ବେଜିଂ: ପାଖରେ ଲକ୍ଷ ଲକ୍ଷ ଟଙ୍କା । ନିଜେ ସ୍ଵାବଲମ୍ଵୀ, ସଫଳ । ନାହିଁ କୌଣସି ଆର୍ଥିକ ଅଭାବ । ହେଲେ ସବୁକିଛି ଯେମିତି ବୃଥା ପାଲଟିଛି । ମନର କଥା ବାଣ୍ଟିବାକୁ ମିଳୁନି ମନର ମଣିଷ । ରୋଜଗାରକୁ ବ୍ୟୟ କରିବାର ମିଳୁନି ରାହା । ସତେ ଯେମିତି ସଫଳ ହୋଇ ବି ଅସଫଳ । ଉତ୍ତମ, ବିଳାସପୂର୍ଣ୍ଣ ଜୀବନଟିଏ ଜିଇଁବା ପାଇଁ ଯୌବନ ବୟସରେ ସଫଳ କ୍ୟାରିଅରର ସ୍ଵପ୍ନ ଦେଖିଥିଲେ । ଭାବିଥିଲେ କ୍ୟାରିଅରକୁ ଗଢି ନିଜ ସପନର ଘରଟିଏ ବସାଇବେ । ସେଠି ସ୍ଵାମୀ ଥିବେ, କୁନି ଛୁଆଟିଏ ଥିବ । କିନ୍ତୁ ସବୁକିଛି ପାଣି ଫୋଟକା ପରି ମିଳେଇଯାଇଛି । ବ୍ରାଇଡ୍ ମାର୍କେଟରେ ଅଚାନକ ଖୁବ ଜୋରରେ କାନ୍ଦିବାକୁ ଲାଗିଛନ୍ତି ଯୁବତୀ ।

ଆଜିକାଲି ଯୁଗରେ ଲୋକ ଭାବନ୍ତି ଉଚ୍ଚ ଶିକ୍ଷା, ସଫଳ କ୍ୟାରିଅର ଓ ଆର୍ଥିକ ରୂପେ ସୁଦୃଢ ହେବା ହେଉଛି ପ୍ରକୃତ ସଫଳତା । କିନ୍ତୁ ଚୀନର ଏହି ଘଟଣା ସମ୍ପୂର୍ଣ୍ଣ ଭିନ୍ନ । ନିକଟରେ ଚୀନର ଜଣେ ଯୁବତୀଙ୍କ ଭିଡିଓ ସୋସିଆଲ ମିଡିଆରେ ଖୁବ ଭାଇରାଲ ହେବାରେ ଲାଗିଛି । କୁହାଯାଉଛଇ ମହିଳା ଜଣକ ବର୍ଷକୁ ୬୦ ଲକ୍ଷ ଟଙ୍କା ରୋଜଗାର କରୁଛନ୍ତି । ତାଙ୍କ ନିକଟରେ ଭଲ ରୋଜଗାର ଦେଇପାରୁଥିବା ଚାକିରି, ଉଚ୍ଚ ଶିକ୍ଷା ଓ ଆର୍ଥିକ ଭାବେ ସ୍ଵଚ୍ଛଳ କରିବାର ସାମର୍ଥ ଅଛି । ତଥାପି ସେ ବାରମ୍ବାର ରିଜେକ୍ସନର ଶିକାର ହେଉଛନ୍ତି ।

• ବ୍ରାଇଡ୍ ମାର୍କେଟରେ ଦିଶିଲା ଅସହାୟତା

ମହିଳା ଜଣକ ଏକ ସାପ୍ତାହିକ ବ୍ରାଇଡ୍ ମାର୍କେଟ ବା ବିବାହ ବଜାରରେ ପହଞ୍ଚିଥିଲେ । ଏଠାରେ ଲୋକେ ନିଜ ପୁଅଝିଅଙ୍କ ପାଇଁ ଉପଯୁକ୍ତ ଜୀବନସାଥୀଟିଏ ଖୋଜିଥାନ୍ତି । ଏହି ଯୁବତୀ ଜଣକ ମଧ୍ୟ ନିଜ ମନର ମଣିଷକୁ ଖୋଜିବା ଲାଗି ଏଠାରେ ପହଞ୍ଚିଥିଲେ । କିନ୍ତୁ ତାଙ୍କୁ କେଉଁ ଗ୍ରହଣ କରିନଥିଲେ । ତାଙ୍କ ବୟସ ୩୦ବର୍ଷରୁ ଅଧିକ ଥିବାରୁ ତାଙ୍କୁ ପ୍ରତ୍ୟାଖ୍ୟାନର ଶିକାର ହେବାକୁ ପଡ଼ିଥିଲା । ଏହାପରେ ଯୁବତୀ ଜଣକ ଦୁଃଖିତ ଅନୁଭବ କରି ସେଠାରେ ଖୁବ ଜୋରରେ କାନ୍ଦିବାକୁ ଲାଗିଥିଲେ । ଏହା ଦେଖି ସେଠାରେ ଉପସ୍ଥିତ ଅନେକ ଲୋକ ଆଶ୍ଚର୍ଯ୍ୟଚକିତ ହୋଇପଡ଼ିଥିଲେ ।

• ବିବାହରେ ବାଧା ସାଜିଲା ବୟସ

ଚୀନରେ ଅନେକ ସହରରେ ଏପରି ମ୍ୟାରେଜ୍ ମାର୍କେଟ ବେଶ ଲୋକପ୍ରିୟ । ଏଠାରେ ପିତାମାତା ଆସି ନିଜ ପିଲାଙ୍କ ପାଇଁ ଜୀବନସାଥୀ ଖୋଜନ୍ତି । ଅନେକ ଘଟଣାରେ ପିଲାଙ୍କ ପସନ୍ଦଠାରୁ ପିତାମାତାଙ୍କ ପସନ୍ଦକୁ ଗୁରୁତ୍ଵ ଦିଆଯାଏ । ଏହି ବଜାରରେ ବୟସ, ଉଚ୍ଚତା, ବୈବାହିକ ସ୍ଥିତି, ଦରମା ଓ ପାରିବାରିକ ପୃଷ୍ଠଭୂମି ମଧ୍ୟ ବେଶ ମହତ୍ତ୍ଵ ରଖେ । ଏହି ଯୁବତୀଙ୍କ ଘଟଣା ଚର୍ଚ୍ଚାକୁ ଆସିଛି, କାରଣ ତାଙ୍କ ଦରମା ଭଲ ଓ ବୃତ୍ତିଗତ ଜୀବନରେ ମଧ୍ୟ ସେ ସଫଳ । ଏଠାରେ ତାଙ୍କ ଉପଲବ୍ଧି ବଦଳରେ ତାଙ୍କର ବୟସକୁ ଅଧିକ ଗୁରୁତ୍ଵ ଦିଆଯାଇଥିଲା । ଅନେକ କହିଥିଲେ ଯେ ୩୦ବର୍ଷରୁ ଅଧିକ ବୟସର ଯୁବତୀ ବିବାହ ପାଇଁ ଉପଯୁକ୍ତ ନୁହେଁ ।

ପଢନ୍ତୁ ଏହି ଖବର: ହଠାତ୍ ପାଦ ତଳୁ ମାଟି ଖସିଗଲା; ବାସ୍ତବତା ଜାଣି ମୁଣ୍ଡରେ ହାତ ଦେଲେ ଯୁବକ

• ସୋସିଆଲ ମିଡିଆରେ ପ୍ରବଳ ଚର୍ଚ୍ଚା

ଏହି ଦୃଶ୍ୟ କେବଳ ଚୀନରେ ନୁହେଁ, ବରଂ ଦୁନିଆର ଅନେକ ଦେଶରେ ଦେଖିବାକୁ ମିଳେ । ମହିଳାମାନେ ବୟସ, ବିବାହ ଓ ସାମାଜିକ ପ୍ରଥା ଚାଲିଚଳନକୁ ନେଇ ଚାପ ଅନୁଭବ କରନ୍ତି । ଅନେକ ସ୍ଥାନରେ ଏପରି ଧାରଣା ରହିଛି ଯେ ଝିଅମାନଙ୍କ ବ୍ୟକ୍ତିଗତ ଲକ୍ଷ୍ୟ ଓ ପରିସ୍ଥିତି ଯାହା ହେଉ ନା କାହିଁକି, ସେମାନଙ୍କୁ ଏକ ନିର୍ଦ୍ଦିଷ୍ଟ ବୟସ ମଧ୍ୟରେ ବିବାହ କରିନେବା ଉଚିତ । ଆଧୁନିକ ଯୁଗରେ ଏବେ ବି ଲୋକଙ୍କ ବିଚାରଧାରା ନ୍ୟୁନ ଥିବା ଏହି ଘଟଣା ପ୍ରମାଣିତ କରୁଛି ।