Bittu Tabahi / ୨୦ ବର୍ଷୀୟ ବିଟ୍ଟୁ ତବାହୀ... କାହାକୁ ଅପେକ୍ଷା କଲେନି, ନିଜେ ସଫା କରିଦେଲେ ଅଳିଆ ଭର୍ତ୍ତି ନଈ

ଯେତେବେଳେ ଜଣେ ବ୍ୟକ୍ତି କୌଣସି ଏକ କାମ କରିବାକୁ ପ୍ରତିଜ୍ଞା କରିନେଇଥାଏ, ସେତେବେଳେ ତାକୁ କେହି ଅଟକାଇପାରିନଥାନ୍ତି । ଏପରି ଦୃଢ ଇଚ୍ଛାଶକ୍ତି ଅସମ୍ଭବ ପରି ଲାଗୁଥିବା କାମକୁ ମଧ୍ୟ ସମ୍ଭବ କରିପାରେ । ଏବେ ସୋସିଆଲ ମିଡିଆରେ ଜଣେ ୨୦ ବର୍ଷୀୟ ଯୁବକର ବେଶ ଚର୍ଚ୍ଚା ହେଉଛି । ଯିଏକି ଏକୁଟିଆ ଗୋଟିଏ ଅଳିଆ ଆବର୍ଜନା ଭର୍ତ୍ତି ନଦୀକୁ ସଫା କରିଦେଇଛି । ମଧ୍ୟପ୍ରଦେଶ ରାଜଗଡ଼ ଜିଲ୍ଲା ବିଓରାର ବାସିନ୍ଦା ୨୦ ବର୍ଷୀୟ ବିଟ୍ଟୁ ତାବାହି ଏବେ ପୂରା ସମାଜ ପାଇଁ ଜଣେ ପ୍ରେରଣା ପାଲଟିଛନ୍ତି ।

ସାଧାରଣତଃ ଗାଁରେ ରାସ୍ତା ନଥାଉ କି ଅପରିଷ୍କାର ପରିବେଶକୁ ନେଇ ପ୍ରଶାସନକୁ ଦୋଷ ଦେଉ । ଏଠି ବିଟ୍ଟୁ ଅଳିଆ ଭର୍ତ୍ତି ନଦୀକୁ ଦେଖି ପ୍ରଶାସନକୁ ଅପେକ୍ଷା କରିନଥିଲେ । ବରଂ ନିଜ ଉଦ୍ୟମରେ ପୂରା ନଈକୁ ସଫା କରିଥିଲେ । ସେ ଏହି ଅଞ୍ଚଳରେ ବହୁଥିବା ଅଜନାର ନଦୀକୁ ରକ୍ଷା କରିଥିଲେ, ଯାହାକି ଧୀରେ ଧୀରେ ନାଳରେ ପରିଣତ ହେଉଥିଲା । ନଦୀରେ ଅଳିଆ ଆବର୍ଜନା ଏତେ ପରିମାଣରେ ଥିଲା ଯେ, ଶେଷରେ ଏଥିରୁ ଜଳଚର ଜୀବ ପ୍ରାୟ ଲୋପ ପାଉଥିଲେ ଏବଂ ପାଣି ମଧ୍ୟ ଦୂଷିତ ଥିଲା । ହାର ମାନିବା ପରିବର୍ତ୍ତେ, ବିଟ୍ଟୁ ନଦୀକୁ ପୁନର୍ଜୀବିତ କରିବାର ସ୍ୱପ୍ନ ଦେଖିଲେ ଏବଂ ତାଙ୍କ ସ୍ୱପ୍ନକୁ ହାସଲ କରିବା ପାଇଁ ଦିନରାତି ପରିଶ୍ରମ କଲେ। ତାଙ୍କ କଠିନ ପରିଶ୍ରମ କେବଳ ନଦୀର ଚିତ୍ର ପୂରା ବଦଳିଗଲା ବରଂ ପୂରା ସମାଜର ଦୃଷ୍ଟି ଆକର୍ଷଣ କରିଥିଲା ।

A man single-handedly cleans an entire river in his village.

A 20-year-old student in India is going viral for cleaning a polluted river by himself. Bittu Tabahi has removed plastic and trash from the water, spending his own money on supplies despite getting infections on his… pic.twitter.com/YIiYMOVj7z

— Massimo (@Rainmaker1973) September 3, 2026

• ନାଳରେ ପରିଣତ ହେଉଥିଲା ଅଜନାର ନଦୀ

ରାଜଗଡ଼ ଜିଲ୍ଲାର ଆନ୍ଦଲହେଡା ଗାଁର ଅଜନାର ନଦୀ ଦିନେ ଗ୍ରାମର ଜୀବନରେଖା ଥିଲା । ଏହାର ସ୍ୱଚ୍ଛ ଜଳ ଲୋକଙ୍କ ଆବଶ୍ୟକତା ପୂରଣ କରୁଥିଲା । କିନ୍ତୁ, ସମୟ ସହିତ କ୍ରମାଗତ ନଦୀରେ ପ୍ରଦୂଷଣ, ପ୍ଲାଷ୍ଟିକ୍ ଅପଚୟ ଏବଂ ଅବହେଳା ଏହାର ଅବସ୍ଥାକୁ ଆହୁରି ଖରାପ କରିଦେଲା । ନଦୀର ଅବସ୍ଥା ଏତେ ଖରାପ ହୋଇଯାଇଥିଲା ଯେ ମାଇଲ ମାଇଲ ଦୂର ପର୍ଯ୍ୟନ୍ତ କେବଳ ଅଳିଆ ଏବଂ ମଇଳା ଦେଖାଯାଉଥିଲା ।

• ଏକାକୀ ସଫେଇ ଅଭିଯାନ ଆରମ୍ଭ କରିଥିଲେ

ଯେତେବେଳେ ଅଧିକାଂଶ ଲୋକ ନଦୀର ଅବସ୍ଥା ଦେଖି ଚିନ୍ତା ପ୍ରକାଶ କରୁଥିଲେ, ବିଟ୍ଟୁ ତାବାହି କିଛି ଭିନ୍ନ କରିବାକୁ ନିଷ୍ପତ୍ତି ନେଇଥିଲେ । ସେ ଚଳିତ ବର୍ଷ ଜାନୁଆରୀ ୨୬ରେ ଅଜନାର ନଦୀକୁ ସଫା କରିବା ପାଇଁ ଏକ ଅଭିଯାନ ଆରମ୍ଭ କରିଥିଲେ । ପ୍ରଥମରୁ କିଛି ବନ୍ଧୁ ତାଙ୍କୁ ସହଯୋଗ କରିଥିଲେ, କିନ୍ତୁ ଧୀରେ ଧୀରେ ସମସ୍ତେ ପଛଘୁଞ୍ଚା ଦେଲେ । ଏହା ପରେ, ବିଟ୍ଟୁ ଏକାକୀ ଅଭିଯାନ ଜାରି ରଖିଲେ । କୌଣସି ସମ୍ବଳ ବିନା ସେ ପ୍ରତିଦିନ ନଦୀରେ ଘଣ୍ଟା ଘଣ୍ଟା ବିତାଇବା, ପ୍ଲାଷ୍ଟିକ୍, ଜଳାଶୟ ଏବଂ ଅନ୍ୟାନ୍ୟ ଆବର୍ଜନା ସଫା କରିବା ଆରମ୍ଭ କଲେ ।

• ୩ ମାସ କଠିନ ପରିଶ୍ରମ

ତିନି ମାସ ଧରି ଚାଲିଥିବା ଏହି ଅଭିଯାନର ପ୍ରଭାବ ସ୍ପଷ୍ଟ ଭାବରେ ଦୃଶ୍ୟମାନ ହେଉଥିଲା । ବିଟ୍ଟୁ ପହଁରା ଜାଣିନଥିଲେ, ତଥାପି ନଦୀ ଭିତରେ ପଶିଥିଲେ । ସଫେଇ ବେଳେ ସାପ, ମଲା ଜୀବ ବାହାରୁଥିଲେ । ତଥାପି ସେ ଭୟ ନ କରି ସଫେଇ କାମ ଜାରି ରଖିଥିଲେ । ମଇଳାରେ ପରିପୂର୍ଣ୍ଣ ନଦୀରୁ ଧୀରେ ଧୀରେ ସ୍ୱଚ୍ଛ ପାଣି ବାହାରିବା ଆରମ୍ଭ ହେଲା । ନଦୀକୂଳ ପୂର୍ବ ଅପେକ୍ଷା ବହୁତ ସଫା ଦେଖାଯାଉଥିଲା । ବିଟ୍ଟୁ ତାଙ୍କ ସୋସିଆଲ ମିଡିଆ ପ୍ଲାଟଫର୍ମରେ ସଫେଇ ଅଭିଯାନର ଫଟୋ ଏବଂ ଭିଡିଓ ସେୟାର କରିଥିଲେ । ନଦୀର ପୂର୍ବ ଏବଂ ପରବର୍ତ୍ତୀ ଚିତ୍ର ଲୋକମାନଙ୍କୁ ଆଶ୍ଚର୍ଯ୍ୟ କରିଥିଲା । ତାଙ୍କର ପ୍ରୟାସ ସମଗ୍ର ଅଞ୍ଚଳରେ ଆଲୋଚନାର ବିଷୟ ପାଲଟିଥିଲା ​​ଏବଂ ଲୋକମାନେ ତାଙ୍କୁ ପରିବେଶ ସୁରକ୍ଷାର ଯୁବ ଚେହେରା ବୋଲି କହିବା ଆରମ୍ଭ କଲେ ।

ପଢନ୍ତୁ ଏହି ଖବର: ଘୁଷୁରୀ କିଡନୀ ବଞ୍ଚାଇଦେଲା ମଣିଷର ଜୀବନ; ୨୭୧ଦିନ ପରେ ମିଳିଲା ମଣିଷ କିଡନୀ

• ଯେତେବେଳେ ଆନନ୍ଦ ମହିନ୍ଦ୍ରା ପ୍ରଶଂସା କଲେ

ବିଟ୍ଟୁଙ୍କ କଠିନ ପରିଶ୍ରମର ପ୍ରଭାବ କେବଳ ସ୍ଥାନୀୟ ସ୍ତରରେ ସୀମିତ ନଥିଲା । ତାଙ୍କ କାହାଣୀ ସାରା ଦେଶରେ ବ୍ୟାପିଥିଲା ଏବଂ ଶିଳ୍ପପତି ଆନନ୍ଦ ମହିନ୍ଦ୍ରା ମଧ୍ୟ ତାଙ୍କ ପଦକ୍ଷେପକୁ ପ୍ରଶଂସା କରିଥିଲେ । ମହିନ୍ଦ୍ରା ସୋସିଆଲ ମିଡିଆରେ କହିଥିଲେ ଯେ ଯଦି ସୋସିଆଲ ମିଡିଆ ଲୋକଙ୍କୁ ଭଲ କାମ କରିବାକୁ ପ୍ରେରଣା ଦେଉଛି, ତେବେ ଏହା ଏକ ସକାରାତ୍ମକ କଥା । ସେ ଏହା ମଧ୍ୟ କହିଥିଲେ ଯେ ସମାଜ ଏବଂ ପରିବେଶ ପାଇଁ ଭଲ କାମ କରିବାକୁ ଚେଷ୍ଟା କରୁଥିବା ଯୁବକମାନଙ୍କୁ ଉତ୍ସାହିତ କରାଯିବା ଉଚିତ।

• ବିଟ୍ଟୁ ତବାହୀ କିଏ?

ବିଟ୍ଟୁ ତବାହୀଙ୍କ ପ୍ରକୃତ ନାମ ବିଟ୍ଟୁ ସିଂହ ରଘୁବଂଶୀ । ସେ ରାଜଗଡ଼ ଜିଲ୍ଲାର ବେୱାରର ବାସିନ୍ଦା ଏବଂ ସୋସିଆଲ ମିଡିଆରେ ତାଙ୍କର ଏକ ନିଆରା ପରିଚୟ ଅଛି । ବିଟ୍ଟୁ କୁହନ୍ତି ଯେ ନଦୀର ଅବସ୍ଥା ତାଙ୍କୁ ଗଭୀର ଭାବରେ ବିଚଳିତ କରୁଥିଲା, ସେଥିପାଇଁ ସେ ସଫେଇ ଅଭିଯାନ ଆରମ୍ଭ କରିଥିଲେ । ସେ ସକାଳେ ଘରୁ ବାହାରି ଘଣ୍ଟା ଘଣ୍ଟା ଧରି ନଦୀରେ ଠିଆ ହୋଇ ସଫା କରୁଥିଲେ ।