Reel Using Pistol / ରିଲ୍ ବନାଉଥିଲେ, ହଠାତ୍ ବାହାର କଲେ ପିସ୍ତଲ...ଭିଡିଓ ଭାଇରାଲ ପରେ ଛାଡ଼ିଗଲା ରିଲ୍ସ ନିଶା

ପାଟନା: ଏବେ ଛୁଆଠୁ ବୁଢା ସମସ୍ତେ ରିଲ୍ ପାଇଁ ବାୟା । କିଏ ରିଲ୍‌ କରୁଛି ତ ଆଉ କିଏ ଘଣ୍ଟା ଘଣ୍ଟା ବସି ରିଲ୍ ଦେଖୁଛି । ନିକଟରେ ରିଲ୍ ପାଇଁ ହଟହଟା ହୋଇଛନ୍ତି ଜଣେ ମହିଳା । ବିହାର ଦରଭଙ୍ଗା ଅଞ୍ଚଳର ମହିଳା ଭୋଜପୁରୀ ଗୀତରେ କ୍ୟାମେରା ସାମ୍ନାରେ ନାଚୁଥିବାବେଳେ ହଠାତ୍ ବାହାର କରିଥିଲେ ପିସ୍ତଲ । ନିଆଁ ପରି ଏହି ଭିଡିଓଟି ଭାଇରାଲ ହୋଇଥିବାବେଳେ ଏବେ ମହିଳା ଜଣକ ଅସୁବିଧାର ସମ୍ମୁଖୀନ ହୋଇଛନ୍ତି । ମହିଳାଙ୍କୁ ପୋଲିସ ଗିରଫ କରିଥିବା ଜଣାପଡ଼ିଛି ।

ପୋଲିସର କହିବାନୁସାରେ, ଘରୁ ଏକ ପିସ୍ତଲ, ଏକ ମାଗାଜିନ୍ ଓ ଦୁଇଟି ଅଫୁଟା ଗୁଳି ଜବତ ହୋଇଛି । ମହିଳାଙ୍କ ପାଖକୁ ପିସ୍ତଲ କେଉଁଠୁ ଆସିଲା ଓ ଏହି ପୂରା ଘଟଣାରେ ମହିଳାଙ୍କ ପରିବାରର କୌଣସି ଭୂମିକା ଅଛି କି ନାହିଁ ସେ ନେଇ ପୋଲିସ ତଦନ୍ତ କରୁଛି । ଏହି ଘଟଣାଟି ଦରଭଙ୍ଗା ଜିଲ୍ଲାର ଘନଶ୍ୟାମପୁର ଥାନା ଅଞ୍ଚଳରୁ ଆସିଛି । ଗିରଫ ହୋଇଥିବା ମହିଳା ହେଉଛନ୍ତି ଲାଛୋ ଦେବୀ ।

• କ୍ୟାମେରା ସାମ୍ନାରେ ବାହାର କରିଥିଲେ ପିସ୍ତଲ

ଅନେକ ଦିନ ଧରି ଲାଛୋ ଦେବୀ ରିଲ୍ କରିଆସୁଛନ୍ତି । କିଛି ଦିନ ତଳେ ଏକ ଭିଡିଓ ଦ୍ରୁତ ଗତିରେ ସୋସିଆଲ ମିଡିଆରେ ଭାଇରାଲ ହୋଇଥିଲା । ସେଥିରେ ଦେଖିବାକୁ ମିଳିଥିଲା ଯେ ଲାଛୋ ଡାନ୍ସ କରୁଥିବା ସମୟରେ ହଠାତ୍ ଅଣ୍ଟାରେ ଖୋସିଥିବା ପିସ୍ତଲ ବାହାର କରୁଛନ୍ତି ଓ ଭିନ୍ନ ଭିନ୍ନ ଶୈଳୀରେ କ୍ୟାମେରା ସାମ୍ନାରେ ପିସ୍ତଲ ଧରି ପୋଜ୍ ଦେଉଛନ୍ତି । ଏହି ଭାଇରାଲ ଭିଡିଓଟି ଶେଷରେ ପୋଲିସ ପାଖରେ ପହଞ୍ଚିଥିଲା ।

• କଣ କହିଲା ପୋଲିସ ?

ଏହି ଘଟଣାକୁ ନେଇ ଭିରୋଲ ଏସଡିପିଓ ପ୍ରଭାକର ତିୱାରୀ କହିଛନ୍ତି ଯେ ଭାଇରାଲ ଭିଡିଓରେ ମହିଳାଙ୍କ ପରିଚୟ ଖୋଜିବା ଲାଗି ଅନ୍ଯ ପୋଲିସ କର୍ମଚାରୀଙ୍କ ସହାୟତା ନିଆଯାଇଥିଲା । ପରିଚୟ ଜଣାପଡ଼ିବା ପରେ ପୋଲିସ ସିରସିଆ ଗାଁରେ ପହଞ୍ଚି ଲାଛୋ ଦେବୀଙ୍କ ଘରେ ତନାଘନା କରିଥିଲା । ଯାଞ୍ଚ ବେଳେ ପୋଲିସ ମହିଳାଙ୍କ ଘରୁ ଗୋଟିଏ ବନ୍ଧୁକ, ଗୋଟିଏ ମାଗାଜିନ୍‍ ଦୁଇଟି ଅଫୁଟା ଗୁଳି ଏବଂ ଗୋଟିଏ ଆଣ୍ଡ୍ରଏଡ୍ ମୋବାଇଲ ଜବତ କରିଛି । ଏହି ମୋବାଇଲରେ ଭିଡିଓ ସୁଟ୍ କରାଯାଇଥିଲା ।

ପଢନ୍ତୁ ଏହି ଖବର: ୨୦ବର୍ଷ ସାନ ପ୍ରେମିକ ପାଇଁ ଫେରାର୍ ୩ ଛୁଆଙ୍କ ମାଆ; ଖବରକୁ ନେଇ ସବୁଠି ଚର୍ଚ୍ଚା

• ଘରେ ନଥିଲେ ସ୍ଵାମୀ

ପୋଲିସ କହିଛି ଯେ ଏହି ପୂରା ଯାଞ୍ଚ ପ୍ରକ୍ରିୟା ବେଳେ ଲାଛୋ ଦେବୀଙ୍କ ସ୍ଵାମୀ ଘରେ ନଥିଲେ । ସେ ଓ ପରିବାରର ଅନ୍ୟ ସଦସ୍ୟ ଫେରାର ଥିବା କୁହାଯାଉଛି । ସନ୍ଦେହ କରାଯାଉଛି ଏହି ବନ୍ଧୁକ ପଛରେ ପରିବାରର ହାତ ଥାଇପାରେ । ତେବେ ଏହା ବୈଧ ନା ଅବୈଧ ବନ୍ଧୁକ ଏବଂ ପୂରା ଘଟଣାରେ ମହିଳାଙ୍କ ସ୍ଵାମୀ, ପରିବାର ଓ ଦିଅରଙ୍କ କୌଣସି ଭୂମିକା ଅଛି କି ନାହିଁ ସେ ନେଇ ଯାଞ୍ଚ କରାଯାଉଛି । ଏଠାରେ କହିରଖୁଛୁ କି, ସୋସିଆଲ ମିଡିଆରେ ଲାଇକ୍ସ, କମେଣ୍ଟ, ଭ୍ଯୁଜ୍ ଲାଗି ଅସ୍ତ୍ରଶସ୍ତ୍ରର ବ୍ୟବହାର ଓ ପ୍ରଦର୍ଶନ କରିବା ଆଇନର ଉଲ୍ଲଙ୍ଘନ ଅଟେ ।