Six Days In Forest / ସାପଘେରା ଜଙ୍ଗଲରେ ୬ଦିନ; ଚିପ୍ସ ଖାଇ ବଞ୍ଚିଲେ ୧୭ବର୍ଷର ନାବାଳକ

କ୍ୟାନବେରା (ଅଷ୍ଟ୍ରେଲିଆ): ସୋସିଆଲ ମିଡିଆରେ ଏବେ ଜଣେ ଅଷ୍ଟ୍ରେଲିଆର ଯୁବକଙ୍କ ରେସ୍କ୍ୟୁ ଭିଡିଓ ଖୁବ ଭାଇରାଲ ହେବାରେ ଲାଗିଛି । ୧୭ ବର୍ଷୀୟ ୱିଲିୟମ ୬ଦିନ ପର୍ଯ୍ୟନ୍ତ ଭୋକଉପାସରେ ଘଞ୍ଚ ଜଙ୍ଗଲ ମଧ୍ୟରେ ବିତାଇଛନ୍ତି । ବିଷଧର ସାପ ଥିବା ଜଙ୍ଗଲରେ ସେ ଦୀର୍ଘ ୬ଦିନ ବିତାଇବା ଘଟଣା ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ଆଉ ଏକ ଆଶ୍ଚର୍ଯ୍ୟକର କଥା ହେଉଛି, ସେ କେବଳ ଗୋଟିଏ ଆଳୁ ଚିପ୍ସ ଖାଇ ଏତେ ଦିନ ଜୀବିତ ରହିଛନ୍ତି । ତାଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି ।

ଭାଇରାଲ୍ ହେଉଥିବା ଭିଡିଓରେ ହେଲିକପ୍ଟର ୱିଲିୟମଙ୍କୁ ଉଦ୍ଧାର କରୁଥିବା ଦେଖିବାକୁ ମିଳିଛି । ଯେତେବେଳେ ନାବାଳକ ଜଣକ ହେଲିକପ୍ଟରକୁ ଦେଖିଥିଲେ, ସେ ଖୁସିରେ ଆତ୍ମବିଭୋର ହୋଇପଡ଼ିଥିଲେ । କାରଣ ଦୀର୍ଘ ୬ଦିନ ପରେ ତାଙ୍କର ବଞ୍ଚିବା ଆଶା ଉଜ୍ଜ୍ଵଳିତ ହୋଇଥିଲା । ସେ ପାଦେ ପାଦେ ବିପଦଭରା ଘଞ୍ଚ ଜଙ୍ଗଲରୁ ସୁରକ୍ଷିତ ଭାବେ ଉଦ୍ଧାର ହୋଇ ନୂଆ ଜୀବନ ପାଇଥିଲେ।

After 6 days missing boy William has been located by Victoria Police safe and well and he's currently in hospital for monitoring. https://t.co/usCXoP6Fif

— Peak Hour Images (@PeakHourImages) November 12, 2026

• କେମିତି ଜଙ୍ଗଲରେ ଫସିଲେ ୱିଲିୟମ ?

ଅନ୍ତର୍ଜାତୀୟ ଗଣମାଧ୍ୟମର ରିପୋର୍ଟ ଅନୁସାରେ, ୱିଲିୟମ ଗତ ଶୁକ୍ରବାର ମେଲବର୍ଣ୍ଣରୁ ପ୍ରାୟ ୧୮୦ କିଲୋମିଟର ଦୂର ଜଙ୍ଗଲରେ ନିଜ ବନ୍ଧୁଙ୍କ ସହ କ୍ୟାମ୍ପିଙ୍ଗ ପାଇଁ ବାହାରିଥିଲେ । ହେଲେ କ୍ୟାମ୍ପିଙ୍ଗ ସମୟରେ ସେ ନିଖୋଜ ହୋଇଯାଇଥିଲେ । ଉଦ୍ଧାରକାରୀ ଟିମ ୧୭ ବର୍ଷୀୟ ୱିଲିୟମଙ୍କୁ ଖୋଜିବା ଲାଗି ସନ୍ଧାନୀ କୁକୁର ଓ ହେଲିକପ୍ଟରକୁ କାମରେ ଲଗାଇଥିଲା । ଏପରି ସ୍ଥିତିରେ ପରିବାରର ଭରସା ସମ୍ପୂର୍ଣ୍ଣ ଭାବେ ଉଦ୍ଧାରକାରୀ ଟିମ ଉପରେ ଥିଲା । ପୁଅ ସୁରକ୍ଷିତ ଭାବେ ଉଦ୍ଧାର ହେବ ବୋଲି ସେ ଆଶା ବାନ୍ଧି ବସିଥିଲେ । ଶେଷରେ ସେୟା ହିଁ ହେଲା । ୱିଲିୟମ ସୁରକ୍ଷିତ ଭାବେ ଉଦ୍ଧାର ହୋଇଥିଲେ ।

ପଢନ୍ତୁ ଏହି ଖବର: ଭଲ ମାର୍କ ରଖିଲେ ବୋଲି ୧୫ ବର୍ଷୀୟ ପୁଅକୁ ୨.୩୦ କୋଟିର BMW ଗିଫ୍ଟ କଲେ ବାପା… ଗାଁରେ ଚର୍ଚ୍ଚା

• ବିଷଧର ସାପଙ୍କ ଥିଲା ଘର

କୁହାଯାଉଛି, ୱିଲିୟମ ଯେଉଁ ଅଞ୍ଚଳରେ ନିଖୋଜ ହୋଇଥିଲେ, ସେଠାରେ ଅଧିକାଂଶ ବିଷଧର ସାପ ରୁହନ୍ତି । ଏଥିଲାଗି ପରିବାର ଲୋକେ ଖୁବଶୀଘ୍ର ପୁଅକୁ ଉଦ୍ଧାର କରିବା ଲାଗି ଦାବି କରୁଥିଲେ ଓ ଭୟଭୀତ ମଧ୍ୟ ଥିଲେ । ପୋଲିସର କହିବାନୁସାରେ, କ୍ୟାମ୍ପିଙ୍ଗ ସମୟରେ ୱିଲିୟମ ଖସିଯାଇ ଏପରି ସ୍ଥାନରେ ପହଞ୍ଚିଥିଲା, ଯେଉଁଠୁ ସେ ରାସ୍ତା ପାଇନଥିଲା । ତା' ନିକଟରେ ଫୋନ ମଧ୍ୟ ନଥିଲା । ଘଞ୍ଚ ଜଙ୍ଗଲ ମଧ୍ଯରେ ଖୋଜିବା ପରେ ୱିଲିୟମକୁ ହେଲିକପ୍ଟର ସାହାଯ୍ୟରେ ଉଦ୍ଧାର କରାଯାଇଥିଲା । ଏବେ ସେ ସୁରକ୍ଷିତ ଥିବାବେଳେ ଅଧିକ ଖାଦ୍ୟ ପାଇଁ ଜିଦ୍ କରୁଥିବା ମାଆ ଏଲିଜାବେଥ୍ ବାର୍କଲେ କହିଛନ୍ତି । ତେବେ ଧୀରେ ଧୀରେ ତାକୁ ସମସ୍ତ ଖାଦ୍ୟ ଦେବାକୁ ଡାକ୍ତରଙ୍କ ପରାମର୍ଶ ରହିଛି ।