Fake WhatsApp Alert / ଆପଣଙ୍କ ଫୋନରେ ନାହିଁ ତ ନକଲି WhatsApp; ୫ ଲକ୍ଷ କରିଛନ୍ତି ଡାଉନଲୋଡ୍

ନୂଆଦିଲ୍ଲୀ: ମେଟାର ଲୋକପ୍ରିୟ ଇନଷ୍ଟାଣ୍ଟ ମେସେଜିଂ ପ୍ଲାଟଫର୍ମ ହ୍ଵାଟ୍ସଆପ୍ ବେଶ ଲୋକପ୍ରିୟ ହୋଇଛି । ପ୍ରତିଦିନ କଥାବାର୍ତ୍ତାଠାରୁ ଆରମ୍ଭ କରି ଅଫିସ୍ କାମରେ ମଧ୍ୟ ଏହି ଆପ୍‌ର ବହୁଳ ବ୍ଯବହାର ହେଉଛି । ଏହି ଆପ୍‌କୁ ନେଇ ଆସିଛି ଏକ ଗୁରୁତ୍ଵପୂର୍ଣ୍ଣ ଖବର । ଗୁଗୁଲ୍ ପ୍ଲେ ଷ୍ଟୋରରେ ନକଲି ହ୍ଵାଟ୍ସଆପ୍ ଦେଖିବାକୁ ମିଳିଛି, ଯାହାକୁ ୫ ଲକ୍ଷ ଲୋକ ଡାଉଲୋଡ୍ କରିଛନ୍ତି । ତୁରନ୍ତ ଆପ୍‌କୁ ଡିଲିଟ୍ ନକଲେ ୟୁଜରଙ୍କ ପାଇଁ ବିପଦ ରହିଛି ।

ପ୍ଲେ ଷ୍ଟୋରରେ ହ୍ଵାଟ୍ସଆପ୍ ସର୍ଚ୍ଚ କରିବା ପରେ ଅରିଜିନାଲ୍ ଆପ୍ ଉପରେ ଆଉ ଏକ ଆପ୍ ଦେଖିବାକୁ ମିଳିଛି । ଯାହାକି ଅବିକଳ ଅସଲି ଆପ୍‌ ପରି ଦିଶୁଛି । ଏଥିଲାଗି ଅନେକ ଲୋକ ନକଲି ଆପ୍‌କୁ ଡାଉନଲୋଡ୍ କରିନେଇଛନ୍ତି । ଫେକ୍ ହ୍ଵାଟ୍ସଆପ୍ ସମ୍ପର୍କରେ ସର୍ବପ୍ରଥମେ ଜଣେ ରେଡିଟ୍ ୟୁଜର ଜଣାଇଥିଲେ । ଏନେଇ ଅକ୍ଟୋବର ୧୬ ତାରିଖରେ ଏକ ରିପୋର୍ଟ ପ୍ରକାଶ ପାଇଥିଲା । କିଛି ଗଣମାଧ୍ୟମ ରିପୋର୍ଟ ଅନୁସାରେ ଏହି ନକଲି ଆପ୍ WhatsApp Messenger ନାଁରେ ଲିଷ୍ଟ୍ ହୋଇଥିଲା ଏବଂ ଏହାକୁ Agment Assets Sallu ନାମକ ଜଣେ ଡେଭଲପର ପବ୍ଲିସ କରିଥିଲା। ତେବେ ପ୍ଲେ ଷ୍ଟୋରରେ ଏହି ପବ୍ଲିସରର ଅନ୍ୟ କୌଣସି ଗୋଟିଏ ବି ଆପ୍ ନାହିଁ ।

• ଫେକ୍ ଆପ୍‌ରେ ଅସଲି ପରି ଫଟୋ

ହ୍ଵାଟ୍ସଆପ୍ ପରି ଏହି ନକଲି ଆପ୍‌ର ନାମ, ଆଇକନ ଓ ଅନ୍ୟ ଭିଜୁଆଲ ଅରିଜିନାଲ ଆପ୍ ପରି । ଏଥିଲାଗି ଅନେକ ୟୁଜର ଅସଲି ଓ ନକଲି ମଧ୍ୟରେ ପ୍ରଭେଦ ଜାଣିପାରିନଥିଲେ । ଗୁଗଲ୍ ପ୍ଲେ ଷ୍ଟୋରରେ ମେଟାର ଅରିଜିନାଲ ହ୍ଵାଟ୍ସଆପ୍କୁ WhatsApp LLC ପବ୍ଲିସ କରିଛି । ଅରିଜିନାଲ ଆପ୍‌କୁ ୧୦ ବିଲିୟନରୁ ଅଧିକ ଜଣ ଡାଉନଲୋଡ୍ କରିଛନ୍ତି ।

• Play Store ଆପ୍‌ରେ ନକଲି ଆପ୍‌ କେମିତି ଚିହ୍ନିବେ ?

ଗୁଗଲ୍ ପ୍ଲେ ଷ୍ଟୋରରେ ଅନେକ ଆପ୍ ରହିଛି, ଯେଉଁଥିରେ କିଛି ନକଲି ଆପ୍‌ ମଧ୍ୟ ଅଛି । ତଥାପି ଗୁଗୁଲ୍ ନିୟମିତ ଭାବରେ ତାର ନୀତି ଅନୁଯାୟୀ ବିପଦଜନକ ଆପ୍ସକୁ ହଟାଇଥାଏ । ଏବେ ପ୍ରଶ୍ନ ଉଠୁଛି ପ୍ଲେ ଷ୍ଟୋରରେ ନକଲି ଆପ୍ସକୁ କିପରି ଚିହ୍ନଟ କରିବେ । ଏକ ନକଲି ଆପ୍ ଚିହ୍ନଟ କରିବା ପାଇଁ ଏହାର ପ୍ରକାଶକ କିମ୍ବା ଡେଭଲପରଙ୍କ ନାମ ଯାଞ୍ଚ କରିବା ଗୁରୁତ୍ୱପୂର୍ଣ୍ଣ । WhatsApp ଡାଉନଲୋଡ୍ କରିବା ପୂର୍ବରୁ ଡେଭଲପରଙ୍କ ନାମ ଯାଞ୍ଚ କରନ୍ତୁ, ଯାହା WhatsApp LLC ଅଟେ ।

ପଢନ୍ତୁ ଏହି ଖବର: ଆକାଶରେ ଉଡ଼ିବ, ୧ ସେକେଣ୍ଡରେ ଧରିବ ୧୦୦କିମି ସ୍ପିଡ୍...ମାର୍କେଟକୁ ଆସିଲା ଉଡନ୍ତା କାର

• ରିଭ୍ୟୁ ଯାଞ୍ଚ କରନ୍ତୁ

ଅସଲି ଏବଂ ନକଲି ଆପ୍ ମଧ୍ୟରେ ପାର୍ଥକ୍ୟ ଜାଣିବା ପାଇଁ ରିଭ୍ୟୁ ଯାଞ୍ଚ କରିବା ଗୁରୁତ୍ୱପୂର୍ଣ୍ଣ । ରିଭ୍ୟୁଗୁଡ଼ିକ କେତେ ପୁରୁଣା ତାହା ଦେଖନ୍ତୁ । ଯଦି ଆପଣ ଗୋଟିଏ ସପ୍ତାହ ମଧ୍ୟରେ ୫-ଷ୍ଟାର୍ ଥିବା ରିଭ୍ୟୁ ଦେଖନ୍ତି, ତେବେ ଏହାକୁ ବିଶ୍ଵାସ କରନ୍ତୁ ନାହିଁ । ଯଦି ନକାରାତ୍ମକ ରିଭ୍ୟୁ ଅଛି ତେବେ ଏହାକୁ ଡାଉନଲୋଡ୍ କରନ୍ତୁ ନାହିଁ । ଏହାବ୍ୟତୀତ ଗୁଗୁଲ୍ ପ୍ଲେ ଷ୍ଟୋର ଏବଂ ଆପଲ୍‌ର ଆପ୍ ଷ୍ଟୋରରୁ ଆପ୍ସ ଇନଷ୍ଟଲ୍ କରିବା ପୂର୍ବରୁ ସର୍ବଦା ଡାଉନଲୋଡ୍ କରନ୍ତୁ। ଅଜଣା ଷ୍ଟୋରରୁ ଆପ୍ସ ଡାଉନଲୋଡ୍ କରନ୍ତୁ ନାହିଁ ।