ନୂଆଦିଲ୍ଲୀ: ନ୍ୟୁଜିଲାଣ୍ଡ ଓ ୱେଷ୍ଟଇଣ୍ଡିଜ୍ ମଧ୍ୟରେ ୩ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍‌ର ପ୍ରଥମ ମୁକାବିଲା ଖ୍ରୀଷ୍ଟଚର୍ଚ୍ଚରେ ଖେଳା ଯାଇଛି । ଏହି ରୋମାଞ୍ଚକର ଟେଷ୍ଟ ମ୍ୟାଚ ଡ୍ର ରହିଛି । ମୁକାବିଲାରେ ଘରୋଇ ଦଳ ୱେଷ୍ଟଇଣ୍ଡିଜ୍‌ ଆଗରେ ୫୩୧ ରନ୍‌ର ବଡ଼ ବିଜଯ ଲକ୍ଷ୍ୟ ରଖିଥିଲା । ପ୍ରଥମରୁ ଲାଗୁଥିଲା ମ୍ୟାଚ୍‌କୁ ସହଜରେ ଜିତି ନେବ ନ୍ୟୁଜିଲାଣ୍ଡ । କିନ୍ତୁ ୱେଷ୍ଟଇଣ୍ଡିଜର ବ୍ଯାଟ୍ସମ୍ୟାନ୍ ଦ୍ଵିତୀୟ ପାଳିରେ ଯେଭଳି ଖେଳିଲେ ତାକୁ ଅନେକ ବର୍ଷ ଯାଏଁ ମନେ ରଖିବେ ପ୍ରଶଂସକ ।

ଶନିବାର ପଞ୍ଚମ ତଥା ଅନ୍ତିମ ଦିନର ଖେଳ ସରିଛି । ଷ୍ଟମ୍ପ ଅପସାରଣ ସୁଦ୍ଧା ୱେଷ୍ଟଇଣ୍ଡିଜ୍ ୧୬୩,୩ ଓଭରର୍ ୬ ୱିକେଟ୍ ହରାଇ ୪୫୭ ରନ୍ କରିଥିଲା । ମ୍ୟାଚ୍ ବିଜୟ ଠାରୁ ମାତ୍ର ୭୪ ରନ୍ ପଛରେ ରହିଥିଲା ୱେଷ୍ଟଇଣ୍ଡିଜ୍ । ଏହି ମ୍ୟାଚ୍‌କୁ ୱେଷ୍ଟଇଣ୍ଡିଜ୍ ଜିତି ନେଇଥିଲେ ରେକର୍ଡ ହୋଇଯାଇଥାନ୍ତା ।

ଏଥିସହ ପଢ଼ନ୍ତୁ: ମ୍ୟାଚ୍ ଅଧାରୁ ପିଚ୍‌ରେ ଫସିଗଲା ବଲ୍, ବାତିଲ୍ ହେଲା ଖେଳ

ବର୍ତ୍ତମାନ ସୁଦ୍ଧା ଟେଷ୍ଟ କ୍ରିକେଟରେ କୌଣସି ବି ଦଳ ଦ୍ଵିତୀୟ ପାଳିରେ ୫୦୦ରୁ ଅଧିକ ରନ୍ ସ୍କୋର୍ କରି ମ୍ୟାଚ୍ ଜିତି ପାରି ନାହିଁ । ଟେଷ୍ଟ କ୍ରିକେଟ୍‌ରେ ସବୁଠୁ ବଡ଼ ଚେଜ୍ ରେକର୍ଡ ରହିଛି ୱେଷ୍ଟଇଣ୍ଡିଜ୍ ନାଁରେ । ୨୦୦୩ରେ ଅଷ୍ଟ୍ରେଲିଆ ବିପକ୍ଷ ଆଣ୍ଟିଗୋ ଟେଷ୍ଟରେ ୱେଷ୍ଟଇଣ୍ଡିଜ୍ ୪୧୮ ରନ୍‌ର ଟାର୍ଗେଟ୍‌କୁ ସଫଳତାର ସହ ପିଛା କରିଥିଲା ।

ୱେଷ୍ଟଇଣ୍ଡିଜ୍‌ର ଦ୍ଵିତୀୟ ପାଳିରେ ବିସ୍ଫୋରକ ବ୍ଯାଟିଂ କରିଥିବା ଜଷ୍ଟିନ୍ ଗ୍ରୀଭସ୍ ପ୍ଲେୟାର ଅଫ୍ ଦି ମ୍ୟାଚ୍ ବିବେଚିତ ହୋଇଛନ୍ତି । ୩୩୮ ରନ୍‌ରେ ଜଷ୍ଟିନ୍ ଅପରାଜିତ ୨୦୨ ରନ୍ କରିଛନ୍ତି, ଯେଉଁଥିରେ ୧୯ଟି ଚଉକା ସାମିଲ୍ ଅଛି ।

ପ୍ରଥମ ପାଳିରେ ନ୍ୟୁଜିଲାଣ୍ଡ ସମସ୍ତ ୱିକେଟ୍ ହରାଇ ୨୩୧ ରନ୍ କରିଥିଲା । ଜବାବରେ ୱେଷ୍ଟଇଣ୍ଡିଜ୍ ପ୍ରଥମ ପାଳିରେ ସମସ୍ତ ୱିକେଟ୍ ହରାଇ ୧୬୭ ରନ୍ କରିବାରେ ସମର୍ଥ ହୋଇଥିଲା । ଫଳରେ ୬୪ ରନ୍‌ରେ ଆଗୁଆ ଥିବା ନ୍ୟୁଜିଲାଣ୍ଡ ଦ୍ଵିତୀୟ ପାଳି ଖେଳି ଆଉ ୪୬୬ ରନ୍ ଯୋଡ଼ିଥିଲା । ଏଭଳି ଭାବେ ୱେଷ୍ଟଇଣ୍ଡିଜ୍‌କୁ ୫୩୧ ରନ୍‌ର ଟାର୍ଗେଟ୍ ଦେଇଥିଲା ନ୍ୟୁଜିଲାଣ୍ଡ ।

ଏଥିସହ ପଢ଼ନ୍ତୁ: ବାରବାଟୀ ଟି-୨୦: ଆଜି ଆସିବେ ଭାରତୀୟ ଖେଳାଳି, ବିମାନବନ୍ଦରରେ କଡ଼ା ସୁରକ୍ଷା

ଯାହାକୁ ପିଛା କରି ଦ୍ଵିତୀୟ ଇନିଂସରେ ୱେଷ୍ଟଇଣ୍ଡିଜ୍ ପ୍ରାରମ୍ଭିକ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା । ଦ୍ଵିତୀୟ ଇନିଂସରେ ଦଳୀୟ ସ୍କୋର ମାତ୍ର ୭୨ ରନ୍ ହୋଇଥିବା ବେଳେ ଆଉଟ୍ ହୋଇଥିଲେ ୪ ଖେଳାଳି । ଏହାପରେ ଶାଇ ହୋପେ ୧୪୦ ରନ୍‌ର ପାଳି ଖେଳି ଦଳକୁ ମଜଭୁତ୍ ସ୍ଥିତିକୁ ଆଣିଥିଲେ । ଅପରାଜିତ ୨୦୨ ରନ୍ କରି ଶେଷ ପର୍ଯ୍ୟନ୍ତ କ୍ରିଜ୍‌ରେ ରହିଥିଲେ ଜଷ୍ଟିନ୍ ଗ୍ରେଭସ୍ । ତଥାପି ୱେଷ୍ଟଇଣ୍ଡିଜ୍‌କୁ ଷ୍ଟମ୍ପ ସୁଦ୍ଧା ୬ ୱିକେଟ୍ ହରାଇ ୪୫୭ ରନ୍ କରିବାରେ ସମର୍ଥ ହୋଇଥିଲା ।