ISRO Launch Success / ରାତିଅଧରେ ଇତିହାସ ରଚିଲା ଇସ୍ରୋ; EOS-05 ସାଟେଲାଇଟ୍‌ର ସଫଳ ଉତକ୍ଷେପଣ

ଶ୍ରୀହରିକୋଟା: ଭାରତୀୟମାନେ ଶୋଇଥିବା ବେଳେ ଭାରତୀୟ ମହାକାଶ ଗବେଷଣା ସଂସ୍ଥା ଇସ୍ରୋ ଇତିହାସ ରଚିଛି । ଆଜି ମଧ୍ୟରାତ୍ରିରେ (୨.୫୫ଟା)ରେ ଇସ୍ରୋ ଏକ ଉନ୍ନତ ପୃଥିବୀ ପର୍ଯ୍ୟବେକ୍ଷଣ ଉପଗ୍ରହ EOS-05କୁ ବହନ କରିଥିବା GSLV-F17କୁ ସଫଳତାର ସହ ଉତକ୍ଷେପଣ କରିଛି । EOS-05 ସାଟେଲାଇଟ୍ ହେଉଛି ଜିଓସିଙ୍କ୍ରୋନାସ୍ (ପୃଥିବୀର ଆବର୍ତ୍ତନ ଗତି ସହିତ ସମାନ ବେଗରେ ଗତି କରିବା) କକ୍ଷପଥରୁ କାର୍ଯ୍ୟ କରିବା ପାଇଁ ଡିଜାଇନ୍ କରାଯାଇଥିବା ଏକ ପୃଥିବୀ ପର୍ଯ୍ୟବେକ୍ଷଣ ଉପଗ୍ରହ।

• ଶ୍ରୀହରିକୋଟାରୁ ଭାରତର 'ନଟି ବୟ' GSLV-F17ର ଉତକ୍ଷେପଣ

ଶୁକ୍ରବାର ମଧ୍ୟରାତ୍ରି ୨.୫୫ଟାରେ ଶ୍ରୀହରିକୋଟାର ସତୀଶ ଧୱନ ମହାକାଶ କେନ୍ଦ୍ରର ଦ୍ୱିତୀୟ ଲଞ୍ଚ ପ୍ୟାଡରୁ ୫୧.୭ ମିଟର ଉଚ୍ଚତା ବିଶିଷ୍ଟ GSLV-F17 ଉଡ଼ାଣ କରିଥିଲା । ବୁଧବାର ରାତି ୧୧.୩୦ଟାରେ ଆରମ୍ଭ ହୋଇଥିବା ୨୭ ଘଣ୍ଟାର କାଉଣ୍ଟଡାଉନ୍ ପରେ ଏହି ଉତକ୍ଷେପଣ କରାଯାଇଥିଲା । ତେବେ EOS-05 ସଫଳତାର ସହ GSLV-F17ରୁ ଅଲଗା ହୋଇ ନିର୍ଦ୍ଦିଷ୍ଠ କକ୍ଷପଥରେ ସ୍ଥାପିତ ହୋଇଛି ।

Mission Success!

GSLV-F17 has successfully accomplished its mission, placing EOS-05 into the intended orbit.

Sharing a few memorable moments from the lift-off.

For more information:https://t.co/VneB2jgZoY#GSLVF17 #EOS05 #ISRO pic.twitter.com/kv0zB6V5Vi

— ISRO (@isro) September 3, 2026

• ଶତ୍ରୁମାନଙ୍କ ଉପରେ ନଜର ରଖିବ

EOS-05 ସାଟେଲାଇଟ୍‌ଟି ପୃଥିବୀଠାରୁ ପ୍ରାୟ ୩୬,୦୦୦ କିଲୋମିଟର ଦୂରରେ ଥିବା କକ୍ଷପଥରୁ ଭାରତୀୟ ଉପମହାଦେଶ ଏବଂ ଆଖପାଖ ଅଞ୍ଚଳଗୁଡ଼ିକୁ ନଜର ରଖିବ । ଏହାର ଭୂ-ସିଙ୍କ୍ରୋନାଇଜ୍ କକ୍ଷପଥ, ଏହାକୁ ପୃଥିବୀର ଘୂର୍ଣ୍ଣନ ସହିତ ସମନ୍ୱୟ ରକ୍ଷା କରି ପୃଥିବୀର ବିଶାଳ କ୍ଷେତ୍ରକୁ ବାରମ୍ବାର ନିରୀକ୍ଷଣ କରିବାକୁ ଅନୁମତି ଦିଏ । ଏହି ମହାକାଶଯାନ କୃଷି, ଜଳସମ୍ପଦ, ସହରାଞ୍ଚଳ ଯୋଜନା, ବନୀକରଣ, ସାମୁଦ୍ରିକ ସମ୍ପଦ, ପରିବେଶଗତ ତଦାରଖ ଏବଂ ବିପର୍ଯ୍ୟୟ ପରିଚାଳନା ଭଳି କ୍ଷେତ୍ରରେ ସାହାଯ୍ୟ କରିବ ବୋଲି ଆଶା କରାଯାଉଛି । ଏହାର ଇମେଜିଂ କ୍ଷମତା ବନ୍ୟା, ଜଙ୍ଗଲ ନିଆଁ ଏବଂ ପ୍ରତିକୂଳ ପାଗ ଭଳି ଦ୍ରୁତ ପରିବର୍ତ୍ତନଶୀଳ ଘଟଣାଗୁଡ଼ିକୁ ମଧ୍ୟ ନିରୀକ୍ଷଣ କରିବାରେ ସାହାଯ୍ୟ କରିପାରିବ ।

• ଏହି ମିଶନର ସଫଳତା ଭାରତ ପାଇଁ କାହିଁକି ସ୍ୱତନ୍ତ୍ର ?

GSLV ଏକ ତିନି-ସ୍ତରୀୟ ପ୍ରକ୍ଷେପଣ ଯାନ ଏବଂ ଏହା ଇସ୍ରୋର PSLV ଅପେକ୍ଷା ଅଧିକ ଶକ୍ତିରେ କକ୍ଷପଥରେ ଭାରି ମହାକାଶଯାନକୁ ପହଞ୍ଚାଇବା ପାଇଁ ଡିଜାଇନ୍ କରାଯାଇଛି । EOS-05 ମିଶନ ପାଇଁ, GSLV-F17କୁ ପୃଥିବୀର ବାୟୁମଣ୍ଡଳ ଦେଇ ଗତି କରିବା ସମୟରେ ମହାକାଶଯାନକୁ ସୁରକ୍ଷା ଦେବା ପାଇଁ ୪ ମିଟର ବ୍ୟାସର 'Ogive କମ୍ପୋଜିଟ୍ ପେଲୋଡ୍ ଫେୟାରିଂ' ସହିତ ସଜ୍ଜିତ କରାଯାଇଥିଲା । ଯାହାକି ସଫଳତାର ସହିତ ଉପଗ୍ରହକୁ ନିର୍ଦ୍ଦିଷ୍ଟ କକ୍ଷପଥରେ ପହଞ୍ଚାଇଛି ।

ପଢନ୍ତୁ ଏହି ଖବର: ରକେଟ 'ବିକ୍ରମ' ନିର୍ମାଣରେ ଓଡ଼ିଆ ଯୁବ ବୈଜ୍ଞାନିକଙ୍କ ବଡ଼ ଅବଦାନ

ଲଞ୍ଚ ସଫଳ ହେବା ପରେ ଗଣମାଧ୍ୟମକୁ ପ୍ରତିକ୍ରିୟା ଦେଇ ଇସ୍ରୋ ମୁଖ୍ୟ ଭି. ନାରାୟଣନ କହିଛନ୍ତି, " ମୁଁ ଖୁସିର ସହିତ ଘୋଷଣା କରୁଛି ଯେ GSLV-F17 ଯାନ ସଫଳତାର ସହିତ ଏବଂ ସଠିକ ଭାବରେ ଉନ୍ନତ ପୃଥିବୀ ପର୍ଯ୍ୟବେକ୍ଷଣ ସାଟେଲାଇଟ୍ ୦୫କୁ ନିର୍ଦ୍ଦିଷ୍ଟ କକ୍ଷପଥରେ ସ୍ଥାପନ କରିଛି । ପୃଥିବୀ ପର୍ଯ୍ୟବେକ୍ଷଣ ସାଟେଲାଇଟ୍ ୦୫ କକ୍ଷପଥରେ କାର୍ଯ୍ୟକ୍ଷମ ହେବା ପରେ, ଏହା ଭୂ-କକ୍ଷପଥରୁ ଭାରତର ପ୍ରଥମ ଇମେଜିଂ ସାଟେଲାଇଟ୍ ହେବ, ଯାହା ଆମ ଦେଶ ପାଇଁ ଗୁରୁତ୍ୱପୂର୍ଣ୍ଣ ରଣନୈତିକ ତଥ୍ୟ ପ୍ରଦାନ କରିବ ।"