଚନା ଜାରି ରଖିଛି । କୁହାଯାଉଛି, ସେହି ଫ୍ରାଞ୍ଚାଇଜର ବିଶ୍ୱର ବିଭିନ୍ନ ଦେଶରେ ଟିମ୍ ରହିଛି । ଏହାକୁ ଦୃଷ୍ଟିରେ ରଖି ଆଗାମୀ ଦିନରେ ଟିମ୍ ଇଣ୍ଡିଆର କୋଚିଂ ଷ୍ଟାଫରେ ଗୋଟିଏ କିମ୍ବା ଦୁଇଟି ବଡ଼ ପରିବର୍ତ୍ତନ ହୋଇପାରେ ବୋଲି ଆଲୋଚନା ଜୋର ଧରିଛି । ଗୌତମ ଗମ୍ଭୀରଙ୍କ ନେତୃତ୍ୱରେ କୋଚିଂ ଷ୍ଟାଫ୍‌ ଜୁଲାଇ ୨୦୨୪ରେ ଦାୟିତ୍ୱ ନେଇଥିଲା । ପରେ ବୋଲିଂ କୋଚ୍ ମର୍ଣ୍ଣି ମୋର୍କେଲ ମଧ୍ୟ ଷ୍ଟାଫରେ ସାମିଲ ହୋଇଥିଲେ । କିନ୍ତୁ ନିକଟରେ ଲଗାତାର ଖରାପ ଫଳାଫଳ ପରେ ଦଳ ଭିତରେ ଚାପ ବଢ଼ିଥିବା ଚର୍ଚ୍ଚା ହେଉଛି ।

ଟିମ୍ ଇଣ୍ଡିଆ ଟି-୨୦ରେ ସଂଘର୍ଷ କରୁଛି

ଆୟର୍ଲାଣ୍ଡ ବିପକ୍ଷ ଦୁଇ ମ୍ୟାଚ୍ ବିଶିଷ୍ଟ ଟି-୨୦ ସିରିଜରେ ଟିମ୍ ଇଣ୍ଡିଆ ଲଜ୍ଜାଜନକ ପରାଜୟ ବରଣ କରିଛି । ଆୟର୍ଲାଣ୍ଡ ପ୍ରଥମ ଥର ପାଇଁ ଭାରତକୁ ପରାସ୍ତ କରିଛି । ଏହା ବ୍ୟତୀତ, ଇଂଲଣ୍ଡ ବିପକ୍ଷ ପାଞ୍ଚ ମ୍ୟାଚ୍ ବିଶିଷ୍ଟ ଟି-୨୦ ସିରିଜରେ ଟିମ୍ ଇଣ୍ଡିଆ ୩-୦ରେ ପଛୁଆ ଅଛି । ଏହି ପରିସ୍ଥିତିରେ କୋଚିଂ ଷ୍ଟାଫରେ ପରିବର୍ତ୍ତନର ଖବର ଟିମ୍ ଭିତରେ ଚାଲିଥିବା ଚାପକୁ ଆହୁରି ସ୍ପଷ୍ଟ କରୁଛି ।