ଶନିବାର ବିଶାଖାପାଟଣାରେ ଭାରତ-ଦକ୍ଷିଣ ଆଫ୍ରିକା ମଧ୍ୟରେ ODI ସିରିଜର ନିର୍ଣ୍ଣାୟକ ମ୍ୟାଚ୍ ଖେଳାଯିବ । ତିନି ମ୍ୟାଚ୍‌ ବିଶିଷ୍ଟ ଦିନିକିଆ ସିରିଜ୍‌ର ପ୍ରଥମ ମ୍ୟାଚ୍‌ ରାଞ୍ଚିରେ ଖେଳାଯାଇଥିଲା । ଏହି ମ୍ୟାଚ୍‌ରେ ଭାରତ ଦମଦାର ବିଜୟ ହସଲ କରିଥିଲା । ସେହିପରି ଦ୍ବିତୀୟ ମ୍ୟାଚ୍‌ ରାୟପୁରରେ ଖେଳାଯାଇଥିଲା । ସେହି ମ୍ୟାଚ୍‌ରେ ଦକ୍ଷିଣ ଆଫ୍ରିକା ବିଜୟୀ ହୋଇଥିଲା । ଯାହାଫଳରେ ସିରିଜ୍‌ ୧-୧ରେ ବରାବର ହୋଇଛି । ଆଉ ବିଶାଖାପାଟଣା ବାଜି ଯିଏ ଜିତିବ ସେ ସିରିଜ୍‌କୁ ୨-୧ରେ ନିଜ ନାଁରେ କରିବ ।

ଏହି ODI ସିରିଜ୍‌ରେ ବିରାଟ କୋହଲି ଏବଂ ରୋହିତ ଶର୍ମାଙ୍କ ଉପରେ ସମସ୍ତଙ୍କ ନଜର ରହିବ । କିନ୍ତୁ ଭାରତର ଯୁବ ଖେଳାଳିମାନଙ୍କ ଉପରେ ମଧ୍ୟ ଚାପ ରହିବ । କାରଣ ଟିମ୍ ଇଣ୍ଡିଆ ଏକ ଅପମାନଜନକ ସିରିଜ ପରାଜୟକୁ ଏଡାଇବାକୁ ଚେଷ୍ଟା କରିବ । ଯଦି ଭାରତ ରାୟପୁରରେ ହୋଇଥିବା ଖରାପ ପ୍ରଦର୍ଶନକୁ ପୁନରାବୃତ୍ତି କରେ, ତେବେ ଦକ୍ଷିଣ ଆଫ୍ରିକା ୨-୧ରେ ODI ସିରିଜ ଜିତିବ । ପୂର୍ବରୁ ସେମାନେ ଟେଷ୍ଟ ସିରିଜରେ ଭାରତକୁ ୨-୦ରେ ପରାସ୍ତ କରିଛନ୍ତି ।

ବର୍ତ୍ତମାନ ପରିସ୍ଥିତିରେ ଭାରତ ପାଇଁ ଲଗାତାର ଦୁଇଟି ସିରିଜ ହାରିବା ଗ୍ରହଣୀୟ ନୁହେଁ । ବିଶେଷକରି ଯେତେବେଳେ ଡ୍ରେସିଂ ରୁମରେ ବିଭିନ୍ନ ଆଲୋଚନା ଚାଲିଛି । ତେଣୁ ତୃତୀୟ ଦିନିକିଆରେ ବିରାଟ କୋହଲି ଓ ରୋହିତ ଶର୍ମାଙ୍କୁ ପୁଣି ଥରେ ଦଳର ଦାୟିତ୍ୱ ନେବାକୁ ପଡ଼ିବ ।
ଉଭୟ ୫୦ ଓଭର ଫର୍ମାଟରେ ଅସାଧାରଣ ଖେଳାଳି ଏବଂ ଏପରି ପରିସ୍ଥିତିକୁ ମୁକାବିଲା କରିବାରେ ଦକ୍ଷ । ଆଉ ବିଶାଖାପାଟଣାରେ ଦମଦାର ପ୍ରଦର୍ଶନ କରି ସେମାନଙ୍କର ସଫଳତାରେ ଆଉ ଏକ ସୁବର୍ଣ୍ଣ ଅଧ୍ୟାୟ ଯୋଡିବାକୁ ସେମାନେ ଚେଷ୍ଟା କରିବେ ।

ଅଧିକ ପଢ଼ନ୍ତୁ: ଭାରତର ନୂଆ 'ରନ୍‌ ମେସିନ୍‌' ପ୍ରସିଦ୍ଧ କ୍ରିଷ୍ଣା ! ରେକର୍ଡ ଦେଖି ଆପଣ ହୋଇଯିବେ ଆଶ୍ଚର୍ଯ୍ୟ...

ବିରାଟ କୋହଲି ତାଙ୍କ ଶେଷ ତିନୋଟି ଇନିଂସରେ ଦୁଇଟି ଶତକ ଏବଂ ଗୋଟିଏ ଅର୍ଦ୍ଧଶତକ ହାସଲ କରିଛନ୍ତି । ଯେତେବେଳେ ରୋହିତ ତାଙ୍କ ଶେଷ ଚାରି ଇନିଂସରେ ଗୋଟିଏ ଶତକ ଏବଂ ଦୁଇଟି ଅର୍ଦ୍ଧଶତକ ହାସଲ କରିଛନ୍ତି । କିନ୍ତୁ ଉଭୟ ଏହି ସିରିଜ୍‌ ନିର୍ଣ୍ଣାୟକ ମ୍ୟାଚ୍‌ରେ ଯୁବ ଖେଳାଳିଙ୍କଠାରୁ କିଛି ସମର୍ଥନ ମଧ୍ୟ ଆଶା କରିବେ ।

ଦ୍ବିତୀୟ ଦିନିକିଆରେ ଋତୁରାଜ ଗାଏକ୍ବାଡ୍‌ ଦମଦାର ଶତକ ହାସଲ କରି ଫର୍ମକୁ ଫେରିଛନ୍ତି । କିନ୍ତୁ ଯଶସ୍ୱୀ ଜୟସ୍ୱାଲ ଏହି ସିରିଜ୍‌ରେ ଓପନର ଭାବରେ ଏପର୍ଯ୍ୟନ୍ତ ତାଙ୍କର ଲୟ ପାଇନାହାଁନ୍ତି । ଯଦି ଏହି ଧାରା ଜାରି ରହେ ତେବେ ଦଳ ପରିଚାଳନାକୁ ଅନ୍ୟ ବିକଳ୍ପଗୁଡ଼ିକ ବିଚାର କରିବାକୁ ପଡ଼ିପାରେ ।

ବିଶାଖାପାଟଣାର ପିଚ୍‌ ପ୍ରାୟତଃ ବ୍ୟାଟ୍ସମ୍ୟାନଙ୍କୁ ସୁହାଇ ଥାଏ । ସେଠାରେ ଭାରତର ଏକ ଉତ୍କୃଷ୍ଟ ରେକର୍ଡ ରହିଛି । ଭାରତ ୨୦୦୫ ପରଠାରୁ ଖେଳାଯାଇଥିବା ୧୦ଟି ODI ମଧ୍ୟରୁ ୭ଟି ଜିତିଛି । ଯଦିଓ ଅଷ୍ଟ୍ରେଲିଆ ବିପକ୍ଷରେ ଶେଷ ମ୍ୟାଚ୍‌ରେ ପରାଜୟ ବରଣ କରିଥିଲା ।

ତେବେ ତୃତୀୟ ତଥା ଅନ୍ତିମ ମ୍ୟାଚ୍‌ରେ ଭାରତ ୱାଶିଂଟନ ସୁନ୍ଦରଙ୍କୁ ବିଶ୍ରାମ ଦେଇ ମଧ୍ୟକ୍ରମକୁ ମଜବୁତ କରିବା ପାଇଁ ତିଲକ ବର୍ମାଙ୍କୁ ସୁଯୋଗ ଦେଇପାରେ । ଭାରତର ମଧ୍ୟକ୍ରମ ଗତ ଦୁଇଟି ଇନିଂସରେ ଦ୍ରୁତ ଗତିରେ ରନ୍ କରିପାରି ନାହିଁ । ଋଷଭ ପନ୍ତ ମଧ୍ୟ ଏକ ବିକଳ୍ପ ହୋଇପାରନ୍ତି । ଅଧିନାୟକ କେଏଲ ରାହୁଲଙ୍କ ଦ୍ରୁତ ଅର୍ଦ୍ଧଶତକ ଭାରତକୁ ଏକ ସମ୍ମାନଜନକ ସ୍କୋର ଆଡକୁ ନେଇଥିଲା ।

ସେପଟେ ଆଜିର ମ୍ୟାଚ୍‌ରେ ଟିମ୍ ଇଣ୍ଡିଆ ଆଶା କରିବ ଯେ ଯୁବ ଦ୍ରୁତ ବୋଲର ପ୍ରସିଦ୍ଧ କ୍ରିଷ୍ଣା ଏବଂ ହର୍ଷିତ ରାଣା ସେମାନଙ୍କର ପ୍ରଦର୍ଶନରେ ଉନ୍ନତି ଆଣିବେ । ଆଉ ଅର୍ଶଦୀପ ସିଂଙ୍କୁ ଭଲ ସମର୍ଥନ ଯୋଗାଇବେ । ପ୍ରସିଦ୍ଧ କ୍ରିଷ୍ଣା ଏବଂ ହର୍ଷିତ ରାଣା ରାୟପୁର ଦିନିକିଆରେ ବହୁତ ମହଙ୍ଗା ସାବ୍ୟସ୍ତ ହୋଇଥିଲେ ।