Phil Hughes death / ନଭେମ୍ବର ୨୭କୁ କାହିଁକି କୁହାଯାଏ କ୍ରିକେଟ୍‌ ଇତିହାସରେ 'କଳା ଦିନ'

୨୭ ନଭେମ୍ବରକୁ କ୍ରିକେଟ ଇତିହାସରେ "କଳା ଦିବସ" ଭାବରେ ବିବେଚନା କରାଯାଏ । ଏହି ଦିନ କ୍ରିକେଟ ଜଗତ ସବୁଦିନ ପାଇଁ ଜଣେ ଉଦୀୟମାନ ତାରକାଙ୍କୁ ହରାଇଥିଲା । ୧୧ ବର୍ଷ ପୂର୍ବେ, ଏହି ଦିନ ଅଷ୍ଟ୍ରେଲୀୟ କ୍ରିକେଟର ଫିଲ୍ ହ୍ୟୁଗ୍ସଙ୍କ ଦେହାନ୍ତ ହୋଇଥିଲା । ମୃତ୍ୟୁର ଦୁଇ ଦିନ ପୂର୍ବରୁ ମ୍ୟାଚ୍ ସମୟରେ ପଡ଼ିଆରେ ବ୍ୟାଟିଂ କରୁଥିବାବେଳେ ହ୍ୟୁଗ୍ସ ଗୁରୁତର ଭାବେ ଆହତ ହୋଇଥିଲେ । ବ୍ୟାଟିଂ କରୁଥିବା ସମୟରେ ହ୍ୟୁଗ୍ସଙ୍କ ବେକରେ ଏକ ବଲ୍ ବାଜିଥିଲା । ଆଉ ସେ ସଙ୍ଗେ ସଙ୍ଗେ ବେହୋସ ହୋଇ ତଳେ ପଡ଼ିଯାଇଥିଲେ । ଆଉ ଏହା ପରେ ସେ କେବେ ଉଠିନଥିଲେ । ସବୁଦିନ ପାଇ ଚିରନିଦ୍ରା ଶୋଇ ପଡ଼ିଥିଲେ । ଏହି ଘଟଣା ସମଗ୍ର କ୍ରୀଡ଼ା ଜଗତକୁ ଚକିତ କରିଥିଲା।

୨୫ ନଭେମ୍ବର, ୨୦୧୪ । ସିଡନୀ କ୍ରିକେଟ୍ ଗ୍ରାଉଣ୍ଡରେ ଦକ୍ଷିଣ ଅଷ୍ଟ୍ରେଲିଆ ଏବଂ ନ୍ୟୁ ସାଉଥ୍ ୱେଲ୍ସ ମଧ୍ୟରେ ଏକ ମ୍ୟାଚ୍‌ ହେଉଥିଲା । ଦକ୍ଷିଣ ଅଷ୍ଟ୍ରେଲିଆର ଅଧିନାୟକ ଜୋହାନ ବୋଥା ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲେ। ୩୦ ନଭେମ୍ବର ଥିଲା ଫିଲ୍ ହ୍ୟୁଗ୍ସଙ୍କ ଜନ୍ମଦିନ । ହ୍ୟୁଗ୍ସ ବିଜୟ ସହିତ ଜନ୍ମଦିନ ଉତ୍ସବ ପାଳନ କରିବାକୁ ଚାହୁଁଥିଲେ । କିନ୍ତୁ ଭାଗ୍ୟର ଥିଲା ଆଉ କିଛି ।

ଅଧିକ ପଢ଼ନ୍ତୁ: 'ବିରାଟ କୋହଲିଙ୍କୁ କଲ୍‌ କରନ୍ତୁ PM ମୋଦି, ଗମ୍ଭୀରଙ୍କ ପୂର୍ବରୁ ଚୟନ କମିଟିକୁ ହଟାଅ'

ଫିଲ୍ ହ୍ୟୁଗ୍ସ ମାର୍କ କସଗ୍ରୋଭଙ୍କ ସହିତ ଇନିଂସ ଆରମ୍ଭ କରିଥିଲେ । ଦୁଇ ଖେଳାଳି ୨୩.୪ ଓଭରରେ ୬୧ ରନର ପାର୍ଟନରସିପ୍‌ କରିଥିଲେ । ତେବେ ୪୯ ତମ ଓଭର ବୋଲିଂ କରିବାକୁ ଆସିଥିଲେ ଦ୍ରୁତ ବୋଲର ସେନ୍‌ ଆବୋଟ୍‌ । ସେ ତାଙ୍କର ପ୍ରଥମ ଓ୍ବିକେଟ୍‌ ନେବା ପାଇଁ ବୋଲିଂ କରୁଥିଲେ । ଆଉ ସେହି ଓଭରର ତୃତୀୟ ବଲ ଫିଲ୍‌ ହ୍ୟୁଗ୍ସଙ୍କ ବେକରେ ବାଜିଥିଲା ।

ଆଉ ସଙ୍ଗେ ସଙ୍ଗେ ହ୍ୟୁଗ୍ସ ଚେତାଶୂନ୍ୟ ହୋଇ ପଡ଼ିଗଲେ । ତାଙ୍କୁ ତୁରନ୍ତ ପଡ଼ିଆରୁ ହସ୍ପିଟାଲ ନିଆଯାଇଥିଲା । ଆଉ ସେଠାରେ ତାଙ୍କୁ ବଞ୍ଚାଇବା ପାଇଁ ସମସ୍ତ ଚେଷ୍ଟା କରାଯାଇଥିଲା । କିନ୍ତୁ ନଭେମ୍ବର ୨୭ ତାରିଖରେ ଏହି ଉଦୀୟମାନ ତାରକାଙ୍କ ଦେହାନ୍ତ ହୋଇଥିଲା।

ଫିଲ୍ ହ୍ୟୁଗ୍ସଙ୍କ ସହିତ ଜଡିତ ଏହି ଘଟଣା ପରେ କ୍ରିକେଟ ଜଗତରେ ଅନେକ ସୁରକ୍ଷା ପରିବର୍ତ୍ତନ କରାଯାଇଥିଲା। ହେଲମେଟକୁ ଅଧିକ ସୁଦୃଢ଼ ​​କରାଯାଇଥିଲା । ବ୍ୟାଟ୍ସମ୍ୟାନଙ୍କ ସୁରକ୍ଷା ପ୍ରତି ଅଧିକ ଧ୍ୟାନ ଦିଆଯାଇଥିଲା ଏବଂ "କନକସନ୍ ବଦଳ" ଭଳି ନୂତନ ନିୟମ କାର୍ଯ୍ୟକାରୀ କରାଯାଇଥିଲା।

ଫିଲ୍ ହ୍ୟୁଗ୍ସ ଅଷ୍ଟ୍ରେଲିଆ ପାଇଁ ୨୬ଟି ଟେଷ୍ଟ ମ୍ୟାଚ୍ ଖେଳିଥିଲେ । ସେ ୩ ଶତକ ଏବଂ ୭ ଅର୍ଦ୍ଧଶତକ ସହିତ ୧,୫୩୫ ରନ୍ କରିଥିଲେ। ୨୫ଟି ଦିନିକିଆରେ ସେ ୨ ଶତକ ଏବଂ ୪ ଅର୍ଦ୍ଧଶତକ ସହିତ ୮୨୬ ରନ୍ କରିଥିଲେ। ହ୍ୟୁଗ୍ସଙ୍କ ମୃତ୍ୟୁ ପରେ କ୍ରିକେଟ୍ ଅଷ୍ଟ୍ରେଲିଆ ତାଙ୍କ ସମ୍ମାନାର୍ଥେ ତାଙ୍କର ଜର୍ସି ନମ୍ବର ୬୪କୁ ଅବସର ଦେଇଥିଲା।