Jaiswal Breaks Silence / ଶ୍ରୀଲଙ୍କା ଖେଳାଳିଙ୍କ ସହ ମୁହାଁମୁହିଁ; କଣ ହୋଇଥିଲା କହିଲେ ଯଶସ୍ଵୀ ଜୈସୱାଲ..

କଲୋମ୍ବୋ: ଭାରତ ଓ ଶ୍ରୀଲଙ୍କା ମଧ୍ୟରେ କଲୋମ୍ବୋ ଟେଷ୍ଟରେ ହଙ୍ଗାମା । ମୁହାଁମୁହିଁ ହୋଇଥିଲେ ଯଶସ୍ଵୀ ଜୈସୱାଲ ଓ ଶ୍ରୀଲଙ୍କା ବୋଲର ଆସିଥା ଫର୍ଣ୍ଣାଣ୍ଡୋ । ସେମାନେ ଏତେ ନିକଟତର ହୋଇଥିଲେ ଯେ ଯେପରି ଲାଗିଲା ଦୁହେଁ ପରସ୍ପରକୁ ମାଡ଼ ମାରିବେ । ହେଲେ ସେମିତି କିଛି ଘଟିବା ପୂର୍ବରୁ ଶ୍ରୀଲଙ୍କା ଅଧିନାୟକ ଉଭୟଙ୍କୁ ଅଟକାଇଥିଲେ । ଏବେ ପୂରା ଘଟଣା ମୈଦାନରୁ ସିଧା ସୋସିଆଲ ମିଡିଆରେ ପହଞ୍ଚିଛି । ହର୍ଷ ଭୋଗଲେ ଜୈସୱାଲଙ୍କ ଉପରେ ଟିପ୍ପଣୀ ରଖିବା ଯଶସ୍ଵୀଙ୍କୁ ପସନ୍ଦ ଆସିନାହିଁ । ସେ ସିଧା ଏହା ଉପରେ ଜବାବ ରଖିଛନ୍ତି ।

ହର୍ଷ ଭୋଗଲେଙ୍କ ଟିପ୍ପଣୀ ଉପରେ ପ୍ରତିକ୍ରିୟା ରଖି ଯଶସ୍ଵୀ କହିଛନ୍ତି ଯେ ଯଦି ତାଙ୍କୁ ସଠିକ୍ ଭାବେ ଜଣାନାହିଁ ଯେ ମୈଦାନରେ ପ୍ରକୃତରେ କଣ ଘଟିଥିଲା, ତେବେ କୌଣସି ନିଷ୍କର୍ସ ଉପରେ ପହଞ୍ଚିବା ଉଚିତ ନୁହେଁ । ଏହାପରେ ଯଶସ୍ଵୀ କହିଥିଲେ ଯେ ଯଦି କିଏ ସୀମା ଲଙ୍ଘିବ, ତେବେ ଭାରତୀୟ କ୍ରିକେଟର ତାକୁ ଛାଡ଼ିବେ ନାହିଁ ।

• ମୈଦାନରେ କଣ ଘଟିଥିଲା ?

ଯଶସ୍ଵୀ ଜୈସୱାଲ ଯେତେବେଳେ ୪୫ ରନ୍ କରିଥିଲେ, ସେତେବେଳେ ଶ୍ରୀଲଙ୍କାର ଦ୍ରୁତ ବୋଲର ଫର୍ଣ୍ଣାଣ୍ଡୋ ତାଙ୍କୁ ବୋଲ୍ଡ କରିଥିଲେ । ୱିକେଟ୍ ନେବା ପରେ ଫର୍ଣ୍ଣାଣ୍ଡୋ ବେଶ ଆକ୍ରମଣାତ୍ମକ ଢଙ୍ଗରେ ସେଲିବ୍ରେସନ କରିଥିଲେ । ଏହାପରେ ବି ଯଶସ୍ଵୀ ଚୁପଚାପ୍ ପାଭିଲିୟନ ଆଡ଼କୁ ଯାଉଥିଲେ । ହେଲେ ଠିକ୍ ଏହି ସମୟରେ ଫର୍ଣ୍ଣାଣ୍ଡୋ ଏପରି କିଛି କମେଣ୍ଟ କରିଥିଲେ, ଯାହାଫଳରେ ଜୈସୱାଲ କ୍ରୋଧିତ ହୋଇଥିଲେ ଓ ଉଭୟଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା ।

• ହର୍ଷ ଭୋଗଲେ କଣ କହିଲେ ?

ଯଶସ୍ଵୀ ଜୈସୱାଲ ଶ୍ରୀଲଙ୍କା ବୋଲରକୁ ପାଲଟା ଜବାବ ଦେବାକୁ ନେଇ କମେଣ୍ଟେଟର ହର୍ଷ ଭୋଗଲେ ଆଦୌ ଖୁସି ନଥିଲେ । ସେ କହିଥିଲେ ଯେ ଆଉଟ୍ ହେବାପରେ ଜୈସୱାଲଙ୍କୁ ପାଲଟା ଜବାବ ଦେବା ବଦଳରେ ପାଭିଲିୟନକୁ ଆଡକୁ ଆଗକୁ ବଢିବାର ଥିଲା । ଏହାପରେ କ୍ରିକବଜ୍‌ ଭୋଗଲେଙ୍କ ଏହି ଭିଡିଓକୁ ନିଜ ଇନଷ୍ଟାଗ୍ରାମରେ ପୋଷ୍ଟ କରିଥିଲା ଓ କ୍ୟାପସନରେ ଲେଖିଥିଲା, "କଣ ଜୈସୱାଲ ସୀମା ଲଙ୍ଘିଥିଲେ ?"

ପଢନ୍ତୁ ଏହି ଖବର: ପଡିକ୍କଲଙ୍କ ବ୍ୟାଟ୍‌ରେ ଧମାକା; ମୈଦାନରେ ଚୌକା ବର୍ଷା, ଲଗାତାର ସେଞ୍ଚୁରୀ, ନମ୍ବର-୩ର ଟେନସନ ଗଲା

• ପ୍ରକୃତରେ କଣ ଘଟିଥିଲା କହିଲେ ଜୈସୱାଲ

ଏହାପରେ ଜୈସୱାଲ ନିଜେ ଏହି ପୋଷ୍ଟର କମେଣ୍ଟ ସେକ୍ସନରେ ଭୋଗଲେଙ୍କ ରାୟ ଉପରେ ଜବାବ ରଖିଛନ୍ତି । ଯଶସ୍ଵୀ ଲେଖିଛନ୍ତି, "ଯଦି ଆପଣଙ୍କୁ ଜଣାନାହିଁ ଶ୍ରୀଲଙ୍କା ବୋଲର କଣ କହିଥିଲେ ତେବେ ଦୟାକରି ନିଜର ମତ ରଖନ୍ତୁ ନାହିଁ । ଯଦି କିଏ ସୀମା ଲଙ୍ଘୁଛି ତେବେ ଆମକୁ ତାକୁ ଜଣାଇବାକୁ ହେବ । ଏଇଟା ଭାରତ..ଆମେ ଲଢିବୁ ଓ ଜବାବ ମଧ୍ୟ ଦେବୁ ।" ଏଥିରୁ ଗୋଟିଏ କଥା ସ୍ପଷ୍ଟ ହୋଇଛି ଯେ ଯଶସ୍ଵୀ ଆଉଟ୍ ହେବା ପରେ ଫର୍ଣ୍ଣାଣ୍ଡୋଙ୍କ ସେଲିବ୍ରେସନକୁ ନେଇ ଚିଡିନଥିଲେ, ବରଂ ସେମାନେ କିଛି ଉସୁକାଇବା ପରେ କମେଣ୍ଟ କରିଥିଲେ । ଫଳରେ ଯଶସ୍ଵୀ ପାଲଟା ଜବାବ ଦେଇଥିଲେ । ହେଲେ ଶ୍ରୀଲଙ୍କା ବୋଲର ତାଙ୍କୁ କଣ କହିଥିଲେ, ସେ ନେଇ ଯଶସ୍ଵୀ ସ୍ପଷ୍ଟ କରିନାହାନ୍ତି ।