ଯୁବ କ୍ରିକେଟର ବୈଭବ ସୂର୍ଯ୍ୟବଂଶୀଙ୍କ ସଫଳତା ପରେ ଏବେ ତାଙ୍କ ସାନଭାଇ ଆଶୀର୍ବାଦ ସୂର୍ଯ୍ୟବଂଶୀଙ୍କୁ ନେଇ ଚର୍ଚ୍ଚା ଆରମ୍ଭ ହୋଇଛି । କ୍ରିକେଟ ପ୍ରେମୀଙ୍କ ମଧ୍ୟରେ ଆଲୋଚନା ହେଉଛି ଯେ ଆଶୀର୍ବାଦ ମଧ୍ୟ ନିଜ ବଡ଼ ଭାଇ ପରି ବେଶ ପ୍ରତିଭାବାନ୍ ଓ ସେ ବି ଭବିଷ୍ଯତରେ ଜଣେ ଚମତ୍କାର କ୍ରିକେଟର ହେବାକୁ ଯାଉଛନ୍ତି । ଏହି ପ୍ରସଙ୍ଗରେ ବୈଭବଙ୍କ ପିତା ସଞ୍ଜୀବ ସୂର୍ଯ୍ୟବଂଶୀ ଏକ ବଡ଼ ଖୁଲାସା କରିଛନ୍ତି ।

ସଞ୍ଜୀବ ସୂର୍ଯ୍ୟବଂଶୀ କହିଛନ୍ତି, "ଆଶୀର୍ବାଦ ପାଖରେ ମଧ୍ୟ ଅନେକ କ୍ରିକେଟ୍ ପ୍ରତିଭା ଅଛି ଓ ସେ ଲଗାତାର ପରିଶ୍ରମ କରୁଛି । କିନ୍ତୁ ବୈଭବ ସୂର୍ଯ୍ୟବଂଶୀଙ୍କ ତୁଳନା କାହା ସହିତ କରାଯାଇପାରିବ ନାହିଁ । ବୈଭବ ଭିନ୍ନ, କିନ୍ତୁ ଆଶୀର୍ବାଦ ସୂର୍ଯ୍ୟବଂଶୀ ବି ଭଲ ଖେଳେ । ଏବେ ମୁଁ ତା' ଉପରେ ଏତେ ସମୟ ଦେଇପାରୁନାହିଁ । କାରଣ ମୋର ଅଧିକ ଧ୍ୟାନ ବୈଭବର କ୍ରିକେଟ୍ ଓ ତା'ର କାର୍ଯ୍ୟକ୍ରମ ଉପରେ ରହୁଛି । ଏପଟେ କିନ୍ତୁ ଆଶୀର୍ବାଦ ଲଗାତାର ଅଭ୍ୟାସ କରୁଛି ଓ ଭଲ ପ୍ରଦର୍ଶନ ମଧ୍ୟ କରୁଛି ।"

• 'ଆଶୀର୍ବାଦର ବ୍ୟାଟିଂ ଚମତ୍କାର'

ସେ ଆହୁରି କହିଛନ୍ତି ଯେ ଆଶୀର୍ବାଦର ବ୍ୟାଟିଂ ବେଶ ଆକ୍ରମଣାତ୍ମକ । ସେ ବି ବୈଭବ ପରି ବଡ଼ ସଟ୍ ଖେଳିବାର କ୍ଷମତା ରଖିଛି । ସେ ଡାହାଣହାତୀ ବ୍ୟାଟର ଓ ମୈଦାନରେ ଆତ୍ମବିଶ୍ଵାସ ସହିତ ଖେଳିଥାଏ । ତା' ଭିତରେ କ୍ରିକେଟକୁ ନେଇ ଆବେଗ ଅଛି । ପିତା ସଞ୍ଜୀବ ସୂର୍ଯ୍ୟବଂଶୀ କହିଛନ୍ତି ଯେ ଯଦି ଆଶୀର୍ବାଦକୁ ସଠିକ୍ ମାର୍ଗଦର୍ଶନ ଓ ପର୍ଯ୍ୟାପ୍ତ ସମୟ ମିଳେ ତେବେ ସେ ଆଗାମୀ ଦିନରେ ନିଜର ଏକ ସ୍ଵତନ୍ତ୍ର ପରିଚୟ ସୃଷ୍ଟି କରିପାରିବ ।

• '୨ବର୍ଷରେ ଆଶୀର୍ବାଦକୁ ବି ପ୍ରସ୍ତୁତ କରିଦେବି'

କ୍ରିକେଟପ୍ରେମୀମାନେ ଆଗକୁ ଆଶୀର୍ବାଦକୁ ମଧ୍ୟ ଭଲ କ୍ରିକେଟ୍ ଖେଳୁଥିବା ଦେଖିବେ । ଆଗାମୀ ୨ ବର୍ଷ ମଧ୍ୟରେ ଆଶୀର୍ବାଦକୁ ଭଲ କ୍ରିକେଟ ଖେଳିବା ପାଇଁ ସେ ତାକୁ ପ୍ରସ୍ତୁତ କରିଦେବେ ବୋଲି ଗଣମାଧ୍ୟମ ସମ୍ମୁଖରେ କହିଛନ୍ତି । ସେ ଏହା ମଧ୍ୟ କହିଛନ୍ତି ଯେ ବୈଭବଙ୍କ ପରି ପ୍ରତିଭା ବାରମ୍ବାର ମିଳେ ନାହିଁ ।

ପଢନ୍ତୁ ଏହି ଖବର: କିଏ ମାନବ ସୁଥାର ? କଲେ ଟେଷ୍ଟ ଡେବ୍ୟୁ, ରୋ-କୋଙ୍କୁ ବି ଅସୁବିଧାରେ ପକାଇଛନ୍ତି

• 'ବୈଭବ କେବଳ ଜଣେ'

ସାମ୍ବାଦିକମାନଙ୍କ ସହିତ କଥାବାର୍ତ୍ତା ସମୟରେ ଭାବବିହ୍ଵଳ ହୋଇ ପିତା ସୂର୍ଯ୍ୟବଂଶୀ କହିଛନ୍ତି ଯେ ବୈଭବ କେବଳ ଗୋଟିଏ, ଦ୍ଵିତୀୟ ବୈଭବ ତିଆରି ହୋଇପାରିବ ନାହିଁ । ବୈଭବଙ୍କ ପରିଶ୍ରମ, ଖେଳ ଷ୍ଟାଇଲ୍ ଓ ବିଚାରଧାରା ତାଙ୍କୁ ସମସ୍ତଙ୍କଠାରୁ ଅଲଗା କରିଥାଏ । ଆଶୀର୍ବାଦ ଆଗାମୀ ଦିନରେ ନିଜର ସ୍ଵତନ୍ତ୍ର ପରିଚୟ ସୃଷ୍ଟି କରିବ । ବୈଭବ ସୂର୍ଯ୍ୟବଂଶୀଙ୍କୁ ଲଗାତାର ମିଳୁଥିବା ସଫଳତା ଓ ଭାରତୀୟ ଟିମରେ ଚୟନ କରିବା ପରେ ତାଙ୍କ ପରିବାର ଉପରେ ଦେଶବାସୀଙ୍କ ନଜର ରହିଛି । ଏବେ କ୍ରିକେଟପ୍ରେମୀ ବୈଭବଙ୍କ ସାନ ଭାଇ ଆଶୀର୍ବାଦଙ୍କ କ୍ରିକେଟ ଦେଖିବାକୁ ଉତ୍ସାହିତ ଅଛନ୍ତି । ପିତାଙ୍କ ବୟାନରୁ ଜଣାପଡୁ଼ଛି ଯେ ଆଶୀର୍ବାଦଙ୍କ ନିକଟରେ ବି ଭଲ ପ୍ରତିଭା ରହିଛି ଓ ଆଗାମୀ ଦିନରେ ସେ ମଧ୍ୟ କ୍ରିକେଟ ମୈଦାନରେ ନିଜର ଏକ ଛାପ ସୃଷ୍ଟି କରିବାକୁ ଯାଉଛନ୍ତି ।