ଟି-୨୦ ବିଶ୍ଵକପ୍ ୨୦୨୬ ପରେ ଏବେ ଟିମ ଇଣ୍ଡିଆ ଏକ ନୂଆ ଆରମ୍ଭ କରିବାକୁ ଯାଉଛି । ଏବେ ସୂର୍ଯ୍ୟ କୁମାର ଯାଦବଙ୍କ ସ୍ଥାନରେ ଅନ୍ୟ କୌଣସି କ୍ରିକେଟରଙ୍କୁ ଅଧିନାୟକ ପଦ ଦିଆଯିବ । ଶ୍ରେୟାସ ଆୟର ଓ ହାର୍ଦ୍ଦିକ ପାଣ୍ଡ୍ୟା ଅଧିନାୟକ ହେବାର ଦୌଡ଼ରେ ଥିଲେ, କିନ୍ତୁ ଏବେ ଆଉ ଏକ ନାଁକୁ ତାଲିକାରେ ସାମିଲ କରାଯାଇଛି । ଏବେ ସୂର୍ଯ୍ୟ କୁମାର ଟି-୨୦ ଅଧିନାୟକ ଅଛନ୍ତି, କିନ୍ତୁ ସେ ଆଇପିଏଲରେ ଖରାପ ପ୍ରଦର୍ଶନ କରିଥିବାରୁ ତାଙ୍କ ହାତରୁ ଅଧିନାୟକ ପଦ ଛଡ଼ାଇ ନିଆଯିବ ବୋଲି ଚର୍ଚ୍ଚା ହେଉଛି ।

ଭାରତୀୟ ଟିମ ଏବେଠାରୁ ୨୦୨୮ ଟି-୨୦ ବିଶ୍ଵକପ୍ ଲାଗି ପ୍ରସ୍ତୁତି ଆରମ୍ଭ କରୁଛି । ଏହି ଗୁରୁତ୍ଵପୂର୍ଣ୍ଣ ଟୁର୍ଣ୍ଣାମେଣ୍ଟକୁ ଧ୍ୟାନରେ ରଖି ଭାରତର ଟି-୨୦ ଟିମରେ ପରିବର୍ତ୍ତନ କରାଯାଉଛି । କିଛି ଦିନ ପୂର୍ବରୁ ଖବର ଆସିଥିଲା ଯେ ଭାରତର ପରବର୍ତ୍ତୀ ଟି-୨୦ ଅଧିନାୟକ ଦୌଡ଼ରେ ସବୁଠୁ ଆଗରେ ଥିଲେ ଶ୍ରେୟାସ ଆୟର । ଏହା ବ୍ୟତୀତ ସଞ୍ଜୁ ସାମସନ ଓ ହାର୍ଦ୍ଦିକ ପାଣ୍ଡ୍ୟାଙ୍କ ନାମ ମଧ୍ୟ ସାମିଲ ଥିଲା । ହେଲେ ଏବେ ଶ୍ରେୟାସ ଆୟରଙ୍କ ନାଁ ଏଥିରି ଯୋଡ଼ି ହୋଇଛି ।

• ଅଧିନାୟକ ଦୌଡ଼ରେ କିଏ ଆଗରେ ?

ଭାରତର ଚମତ୍କାର ୱିକେଟକିପର୍ ତଥା ବ୍ୟାଟ୍ସମ୍ୟାନ ଇଶାନ କିଷାନ ଏବେ ଏହି ଦୌଡ଼ରେ ଆଗରେ ଥିବା କୁହାଯାଉଛି । କିଶାନ ଘରୋଇ କ୍ରିକେଟରେ ଝାଡ଼ଖଣ୍ଡ ଲାଗି ଭଲ କ୍ୟାପ୍ଟେନ୍ସି କରିଥିଲେ ଓ ପ୍ୟାଟ କମିନ୍ସଙ୍କ ଅନୁପସ୍ଥିତିରେ ସେ ସନରାଇଜର୍ସ ହାଇଦ୍ରାବାଦ (SRH)ର ମଧ୍ୟ କମାଣ ସମ୍ଭାଳିଥିଲେ । ଏଥିଲାଗି ତାଙ୍କ ନାଁ ଭାରତର ଟି-୨୦ ଅଧିନାୟକ ତାଲିକାରେ ଯୋଡ଼ି ହୋଇଥିବାବେଳେ ସେ ଜଣେ ପ୍ରମୁଖ ଚେହେରା ଅଛନ୍ତି ।

• ଏମାନଙ୍କୁ ଟିମରେ ମିଳିବ କି ସ୍ଥାନ ?

ଆଇସିସି ଚମ୍ପିଆନ୍ ଟ୍ରଫି ୨୦୨୫ ଜିତିବା ପରେ ବିସିସିଆଇ ରୋହିତ ଶର୍ମାଙ୍କୁ ଅଧିନାୟକ ପଦରୁ ହଟାଇ ଦେଇଥିଲା ସତ କିନ୍ତୁ ସେ ଭଲ ଫର୍ମରେ ଥିବାରୁ ଜଣେ ଖେଳାଳି ଭାବେ ଟିମରେ ରହିଥିଲେ । ରୋହିତଙ୍କ ପରେ ଶୁଭମନ ଗିଲଙ୍କୁ ଟିମ ଇଣ୍ଡିଆର ନୂଆ ଅଧିନାୟକ ଭାବେ ଦାୟିତ୍ଵ ଦିଆଯାଇଥିଲା । କିଛି ଏପରି ଆମକୁ ଟି-୨୦ରେ ମଧ୍ୟ ଦେଖିବାକୁ ମିଳିପାରେ । ସୂର୍ଯ୍ୟକୁମାର ଖରାପ ଫର୍ମରେ ଥିବାରୁ ତାଙ୍କୁ ଅଧିନାୟକ ପଦରୁ ହଟାଇବା ପରେ ଟିମରେ ସ୍ଥାନ ମିଳିବ କି ନାହିଁ ସେ ନେଇ ସ୍ପଷ୍ଟ ସୂଚନା ମିଳିନାହିଁ ।

ପଢନ୍ତୁ ଏହି ଖବର: ମୁମ୍ବାଇ ଇଣ୍ଡିଆନ୍ସକୁ ଅନଫଲୋ କଲେ କି ହାର୍ଦ୍ଦିକ ପାଣ୍ଡ୍ୟା ? ଜଣାପଡ଼ିଲା ସତ

ତେବେ ଏହା ସମ୍ପୂର୍ଣ୍ଣ ଭାବେ ଚୟନକର୍ତ୍ତାଙ୍କ ଉପରେ ନିର୍ଭର କରେ । ଏହା ମଧ୍ୟ କୁହାଯାଉଛି ଯେ ସୂର୍ଯ୍ୟ କୁମାର ଯାଦବଙ୍କ ହାତରେ ଆଘାତ ଅଛି, କିନ୍ତୁ ଏଯାବତ ସେ ଏହାକୁ ସାର୍ବଜନୀନ କରିନାହାନ୍ତି । ବିସିସିଆଇ ଟି-୨୦ ଫର୍ମାଟ ଲାଗି ସର୍ବପ୍ରଥମେ ଶୁଭମନ ଗିଲଙ୍କୁ ନଜରରେ ରଖିଥିଲା, କିନ୍ତୁ ଖରାପ ଫର୍ମ ପାଇଁ ସେ ହଟିଥିଲେ । ଏବେ ଇଶାନ କିଶାନଙ୍କୁ ବଡ଼ ଦାୟିତ୍ଵ ମିଳିପାରେ ବୋଲି ଚର୍ଚ୍ଚା ହେଉଛି ।