ସହର ହେଉ କି ଗାଁ, ଘରୁ ଗାଡ଼ି ନେଇ ବାହାରିବା ମାତ୍ରେ ହର୍ଣ୍ଣର କେଁ କାଁ ଶବ୍ଦ ବିରକ୍ତ କରେ । ମାତ୍ର ଭାରତ ଭଳି ଜନବହୁଳ ଦେଶରେ ଏହା ରହିବା ବି ସ୍ଵାଭାବିକ । ଏପରିକି ଆମ ଦେଶରେ ବିନା ଟ୍ରାଫିକ ଲାଇଟରେ ଗାଡ଼ି ଚଳାଚଳ ନିହାତି ଅସମ୍ଭବ କଥା । ପିଲାଟି ଦିନରୁ ପାଠ୍ୟ ପୁସ୍ତକରେ ଛୋଟ ପିଲାଙ୍କୁ ଟ୍ରାଫିକ୍ ଲାଇଟର ବିଭିନ୍ନ ରଙ୍ଗ ନାଲି, ସବୁଜ, କମଳା ବିଷୟରେ ପଢାଯାଏ । କିନ୍ତୁ ଆପଣ ଜାଣି ଆଶ୍ଚର୍ଯ୍ୟ ହେବେ ଯେ ବିଶ୍ଵରେ ଏପରି ଏକ ଦେଶ ଅଛି, ଯେଉଁଠି ଗୋଟିଏ ବି ଟ୍ରାଫିକ୍ ଲାଇଟ୍ ନାହିଁ । ଏହା ସତ୍ତ୍ଵେ ଏଠି ଗାଡ଼ି ଜାମର ସମସ୍ୟା ମଧ୍ୟ ହୋଇନଥାଏ ।

ଏହି ଦେଶରେ ହର୍ଣ୍ଣର ଶବ୍ଦ ଶୁଣାଯାଏ ନାହିଁ କି, ରାସ୍ତାରେ ଗାଡ଼ିର ଲାଇନ ଲାଗେ ନାହିଁ । ଟ୍ରାଫିକ୍ ଲାଇଟ୍ ବିନା ନିୟମ ମାନି ଲୋକେ ଏଠାରେ ଗାଡ଼ି ଚଲାନ୍ତି । ଏହି ଦେଶକୁ ଯିଏ ବି ଯାଏ, ସେ ରାସ୍ତାରେ ଟ୍ରାଫିକ୍ ଲାଇଟ୍ ନ ଦେଖି ଆଶ୍ଚର୍ଯ୍ୟ ହୋଇଯାଏ । ଏଠାରେ ଗାଡ଼ିର ହର୍ଣ୍ଣର କୌଣସି ଆବଶ୍ୟକତା ପଡ଼ୁନଥିବାରୁ ଶବ୍ଦ ପ୍ରଦୂଷଣ ମଧ୍ୟ ହୁଏ ନାହିଁ । ଯେଉଁମାନେ ଏକ ଶାନ୍ତ ପରିବେଶରେ ଭ୍ରମଣ କରିବାକୁ ଚାହାଁନ୍ତି, ସେମାନଙ୍କ ତାଲିକାରେ ଏହି ଦେଶଟି ରହିଥାଏ ।

• ବିନା ଟ୍ରାଫିକ୍ ଲାଇଟରେ ଚାଲେ ଏହି ଦେଶ

ଭାରତୀୟଙ୍କ ଲାଗି ଖୁସିର କଥା ହେଉଛି ଯେ ଏହି ଦେଶ ସେମାନଙ୍କ ପଡ଼ୋଶୀ ଦେଶ, ଏଠାକୁ ଭାରତୀୟମାନେ ଭିସା-ପାସପୋର୍ଟ ବିନା ବି ବୁଲିବାକୁ ଯାଆନ୍ତି । ଏହି ଦେଶଟି ହେଉଛି ଭାରତର ଉତ୍ତରରେ ଥିବା ଭୁଟାନ, ଯେଉଁଠି ଆଜିର ଆଧୁନିକ ଯୁଗରେ ମଧ୍ୟ ଟ୍ରାଫିକ୍ ଲାଇଟର ଆବଶ୍ୟକତା ପଡ଼େ ନାହିଁ । ଏଠାରେ ଟ୍ରାଫିକ୍ ଲାଇଟ୍ ବିନା ରାସ୍ତାରେ ଟ୍ରାଫିକକୁ ଖୁବ ସହଜରେ ନିୟନ୍ତ୍ରଣକୁ ନିଆଯାଇଥାଏ । ଭୁଟାନର ରାସ୍ତାରେ ଆପଣ କେଉଁଠି ବି ନାଲି, କମଳା ଓ ସବୁଜ ରଙ୍ଗର ଟ୍ରାଫିକ୍ ସିଗ୍ନାଲ ଲାଇଟ୍ ଦେଖିବାକୁ ପାଇବେ ନାହିଁ । ଏଠାରେ ଲୋକଙ୍କ ମଧ୍ୟରେ ଆତ୍ମଅନୁଶାସନ ଭରି ରହିଛି, ଫଳରେ ରାସ୍ତାରେ ହର୍ଣ୍ଣ ମଧ୍ୟ ଶୁଣିବାକୁ ମିଳେ ନାହିଁ ।

ପଢନ୍ତୁ ଏହି ଖବର: ମରିବା ପରେ କେମିତି ଲାଗେ ? ଏଠି ବଞ୍ଚିବା ଅବସ୍ଥାରେ ବି ହୁଏ ମୃତ୍ୟୁର ଟ୍ରାଏଲ୍

• ଭୁଟାନରେ ସଡ଼କ ନିୟମାବଳୀ କିପରି ?

ଏହି ଦେଶରେ ସଡ଼କ ନିୟମାବଳୀ ପରମ୍ପରା ଓ ଆଧୁନିକତାର ମିଶ୍ରଣ । ଭୁଟାନର ନାଗରିକମାନେ ନିଜର ସଂସ୍କୃତି ଓ ପରମ୍ପରାକୁ ବଜାୟ ରଖି ଧିରେ ଧିରେ ଆଧୁନିକ ଯୁଗ ଆଡ଼କୁ ଅଗ୍ରସର ହେଉଛନ୍ତି । ଏଠାରେ ରାସ୍ତାରେ ଚାଲୁଥିବା ଲୋକଠୁ ଆରମ୍ଭ କରି ଗାଡ଼ି ଓ ସାଇକେଲ ଚଲାଉଥିବା ଲୋକ ପରସ୍ପରକୁ ସମ୍ମାନ ଜଣାଇଥାନ୍ତି । ଭୁଟାନରେ ଡ୍ରାଇଭିଂର ଢାଞ୍ଚା ଧୀର ଓ ଶାନ୍ତ ଭାବେ କରାଯାଏ । ଏଠାରେ ଲୋକେ ତରତର ନ ହୋଇ ପରସ୍ପରର ସୁରକ୍ଷାକୁ ଅଧିକ ଗୁରୁତ୍ଵ ଦିଅନ୍ତି ।

• କାହିଁକି ନାହିଁ ଟ୍ରାଫିକ୍ ଲାଇଟ୍ ?

ଭୁଟାନରେ ଟ୍ରାଫିକ୍ ଲାଇଟ୍ ନ ରହିବା ଏକ ସୁଚିନ୍ତିତ ନିଷ୍ପତ୍ତି । ବର୍ଷ ୧୯୯୫ରେ ଭୁଟାନର କ୍ୟାପିଟାଲ ସିଟି ଥିମ୍ପୁଠାରେ ଟ୍ରାଫିକ୍ ଲାଇଟ୍ ଲଗାଯାଇଥିଲା, କିନ୍ତୁ ଲୋକେ ଏହାକୁ ପସନ୍ଦ କରିନଥିଲେ । ଲୋକେ କହିଥିଲେ ଯେ ଏହାଦ୍ଵାରା ମଣିଷ ମଣିଷ ମଧ୍ୟରେ ଆତ୍ମୀୟତା ଶେଷ ହୋଇଯାଏ ଏବଂ ଲୋକେ ଅନ୍ୟର ସୁରକ୍ଷାକୁ ସେତେଟା ପ୍ରାଧାନ୍ୟ ଦିଅନ୍ତି ନାହିଁ । ସେହିପରି ଆଉ କିଛି ଲୋକେ ଏହାକୁ ସଂସ୍କୃତି ଓ ସହରର ଶାନ୍ତିକୁ ପ୍ରଭାବିତ କରିବ ବୋଲି କହିଥିଲେ । ଏହାପରେ ଏହି ଟ୍ରାଫିକ୍ ଲାଇଟକୁ ହଟାଇ ଦିଆଯାଇଥିଲା ଏବଂ ପୂର୍ବପରି ଟ୍ରାଫିକ୍ ଲାଇଟ ଲଗାଇବାକୁ ଉଦ୍ୟମ କରାଯାଇନଥିଲ ।

• କିପରି ଟ୍ରାଫିକ୍ ନିୟନ୍ତ୍ରଣ ହୁଏ ?

ଏବେ ସବୁଠୁ ବଡ଼ ପ୍ରଶ୍ନ ହେଉଛି ଯେ ଟ୍ରାଫିକ୍ ଲାଇଟ୍ ବିନା ଏଠାରେ କିପରି ଟ୍ରାଫିକକୁ ନିୟନ୍ତ୍ରଣ କରାଯାଇଥାଏ । ତେବେ ଏହା ପଛରେ ସବୁଠୁ ବଡ଼ ଭୂମିକା ଟ୍ରାଫିକ ପୋଲିସମାନଙ୍କର ରହିଥାଏ । ଭୁଟାନରେ ଛକରେ ଠିଆ ହୋଇଥିବା ଟ୍ରାଫିକ ପୋଲିସମାନେ ହାତରେ ସଙ୍କେତ ଦେଇ ପାରମ୍ପରିକ ଉପାୟରେ ରାସ୍ତାରେ ଟ୍ରାଫିକ ନିୟନ୍ତ୍ରଣ କରିଥାନ୍ତି । ସେମାନଙ୍କର ତାଲିମ ଏତେ ସଠିକ୍ ହୋଇଥାଏ ଯେ, ସେମାନେ ଅତି ସହଜରେ ଭିଡ଼କୁ ନିୟନ୍ତ୍ରଣ କରିପାରିଥାନ୍ତି । ଏହି ଟ୍ରାଫିକ୍ ପୋଲିସ କର୍ମଚାରୀଙ୍କ ଲାଗି ଭୁଟାନର ରାସ୍ତାରେ ଏକ ଭିନ୍ନ ଧରଣର ବୁଥ୍ ରହିଛି, ଯାହାକି ସହରରେ ଶୋଭାକୁ ବର୍ଦ୍ଧିତ କରିଥାଏ ।

ପଢନ୍ତୁ ଏହି ଖବର: ଏଠି ମରିବା ବି ମହଙ୍ଗା; ଶବ ପାଇଁ କିଣାଯାଉଛି ଫ୍ଲାଟ୍, ଭୟରେ ପଡ଼ୋଶୀ

ଯେତେବେଳେ ପର୍ଯ୍ୟଟକମାନେ ଭୁଟାନ ଯାଇଥାନ୍ତି, ସେତେବେଳେ ସେଠାକାର ଟ୍ରାଫିକ୍ ପୋଲିସ କର୍ମଚାରୀଙ୍କ ଭିଡ଼ ନିୟନ୍ତ୍ରଣ ଦୃଶ୍ୟ ଦେଖି ଆକର୍ଷିତ ହୋଇଥାନ୍ତି । ଏପରିକି ଅଧିକାଂଶ ଲୋକଙ୍କ ଲାଗି ଏହା ଆକର୍ଷଣର କେନ୍ଦ୍ରବିନ୍ଦୁ ପାଲଟିଥାଏ । ଭୁଟାନର ଜନସଂଖ୍ୟା କମ ଥିବାବେଳେ ଏଠାକାର ଗାଡ଼ି ସଂଖ୍ୟା ମଧ୍ୟ କମ । ଫଳରେ ଲୋକେ ଅତି ସହଜରେ ରାସ୍ତାରେ ଯାତାୟାତ କରିଥାନ୍ତି । ଏହାବ୍ୟତୀତ ଭୁଟାନ ନାଗରିକ ଗାଡ଼ିର ସର୍ବାଧିକ ବେଗକୁ ବି ଧ୍ୟାନରେ ରଖିଥାନ୍ତି । ଏଠାରେ ରାସ୍ତାରେ ଲୋକେ ୨୦ରୁ ୪୦ ସ୍ପିଡରେ ଯାତାୟାତ କରନ୍ତି ଏବଂ ଏଠାରେ ସର୍ବାଧିକ ଗାଡ଼ିର ବେଗ ୫୦ ରହିଥାଏ ।