Apartment Scam / ହଠାତ୍ ପାଦ ତଳୁ ମାଟି ଖସିଗଲା; ବାସ୍ତବତା ଜାଣି ମୁଣ୍ଡରେ ହାତ ଦେଲେ ଯୁବକ

ଯୁବକଙ୍କ ସହ ଘଟିଲା ଅଜବ ଘଟଣା । ନିଜ କଷ୍ଟ ଅର୍ଜିତ ଧନକୁ ଘରକିଣା ପାଇଁ ବିନିଯୋଗ କଲେ । ୩୩ ଲକ୍ଷ ଦେଇ ଏକ ବଡ଼ ଅଟ୍ଟାଳିକାର ୩୪ ନମ୍ବର ଫ୍ଲାଟ୍ କିଣିଲେ । କିନ୍ତୁ ଦେଖିଲା ବେଳକୁ ବିଲ୍ଡିଂଟି ୩୨ ମହଲା । ଅର୍ଥାତ୍ ଉକ୍ତ ବିଲ୍ଡିଂରେ ୩୩ କି ୩୪ ନମ୍ବର ମହଲା ନାହିଁ । ଚୀନର ସାଙ୍କସିର ଜିଆନଠାରେ ଶେନ୍ ନାମକ ଜଣେ ଯୁବକଙ୍କ ସହ ଏଭଳି ଅଭାବନୀୟ ଘଟଣା ଘଟିଛି । ୨୦୧୩ରେ ଆପାର୍ଟମେଣ୍ଟକୁ କିଣିଥିବାବେଳେ ୧୩ ବର୍ଷରେ ଧୋକା ଖାଇଛନ୍ତି ଗ୍ରାହକ ।

ଶେନ୍ ୯୦ ବର୍ଗ ମିଟରର ଆପାର୍ଟମେଣ୍ଟ କିଣିଥିଲେ । ଏହା ବିଲ୍ଡିଂର ୩୪ ମହଲା ଥିବା ବିଲ୍ଡର ଜଣକ ତାଙ୍କୁ କହିଥିଲେ । ସେ ଭାରତୀୟ ମୁଦ୍ରାରେ ପ୍ରାୟ ୩୩.୬୯ ଲକ୍ଷ ଟଙ୍କା ଖର୍ଚ୍ଚ କରିଛନ୍ତି ଅର୍ଥାତ୍ ଗୋଟିଏ ବର୍ଗ କିଲୋମିଟର ପିଛା ସେ ୩୭,୪୩୧ ଟଙ୍କା ଦେଇଛନ୍ତି । ଏହି ଆପାର୍ଟମେଣ୍ଟଟି ଗ୍ରାମାଞ୍ଚଳରେ ଏବଂ ବେଆଇନ ଭାବେ ନିର୍ମିତ ହୋଇଥିବାରୁ ଏହାର ଦାମ କମ୍ ଥିବା ଜଣାପଡ଼ିଛି । ଆପାର୍ଟମେଣ୍ଟ ତିଆରି ପାଇଁ ବିଲ୍ଡରଙ୍କୁ ଆନୁଷ୍ଠାନିକ ଅନୁମତି ମଧ୍ୟ ପ୍ରଦାନ କରାଯାଇନଥିଲା । ଏହା ଚୀନର ସମ୍ପତ୍ତି ଆଇନ ଅଧୀନରେ ଆସୁନଥିବାବେଳେ ପୁଣିଥରେ ବିକ୍ରି କରାଯାଇପାରିବ ନାହିଁ । ଏହା ସତ୍ତ୍ଵେ କମ୍ ମୂଲ୍ୟ ଯୋଗୁଁ ଏହା ଗ୍ରାହକଙ୍କୁ ବେଶ ଆକର୍ଷିତ କରିଥିଲା ।

• ୧୬ ଲକ୍ଷ ଡାଉନ୍ ପେମେଣ୍ଟ ଦେଇଥିଲେ

୨୦୧୩ରେ ଶେନ୍ ୧୧୭,୭୦୦ ୟୁଆନ୍ (ପ୍ରାୟ ୧୬ ଲକ୍ଷ) ଡାଉନ୍ ପେମେଣ୍ଟ ଦେଇ ଆପାର୍ଟମେଣ୍ଟକୁ ନିଜ ନାଁରେ ବୁକ୍ କରିଥିଲେ । ପରବର୍ତ୍ତୀ ସମୟରେ ତାଙ୍କୁ ଆବଶ୍ୟକୀୟ ଅନୁମତି ଓ ସାର୍ଟିଫିକେଟ୍ ପ୍ରଦାନ କରାଯିବ ବୋଲି ବିଲ୍ଡର ଭରସା ଦେଇଥିଲେ । କିନ୍ତୁ ବାସ୍ତବରେ ଏପରି ବେଆଇନ ଆପାର୍ଟମେଣ୍ଟ ଆଇନ ଅନୁସାରେ ଅନୁମତି ପ୍ରଦାନ କରାଯାଇନଥାଏ । ଆପାର୍ଟମେଣ୍ଟ କାମ ୨୦୧୫ରେ ଶେଷ ହେବ ବୋଲି କୁହାଯାଇଥିଲା । ମାତ୍ର ନିର୍ମାଣ କାର୍ଯ୍ୟରେ ବିଳମ୍ବ ପରେ ଏହାର ପୂରା କାମ ୨୦୧୭ରେ ସରିଥିଲା ।

• ଅନ୍ୟ ଫ୍ଲୋର ଅଫର୍ କରିଥିଲେ ବିଲ୍ଡର

ଯେତେବେଳେ ବିଲ୍ଡିଂ କାମ ୩୨ ନମ୍ବର ଫ୍ଲୋରରେ ଶେଷ ହୋଇଥିଲା, ଏ ସମ୍ପର୍କରେ ବିଲ୍ଡର ଶେନଙ୍କୁ ଜଣାଇଥିଲେ ଏବଂ ତାଙ୍କୁ ୩୨ ନମ୍ବର ଫ୍ଲୋର ଅଫର୍ କରିଥିଲେ । ସେହି ସମୟରେ ଆଉ ବାକି ଟଙ୍କା ଦେବାକୁ ଶେନ୍ ଅସମର୍ଥ ଥିଲେ । ଏଣୁ ଉକ୍ତ ଫ୍ଲୋରଟିକୁ ମାତ୍ର ୨ ମାସ ମଧ୍ୟରେ ଅନ୍ୟ ଜଣେ ଗ୍ରାହକଙ୍କୁ ବିକ୍ରି କରିଥିଲେ ବିଲ୍ଡର ।

ପଢନ୍ତୁ ଏହି ଖବର: ଏଠି ମରିବା ବି ମହଙ୍ଗା; ଶବ ପାଇଁ କିଣାଯାଉଛି ଫ୍ଲାଟ୍, ଭୟରେ ପଡ଼ୋଶୀ

• ଏଯାଏଁ ଅର୍ଥ ଫେରସ୍ତ ପାଇନାହାନ୍ତି ଶେନ୍

ଘର ନ ମିଳିବା ପରେ ଶେନ୍ ଟଙ୍କା ଫେରସ୍ତ ପାଇଁ ବିଲ୍ଡରଙ୍କୁ କହିଥିଲେ । ବିଲ୍ଡର ଆର୍ଥିକ ସମସ୍ୟାର ସମ୍ମୁଖୀନ କରୁଥିବା କହି ୨୦୨୦ରେ ୨୦,୦୦୦ ୟୁଆନ୍ ଏବଂ ୨୦୨୨ରେ ୫୦,୦୦୦ ୟୁଆନ୍ ଦେଇଥିଲେ । ବାକି ଟଙ୍କା ନ ମିଳିବାରୁ ଏହି ମାମଲଟା ମଧ୍ୟସ୍ଥତାଙ୍କ ପାଖକୁ ଯାଇଥିଲା । କର୍ତ୍ତୃପକ୍ଷ ଶେନଙ୍କୁ ବାକି ୪୭,୭୦୦ ୟୁଆନ୍ ଏବଂ ୨୭,୦୦୦ ୟୁଆନ୍ ସୁଧ ଦେବାକୁ କହିଥିଲେ । କିନ୍ତୁ ଏଯାବତ ଶେନ ନିଜର ପୂରା ଟଙ୍କା ପାଇନଥିବା ଜଣାପଡ଼ିଛି । ତେବେ ୧୩ ବର୍ଷ ପରେ ମଧ୍ୟ ଶେନଙ୍କୁ ନା ଘର ମିଳିଲା ନା ପୂରା ଟଙ୍କା । ଏହି ମାମଲା ଚୀନରେ ସ୍ଵଳ୍ପ ମୂଲ୍ୟର ସମ୍ପତ୍ତି କିଣିବାର ବାସ୍ତବ ଘଟଣାକୁ ପଦାରେ ପକାଇଛି ।