Virat Test Return / ପୁଣି ଟେଷ୍ଟ କ୍ରିକେଟ୍ ଖେଳିପାରନ୍ତି ବିରାଟ; ଅବସର ଫେରାଇନେବାକୁ ନେଇ ଚର୍ଚ୍ଚା !

କ୍ରିକେଟ୍ ଖେଳର ସବୁଠାରୁ ପୁରୁଣା ଏବଂ ଦୀର୍ଘତମ ସ୍ଵରୂପ ଟେଷ୍ଟ କ୍ରିକେଟକୁ କୁହାଯାଏ । ଏହାକୁ କ୍ରିକେଟ୍ ଖେଳର ପ୍ରକୃତ ପରୀକ୍ଷା ବୋଲି କୁହାଯାଉଥିବାବେଳେ ବିରାଟ କୋହଲି ଭାରତୀୟ ଟେଷ୍ଟ କ୍ରିକେଟର ଜଣେ ଅନ୍ୟତମ ଚର୍ଚ୍ଚିତ ଚେହେରା । ୨୦୨୫ ମେ ୧୨ ତାରିଖରେ ବିରାଟ ଦୀର୍ଘ ୧୪ ବର୍ଷ କ୍ୟାରିଅରକୁ ଅଲବିଦା କହି ଟେଷ୍ଟ କ୍ରିକେଟରୁ ଅବସର ଘୋଷଣା କରିଥିଲେ । ବିରାଟ ଏବେ ବି ଫିଟ୍ ଥିବାବେଳେ କାହିଁକି ହଠାତ୍ ଅବସର ଘୋଷଣା କଲେ ତାକୁ ନେଇ ଚର୍ଚ୍ଚା ହୋଇଥିଲା । କିନ୍ତୁ ଏବେ ସେ ପୁଣି ଥରେ ଏହି ଫର୍ମାଟକୁ ଫେରିପାରନ୍ତି ବୋଲି କୁହାଯାଉଛି ।

ବିରାଟ ଟେଷ୍ଟ କ୍ରିକେଟରୁ ସନ୍ୟାସ ନେବା ପରେ ଭାରତୀୟ ଟିମ ମଧ୍ୟ ଏତେଟା ଭଲ ପ୍ରଦର୍ଶନ କରୁନାହିଁ । ଏଥିଲାଗି ଫ୍ୟାନ୍ସ ବାରମ୍ବାର କିଙ୍ଗ କୋହଲିଙ୍କ ପ୍ରତ୍ୟାବର୍ତ୍ତନ ପାଇଁ ଅନୁରୋଧ କରିଆସୁଛନ୍ତି । ଏବେ କୋହଲିଙ୍କ ପିଲାଦିନର କୋଚ୍ ରାଜକୁମାର ଶର୍ମା ମଧ୍ୟ ତାଙ୍କ କମବ୍ୟାକକୁ ନେଇ ଏକ ବଡ଼ ସଙ୍କେତ ଦେଇଛନ୍ତି ।

• କଣ କହିଲେ କୋହଲିଙ୍କ ପିଲାଦିନର କୋଚ୍ ?

ବିରାଟ କୋହଲିଙ୍କ ପିଲାଦିନର କୋଚ୍ ରାଜକୁମାର ଶର୍ମା ନିକଟରେ ଏକ ଜାତୀୟ ଗଣମାଧ୍ୟମ ସଂସ୍ଥା ସହିତ ଆଲୋଚନା କରିଥିଲେ ଏବଂ କହିଥିଲେ, "ଅନେକ ଲୋକ ମୋତେ କହୁଛନ୍ତି ଯେ ମୁଁ ବିରାଟ କୋହଲିଙ୍କୁ ଟେଷ୍ଟ କ୍ରିକେଟକୁ ଫେରିବା ଲାଗି କହିବି, କାରଣ ସେ ମୋ କଥା ଶୁଣେ ।" ଏହାପରେ ଯେତେବେଳେ ଗଣମାଧ୍ୟମ ତାଙ୍କୁ ପଚାରିଥିଲେ ଯେ ଏ ସମ୍ପର୍କରେ ସେ ବିରାଟଙ୍କ ସହିତ କଥାବାର୍ତ୍ତା କରିଛନ୍ତି କି ନାହିଁ, ତାପରେ ରାଜକୁମାର ଶର୍ମା କହିଥିଲେ, "ଆମେ ଏ ସମ୍ପର୍କରେ କଥାବାର୍ତ୍ତା କରୁଛୁ, ଦେଖିବା ଆଗକୁ କଣ ହେଉଛି ।"

• ୨୦୨୫ ମେ ୧୨ରେ ଭାଙ୍ଗିଥିଲା ଫ୍ୟାନ୍ସଙ୍କ ହୃଦୟ

ଆଇପିଏଲ ୨୦୨୫ ସମୟରେ ମେ ୧୨ ତାରିଖରେ ବିରାଟ କୋହିଲ ଟେଷ୍ଟ କ୍ରିକେଟକୁ ଅଲବିଦା କହିଥିଲେ । ବିରାଟଙ୍କ ଏହି ନିଷ୍ପତ୍ତି ପୁରା କ୍ରିକେଟ ଜଗତକୁ ଆଶ୍ଚର୍ଯ୍ୟ କରିଥିଲା । ବିରାଟଙ୍କ ଫିଟନେସ୍ ଦେଖି ତାଙ୍କୁ ଆଉ କିଛି ବର୍ଷ ଟେଷ୍ଟ କ୍ରିକେଟ ଖେଳିବା ଉଚିତ ଥିଲା ବୋଲି ଫ୍ୟାନ୍ସଙ୍କଠୁ ଆରମ୍ଭ କରି ପୂର୍ବତନ କ୍ରିକେଟର ଓ କ୍ରୀଡା ବିଶେଷଜ୍ଞ ମତ ରଖିଥିଲେ । ତେବେ ପରେ ନିଜ ନିଷ୍ପତ୍ତି ଉପରେ ଖୋଲି କହିଥିଲେ ବିରାଟ । ତାଙ୍କୁ ସେତେବେଳେ ଟିମ ଭିତରେ ନିଜର ସାମର୍ଥ୍ୟର ପ୍ରମାଣ ଦେବା ଲାଗି କୁହାଯାଉଥିଲା, ଯେଉଁଥିରେ ସେ ନିରାଶ ହୋଇଥିଲେ ।

ପଢନ୍ତୁ ଏହି ଖବର: ହାରିଲା ମୁମ୍ବାଇ; ହାର୍ଦ୍ଦିକ ପାଣ୍ଡ୍ୟାଙ୍କ ଉପରେ BCCIର ବଡ଼ ଆକ୍ସନ

• ଅସମ୍ପୂର୍ଣ୍ଣ ଅଛି କୋହଲିଙ୍କ ଟେଷ୍ଟ କ୍ରିକେଟ ସ୍ଵପ୍ନ

କିଙ୍ଗ କୋହଲି ଟେଷ୍ଟ କ୍ରିକେଟରେ ୧୦ ହଜାର ରନ୍ ପୂରଣ କରିବା ଲାଗି ସ୍ବପ୍ନ ରଖିଥିଲେ, ଯାହାକୁ ସେ ପୂରା କରିପାରିନଥିଲେ ଏବଂ ଏହା ପୂର୍ବରୁ ଟେଷ୍ଟ କ୍ରିକେଟରୁ ସନ୍ୟାସ ଘୋଷଣା କରିଥିଲେ । କୋହଲି ନିଜ ୧୪ ବର୍ଷର କ୍ୟାରିଅର ମଧ୍ୟରେ ୧୨୩ଟି ଟେଷ୍ଟ ମ୍ୟାଚ୍ ଖେଳିଥିବାବେଳେ ୪୬.୮୫ ହାରରେ ୯୨୩୦ ରନ୍ କରିଥିଲେ । ଏହି ସମୟରେ ସେ ୩୦ଟି ଶତକ ଓ ୩୧ଟି ଅର୍ଦ୍ଧଶତକ କରିଥିଲେ । ବିରାଟ ଟେଷ୍ଟ ଓ ଟି-୨୦ କ୍ରିକେଟରୁ ସନ୍ୟାସ ନେଇସାରିଥିବାବେଳେ ଏବେ କେବଳ ଦିନିକିଆ ମ୍ୟାଚ୍ ଖେଳୁଛନ୍ତି ।