ଭାରତ ସରକାରଙ୍କ ସାଇବର ସିକ୍ୟୁରିଟି ଏଜେନ୍ସି CERT-In ପକ୍ଷରୁ କୋଟି କୋଟି କ୍ରୋମ୍ ୟୁଜରଙ୍କୁ ଏକ ବଡ଼ ଚେତାବନୀ ଜାରି କରାଯାଇଛି । ଯଦି ଆପଣ ବି କ୍ରୋମ ବ୍ରାଉଜର ବ୍ୟବହାର କରୁଛନ୍ତି ତେବେ ଏବେ ସାବଧାନ ରହିବା ଜରୁରୀ, ନଚେତ ଆପଣଙ୍କୁ ପଶ୍ଚାତାପ କରିବାକୁ ପଡ଼ିବ । ଏପରିକି ଆପଣଙ୍କ ବ୍ୟାଙ୍କ ଆକାଉଣ୍ଟ ମଧ୍ୟ ଖାଲି ହୋଇପାରେ । କାରଣ ଏବେ ସାଇବର ଅପରାଧଙ୍କ ନଜରରେ ରହିଛି କ୍ରୋମ୍ । ସାଇବର ଠକମାନେ ଆପଣଙ୍କ ବ୍ୟକ୍ତିଗତ ତଥ୍ୟ ମଧ୍ୟ ଚୋରି କରିପାରନ୍ତି ।

କମ୍ପ୍ୟୁଟର ଇମରଜେନ୍ସି ରେସପନ୍ସ ଟିମ (CERT-In) ଭାରତ ସରକାରଙ୍କ ଏକ ସାଇବର ସୁରକ୍ଷା ଏଜେନ୍ସି, ଯାହାକି ସାଇବର ଆକ୍ରମଣ ଓ ଅନଲାଇନ ବିପଦ ଉପରେ ନିରନ୍ତର ଭାବେ ନଜର ରଖିଥାଏ । ଏଜେନ୍ସିର କହିବାନୁଯାୟୀ, କ୍ରୋମ ବ୍ରାଉଜରରେ ଅନେକ ସିକ୍ୟୁରିଟି ବଗ୍ସ ଦେଖିବାକୁ ମିଳିଛି । ଏହି ଦୁର୍ବଳତାର ସୁଯୋଗ ନେଇ ହ୍ୟାକରମାନେ ଆପଣଙ୍କ କମ୍ପ୍ୟୁଟର କିମ୍ବା ମୋବାଇଲରେ ପ୍ରବେଶ କରିପାରନ୍ତି । ଏହି ବିପଦ ସେତେବେଳେ ବଢିଯାଏ, ଯେତେବେଳେ ଆପଣ କୌଣସି ଖରାପ ୱେବସାଇଟ୍ କିମ୍ବା ସନ୍ଦିଗ୍ଧ ଲିଙ୍କ ଉପରେ କ୍ଲିକ୍ କରୁଛନ୍ତି । ଥରେ ହ୍ୟାକରମାନେ ଆପଣଙ୍କ ଡିଭାଇସରେ ପ୍ରବେଶ କଲେ, ସେମାନେ ଆପଣଙ୍କ ତଥ୍ୟ ଓ ବ୍ୟାଙ୍କ ଆକାଉଣ୍ଟ ପର୍ଯ୍ୟନ୍ତ ପହଞ୍ଚିପାରନ୍ତି ।

• କେଉଁ ପ୍ରକାରର ବିପଦ ରହିଛି ?

ଏହି ସୁରକ୍ଷା ସମ୍ବନ୍ଧୀୟ ଦୁର୍ବଳତାର ସୁଯୋଗ ନେଇ ହ୍ୟାକର ବା ସାଇବର ଠକମାନେ ଚୁପଚାପ୍ ଆପଣଙ୍କ ଫୋନର ଆକ୍ସେସ ପାଇପାରନ୍ତି । ଏହାପରେ ସେମାନେ ଆପଣଙ୍କ ଫୋନ୍ କିମ୍ବା କମ୍ପ୍ୟୁଟରର ପାସୱାର୍ଡ, ବ୍ୟାଙ୍କ ତଥ୍ୟ ଓ ଅନ୍ୟ ବ୍ୟକ୍ତିଗତ ତଥ୍ୟକୁ ଚୋରି କରିପାରନ୍ତି । ଖାଲି ଏତିକି ନୁହେଁ, ଠକମାନେ ଆପଣଙ୍କ ଡିଭାଇସରେ ବିପଦପୂର୍ଣ୍ଣ ସଫ୍ଟୱେର ଇନଷ୍ଟଲ୍ ମଧ୍ୟ କରିପାରନ୍ତି, ଯାହାଦ୍ଵାରା ସେମାନେ ମୋବାଇଲରେ ଆପଣଙ୍କ ଗତିବିଧି ଉପରେ ନଜର ରଖିପାରିବେ । ଏପରିକି ଆପଣଙ୍କ କ୍ୟାମେରା, ମାଇକ୍ରୋଫୋନର ଆକ୍ସେସ ବି ହ୍ୟାକର୍ସ ହାସଲ କରିପାରନ୍ତି ।

• କେମିତି ରହିବେ ସୁରକ୍ଷିତ ?

ଏହି ବିପଦରୁ ବର୍ତ୍ତିବା ନିହାତି ଜରୁରୀ, ନଚେତ ଆପଣଙ୍କ ବ୍ୟକ୍ତିଗତ ତଥ୍ୟ ଚୋରି ହୋଇପାରେ । ଏହାପରେ ଯଦି ହ୍ୟାକରମାନଙ୍କ ହାତରେ ଆପଣଙ୍କର କୌଣସି ସମ୍ବେଦନଶୀଳ ତଥ୍ୟ ଲାଗିଯାଏ, ଏହାପରେ ହ୍ୟାକରମାନେ ଆପଣଙ୍କୁ ବ୍ଲାକମେଲିଂ କରିପାରନ୍ତି । ଏହାସହିତ ଆପଣଙ୍କ ଅସହାୟତାର ସୁଯୋଗ ନେଇ ଆପଣଙ୍କୁ ବାଧ୍ୟ କରି ଅନେକ କାମ କରାଇପାରନ୍ତି । ଏଥିରୁ ବର୍ତ୍ତିବା ଲାଗି ସର୍ବପ୍ରଥମେ ଆପଣଙ୍କ Chrome ବ୍ରାଉଜରକୁ ତୁରନ୍ତ ଅପଡେଟ୍ କରନ୍ତୁ ।

ପଢନ୍ତୁ ଏହି ଖବର: ଅନଲାଇନରେ ନେଣଦେଣ କରୁଥିଲେ ସାବଧାନ, ଲୁଟ ହେଲାଣି ୭୧୧ କୋଟିରୁ ଅଧିକ ଟଙ୍କା

ଏଥିଲାଗି ଆପଣଙ୍କ ମୋବାଇଲରେ ଥିବା Google Play Storeକୁ ପ୍ରଥମେ ଯାଇ Updateକୁ ଯାଆନ୍ତୁ ଏବଂ କ୍ରୋମ୍ ବ୍ରାଉଜରକୁ ଅପଡେଟ୍ କରିନିଅନ୍ତୁ । ନୂଆ ଅପଡେଟରେ ପୁରୁଣା ସିକ୍ୟୁରିଟି ଦୁର୍ବଳତା ହଟିଯାଇଥାଏ । ଯଦି ଆପଣ ଏବେ ବି କ୍ରୋମର ପୁରୁଣା ଭର୍ସନକୁ ବ୍ୟବହାର କରୁଛନ୍ତି, ତେବେ ତୁରନ୍ତ ଅପଡେଟ୍ କରାଇନିଅନ୍ତୁ ଏବଂ ଆପଣଙ୍କ ସିରକ୍ଷାକୁ ସୁନିଶ୍ଚିତ କରନ୍ତୁ । ଏହାଦ୍ଵାରା ଆପଣ ବଡ଼ ଠକେଇରୁ ନିଜକୁ ରକ୍ଷା କରିପାରିବେ ।