ହ୍ୱାଟ୍ସଆପ୍ ୱେବ୍ କିମ୍ବା ହ୍ୱାଟ୍ସଆପ୍ ଡେସ୍କଟପ୍ ବ୍ୟବହାର କରୁଥିଲେ ସାବଧାନ । ଜାରି ହେଲା ନୂତନ ସାଇବର ଚେତାବନୀ । ସାଇବର ସୁରକ୍ଷା କମ୍ପାନୀ କାସ୍ପରସ୍କି (Kaspersky) ଏକ ମାଲୱେର ଷଡ଼ଯନ୍ତ୍ରର ପର୍ଦ୍ଦାଫାସ କରିଛି, ଯେଉଁଥିରେ ଆକ୍ରମଣକାରୀମାନେ ହ୍ୱାଟ୍ସଆପ୍ ମାଧ୍ୟମରେ ବିପଜ୍ଜନକ ଫାଇଲ୍ ପଠାଇ ଲୋକଙ୍କୁ ଟାର୍ଗେଟ କରୁଛନ୍ତି । ଏହି ସାଇବର ଆକ୍ରମଣ କେବଳ ଗୋଟିଏ ଦେଶ ପର୍ଯ୍ୟନ୍ତ ସୀମିତ ନୁହେଁ, ଏହି ଅଭିଯାନ ଅନେକ ଦେଶରେ ସକ୍ରିୟ ଥିବା ଜଣାପଡ଼ିଛି । ମାଲେସିଆରେ ସର୍ବାଧିକ ସଂଖ୍ୟକ ମାମଲା ରିପୋର୍ଟ ହୋଇଛି ।

• ଏମିତି ଫୋନକୁ ଆସୁଛି ମେସେଜ୍

ସାଇବର ଅପରାଧୀମାନେ ପୂର୍ବରୁ ଚୋରି ହୋଇଥିବା ହ୍ୱାଟସଆପ୍ ଆକାଉଣ୍ଟକୁ ବ୍ୟବହାର କରୁଛନ୍ତି । ଏହି କାରଣରୁ ୟୁଜର ମେସେଜଗୁଡ଼ିକୁ ଅଜଣା ନମ୍ବରରୁ ନୁହେଁ ବରଂ ସେମାନଙ୍କ ଜଣାଶୁଣା ବ୍ୟକ୍ତିଙ୍କଠାରୁ ଆସୁଛି ବୋଲି ଭାବିପାରନ୍ତି, ଯାହା ଫଳରେ ଲୋକମାନେ ଠକାମିର ଶିକାର ହେବା ସହଜ ହୋଇଯାଏ । କାସ୍ପରସ୍କିର ଗ୍ଲୋବାଲ୍ ରିସର୍ଚ୍ଚ ଆଣ୍ଡ୍ ଆନାଲିସିସ୍ ଟିମ୍ (GReAT) ଜାଣିପାରିଛି ଯେ ଆକ୍ରମଣକାରୀମାନେ ହ୍ୱାଟ୍ସଆପରେ ସିଧାସଳଖ ମେସେଜ୍ ମାଧ୍ୟମରେ ନକଲି ଆଟାଚମେଣ୍ଟ୍ ପଠାଉଛନ୍ତି । ଏହି ଫାଇଲଗୁଡ଼ିକୁ ଗୁରୁତ୍ୱପୂର୍ଣ୍ଣ ବ୍ୟବସାୟିକ ଡକ୍ୟୁମେଣ୍ଟ ପରି ଦେଖାଯାଉଛି ।

• ଏହି ନାଁରେ ପଠାଯାଉଛି ଫାଇଲ୍

ସାଇବର ଅପରାଧୀମାନେ Invoice, Bank Statement, Account Statement ଓ Debt Notice ଭଳି ନାମ ସହିତ ଆଟାଚମେଣ୍ଟ ପଠାଉଛନ୍ତି । ଏହି ନାମଗୁଡ଼ିକ ବ୍ୟବହାରକାରୀଙ୍କୁ ବିଶ୍ୱାସ କରାଏ ଯେ ଫାଇଲଟି ପ୍ରକୃତ ଏବଂ ଗୁରୁତ୍ୱପୂର୍ଣ୍ଣ, କିନ୍ତୁ ଏହା ପଛରେ ବିପଦଜନକ ମାଲୱେର୍ ଲୁଚି ରହିଛି । ଜଣେ ବ୍ୟବହାରକାରୀ ଏପରି ଫାଇଲ୍ ଖୋଲିବା ମାତ୍ରେ, ମାଲୱେର୍ ଡିଭାଇସରେ ସକ୍ରିୟ ହୋଇଯାଏ । ଏହା ପରେ ସିଷ୍ଟମରେ ଅତିରିକ୍ତ କ୍ଷତିକାରକ ଫାଇଲ୍ ଡାଉନଲୋଡ୍ ହୋଇ ତଥ୍ୟ ଚୋରି କରିବା ଆରମ୍ଭ କରେ ।

• କେଉଁ ଦେଶରେ ସବୁଠାରୁ ଅଧିକ ମାମଲା ?

କମ୍ପାନୀ ଅନୁଯାୟୀ, ଏହି ଅଭିଯାନର ସର୍ବାଧିକ ସଂଖ୍ୟକ ମାମଲା ମାଲେସିଆ, ବ୍ରାଜିଲ, ସିଙ୍ଗାପୁର, ତାଇୱାନ ଏବଂ ଭିଏତନାମରେ ରିପୋର୍ଟ କରାଯାଇଛି । ଏଗୁଡ଼ିକ ମଧ୍ୟରେ ମାଲେସିଆ ସବୁଠାରୁ ଅଧିକ ପ୍ରଭାବିତ ଦେଶ ହୋଇଛି । କାସପରସ୍କି କହିଛି ଯେ ୟୁରୋପ ସମେତ ଅନ୍ୟାନ୍ୟ ଅଞ୍ଚଳର ବ୍ୟବହାରକାରୀଙ୍କୁ ମଧ୍ୟ ଟାର୍ଗେଟ କରାଯାଉଛି ।

ପଢନ୍ତୁ ଏହି ଖବର: Ola ଓ Revoltକୁ ଦେବ ଟକ୍କର; ଥରେ ଚାର୍ଜ କଲେ ୨୫୦KM ଯିବ ଏହି ଇ-ବାଇକ୍

• ଫାଇଲ୍ ଖୋଲିବା ପରେ କ'ଣ ହୁଏ?

ରିପୋର୍ଟ ଅନୁଯାୟୀ, କରପ୍ଟ ଫାଇଲ୍ ଖୋଲିବା ଦ୍ୱାରା ଡିଭାଇସ୍‌ରେ ଏକ ସ୍କ୍ରିପ୍ଟ ଚାଲେ । ଏହା ପରେ Windows Script Host ମାଧ୍ୟମରେ ଅନ୍ୟ ସ୍କ୍ରିପ୍ଟ ଫାଇଲ୍‌ଗୁଡ଼ିକୁ ଡାଉନଲୋଡ୍ ଏବଂ କାର୍ଯ୍ୟକାରୀ ହୁଏ, ଯାହା ଫଳରେ ସାଇବର ଅପରାଧୀମାନେ ସିଷ୍ଟମ୍‌ରେ ପ୍ରବେଶ କରିପାରନ୍ତି । ରିମୋଟ୍ ଆକ୍ସେସ୍ ପ୍ରଯୁକ୍ତିବିଦ୍ୟା ସାଧାରଣତଃ IT ସମର୍ଥନ ଏବଂ ସିଷ୍ଟମ୍ ପରିଚାଳନା ପାଇଁ ବ୍ୟବହୃତ ହୁଏ । ତଥାପି ହ୍ୟାକର୍ସ ସିଷ୍ଟମ୍‌ର ନିୟନ୍ତ୍ରଣ ହାସଲ କରିବା ପାଇଁ ଏହି ଫିଚରକୁ ବ୍ୟବହାର କରିପାରିବେ।

• ଏହି ଫାଇଲ୍ ଏକ୍ସଟେନ୍‌ସନଠୁ ସତର୍କ ରୁହନ୍ତୁ

ହ୍ୱାଟସଆପରେ ପ୍ରାପ୍ତ ହୋଇଥିବା କୌଣସି ସନ୍ଦିଗ୍ଧ ଆଟାଚମେଣ୍ଟକୁ ଖୋଲିବା ପାଇଁ କାସ୍ପରସ୍କି ପରାମର୍ଶ ଦିଏ ନାହିଁ, ଯଦିଓ ସେଗୁଡ଼ିକ ଏକ ଜଣାଶୁଣା ଆକାଉଣ୍ଟରୁ ଆସିଛି । ବିଶେଷକରି, .vbs, .vbe, .exe, .bat, .cmd, .js, ଏବଂ .ps1 ଏକ୍ସଟେନସନ ସହିତ ଫାଇଲଗୁଡ଼ିକୁ ଖୋଲିବା ପୂର୍ବରୁ ଭଲ ଭାବରେ ଯାଞ୍ଚ କରନ୍ତୁ ।