First iPhone Customer / ଭାରତରେ ପ୍ରଥମେ କିଏ କିଣିଥିଲା ଆଇଫୋନ ଓ କେବେ ? ଦାମ ଶୁଣି ଆଶ୍ଚର୍ଯ୍ୟ ହେବେ

ନୂଆଦିଲ୍ଲୀ: ଆଇଫୋନକୁ ନେଇ ଏବେ ସାରା ବିଶ୍ଵରେ କ୍ରେଜ୍ ଦେଖିବାକୁ ମିଳିଛି । ବିଶେଷ କରି ଯୁବପିଢିମାନେ ଆଇଫୋନ ଧରିବାକୁ ପସନ୍ଦ କରୁଛନ୍ତି । ଆଇଫୋନକୁ ନେଇ ମଧ୍ୟ ଜଣେ ବ୍ୟକ୍ତିର ଆର୍ଥିକ ସ୍ଥିତିକୁ ବିଚାର କରାଯାଉଛି । ପ୍ରତିବର୍ଷ ଆଇଫୋନ ନିର୍ମାତା କମ୍ପାନୀ ଆପଲ୍ ନୂଆ ମଡେଲର ଆଇଫୋନ ଲଞ୍ଚ କରୁଥିବାବେଳେ ଏହାକୁ କିଣିବାକୁ ରାତି ଅଧରୁ ଷ୍ଟୋର ଆଗରେ ଲାଗୁଛି ଲମ୍ବା ଲାଇନ୍ । ଭାରତୀୟମାନଙ୍କ ମଧ୍ୟରେ ବି ଆଇଫୋନକୁ ନେଇ କ୍ରେଜ୍ ରହିଛି । ଏପରିକି ସେଲିବ୍ରିଟିଙ୍କଠାରୁ ସୋସିଆଲ ମିଡିଆ ଇନଫ୍ଲୁଏନ୍ସର ଆଇଫୋନ ବ୍ୟବହାର କରୁଛନ୍ତି ।

ଗତକାଲି (ସେପ୍ଟେମ୍ବର ୯) ସାରା ବିଶ୍ଵରେ ଲଞ୍ଚ ହୋଇସାରିଛି ନୂଆ ଆଇଫୋନ ୧୮ ସିରିଜ୍ । ଚଳିତ ବର୍ଷ ଆପଲ୍ ନିଜର ପ୍ରଥମ ଫୋଲ୍ଡେବଲ୍ ଆଇଫୋନ iPhone Duo ମଧ୍ୟ ଲଞ୍ଚ କରିଛି । ସେପ୍ଟେମ୍ବର ୧୨ ତାରିଖରୁ ଆଇଫୋନର ପ୍ରି-ଅର୍ଡର ଆରମ୍ଭ ହେବାକୁ ଥିବାବେଳେ ସେପ୍ଟେମ୍ବର ୧୮ ତାରିଖରୁ ଏହାର ବିକ୍ରି ଭାରତରେ ଆରମ୍ଭ ହେବ । ତେବେ ଆପଣ ଜାଣନ୍ତି କି ଭାରତରେ ପ୍ରଥମେ କେଉଁ ମଡେଲର ଆଇଫୋନ ଲଞ୍ଚ ହୋଇଥିଲା ଓ କେଉଁ ଭାରତୀୟ ଏହି ଦାମି ଫୋନକୁ କିଣିଥିଲେ ?

• ଭାରତକୁ କେବେ ଲଞ୍ଚ ହୋଇଥିଲା ପ୍ରଥମ ଆଇଫୋନ ?

ଆଇଫୋନର ନୂଆ ସିରିଜ ଭାରତରେ ଲଞ୍ଚ ହୋଇସାରିଥିବାବେଳେ ଅନେକଙ୍କ ମନରେ ଏହି ପ୍ରଶ୍ନ ମଧ୍ୟ ଆସିଛି ଯେ ଭାରତରେ କେବେ ଆଇଫୋନ ପ୍ରଥମେ ଲଞ୍ଚ ହୋଇଥିଲା, ଏହାର ଦାମ କେତେ ଥିଲା ଓ କେଉଁ ଭାରତୀୟ ଏହାର ପ୍ରଥମ ଗ୍ରାହକ ଥିଲେ ? ତେବେ ଏଠାରେ କହିରଖୁଛୁ କି, ଭାରତରେ ପ୍ରଥମ ଆଇଫୋନ ବର୍ଷ ୨୦୦୮ରେ ଲଞ୍ଚ ହୋଇଥିଲା । ପ୍ରଥମ ଆଇଫୋନକୁ ଜଣେ ମହିଳା ଗ୍ରାହକ କିଣିଥିଲେ, ଯାହାଙ୍କ ନାମ ଥିଲା ସ୍ଵାତୀ ଓ ସେ ଜଣେ ଛାତ୍ରୀ ଥିଲେ । ଯେତେବେଳେ ସେ ଜାଣିବାକୁ ପାଇଥିଲେ ଯେ ଆଇଫୋନ ଭାରତରେ ଲଞ୍ଚ ହୋଇଛି, ସେ ପ୍ରଥମେ ଗୁରୁଗ୍ରାମର ସହାରା ମଲ୍ ଯାଇ କିଣିଥିଲେ ।

• ଭାରତରେ କେଉଁଠି ବିକ୍ରି ହୋଇଥିଲା ପ୍ରଥମ ଆଇଫୋନ ?

ସେତେବେଳେ ମଧ୍ୟ ଆଇଫୋନକୁ ନେଇ ଭାରତରେ କ୍ରେଜ୍ ଥିଲା । ସ୍ଵାତୀ ଜଣେ ଆଇଫୋନ ଲଭର ଥିବାରୁ ସେ ପ୍ରଥମେ ମଲ୍‌କୁ ଯାଇ ଏହି ଫୋନକୁ କିଣିଥିଲେ । ସ୍ଵାତୀ ଭାରତରେ ପ୍ରଥମ ଆଇଫୋନକୁ ୩୧,୦୦୦ ଟଙ୍କା ଦେଇ କିଣିଥିଲେ । ୨୦୦୮ ମସିହାରେ 8GB ଷ୍ଟୋରେଜ୍ ବେସ୍ ମଡେଲ ଆଇଫୋନର ଦାମ ୩୧ ହଜାର ଟଙ୍କା ଥିଲା । ଏହି ଆଇଫୋନର ନାଁ ଥିଲା iPhone 3G । ଏହାକୁ ଭାରତୀ ଏୟାରଟେଲ୍ ଓ ଭୋଡାଫୋନ ଉଭୟ ମିଶି ଲଞ୍ଚ କରିଥିଲେ । ଭାରତୀ ଏୟାରଟେଲ୍ ସର୍ଭିସେସ୍‌ର ପ୍ରଡକ୍ଟ ପ୍ରେସିଡେଣ୍ଟ ସଞ୍ଜୟ କପୁର ନିଜେ ସ୍ଵାତୀଙ୍କୁ ଆଇଫୋନ ଦେଇଥିଲେ ।

ପଢନ୍ତୁ ଏହି ଖବର: ଆସିଗଲା ନୂଆ ଆଇଫୋନ ୧୮ ଓ ୧୮ ପ୍ରୋ ମ୍ୟାକ୍ସ; ଦାମ ଏତିକି, କେବେଠୁ ବିକ୍ରି ଆରମ୍ଭ ଜାଣନ୍ତୁ...

• କେବେ ଭାରତ ଆସିଥିଲା ଆଇଫୋନ ?

ଆପଲ୍‌ର ପ୍ରଥମ ଆଇଫୋନ ୨୦୦୭ ମସିହାରେ ଆମେରିକା ସମେତ ଅନ୍ୟ କିଛି ଦେଶରେ ଲଞ୍ଚ ହୋଇଥିଲା । କିନ୍ତୁ ଆପଲ୍‌ ୨୦୦୮ ମସିହାରେ ଏୟାରଟେଲ୍ ସହଭାଗିତାରେ ପ୍ରଥମ ଆଇଫୋନକୁ ଲଞ୍ଚ କରିଥିଲା, ଯାହାକି ଆଇଫୋନ ୩ଜି ଥିଲା । ଏହି ଆଇଫୋନଟି ୩ଜି ନେଟୱର୍କରେ ଚାଲୁଥିଲା ଏବଂ ଏହି ଫୋନରେ ମାତ୍ର ୮ଜିବି ଷ୍ଟୋରେଜ୍ ଥିଲା । ସ୍ଵାତୀ ଏହି ଆଇଫୋନକୁ କିଣିବାରେ ପ୍ରଥମ ଭାରତୀୟ ଥିଲେ ।