Gold In Field / କିଏ ଲୁଚାଇଥିଲା ଏତେ ସୁନା ? ବିଲ ଖୋଳିବା ବେଳେ ଖୋଲିଲା ବଡ଼ ରହସ୍ୟ

୬ ଏକରର ଜମି । ତାରିଖ ଜୁନ ୨୪ । ଜଣେ ମହିଳା ଶ୍ରମିକ ବିଲରେ ଘାସ ହଟାଇ ନିଜ କାମ କରୁଥିଲେ । ହଠାତ୍ ତାଙ୍କ ହାତରେ ବାଜିଲା ଏକ ମାଟିହାଣ୍ଡି, ଯାହାକୁ ହୁଏତ କେହି ସେହି ବିଲରେ ପୋତିଥିଲା । କାଦୁଅ ଭିତରେ ସୁନେଲି ରଙ୍ଗର ଏହି ମୂଲ୍ୟବାନ ଧାତୁ ଚକଚକ୍ କରୁଥିଲା । ମହିଳା ଶ୍ରମିକ ଜଣକ ଉତ୍ସାହର ସହିତ ମାଟିକୁ ଅଧିକ ଖୋଳିଲା ପରେ ଯାହା ଦେଖିଥିଲେ ତାଙ୍କ ଆଖିକୁ ବିଶ୍ଵାସ କରିପାରିନଥିଲେ । କାହାଣୀ ପରି ମାଟିହାଣ୍ଡିରେ ଭରି ରହିଥିଲା ପୁଳାପୁଳା ସୁନା ଅଳଙ୍କାର । ବିଲ ଭିତରୁ ପ୍ରାୟ ୫୦ ଭରି ସୁନା ମିଳିଥିବା ଦାବି କରାଯାଉଛି ।

ଗ୍ରାମବାସୀଙ୍କ କହିବାନୁସାରେ, ଶ୍ରମିକମାନେ ଜମି ମାଲିକଙ୍କୁ ମିଳିଥିବା ଅଳଙ୍କାର ସବୁ ଦେଇଥିଲେ । ପ୍ରଚୁର ପରିମାଣର ସୁନା ଅଳଙ୍କାର ମିଳିବା ପରେ ଏବେ ଉକ୍ତ ଜମିକୁ ନେଇ ବିବାଦ ଦେଖାଦେଇଛି । ଜମିର ପୂର୍ବ ମାଲିକଙ୍କ ପୁଅ ପୋଲିସରେ ଅଭିଯୋଗ କରିବା ପରେ ମାମଲାଟି ଏକ ନୂତନ ମୋଡ଼ ନେଇଛି । ସେ କହିଛନ୍ତି ଯେ ଏହି ଜମିଟି ତାଙ୍କର । ବର୍ତ୍ତମାନର ମାଲିକ ଏବଂ ଶ୍ରମିକମାନେ ତାଙ୍କୁ ନଜଣାଇ ସୁନାକୁ ନିଜ ନିଜ ମଧ୍ୟରେ ବାଣ୍ଟି ନେଇଛନ୍ତି ।

• ସୁନା ମିଳିବା ପରେ ଜମିକୁ ନେଇ ବିବାଦ

ଜମିର ପୂର୍ବ ମାଲିକଙ୍କ ଦାବି ଅନୁସାରେ ସୁନା ତାଙ୍କ ଜମିରୁ ମିଳିଛି । ତାଙ୍କୁ ଏ ବିଷୟରେ କୌଣସି ସୂଚନା ଦିଆଯାଇ ନଥିଲା, କିମ୍ବା ତାଙ୍କୁ ମିଳିଥିବା ସୁନାର କିଛି ଭାଗ ଦିଆଯାଇନଥିଲା । ପୋଲିସ ଏକ ଅଭିଯୋଗ ପଞ୍ଜିକୃତ କରି ତଦନ୍ତ ଆରମ୍ଭ କରିଛି । ଜମିରୁ ଅଳଙ୍କାର କିପରି ମିଳିଲା ଏବଂ ଏଥିରେ କାହାର ଆଇନଗତ ଅଧିକାର ଅଛି, ସେ ନେଇ ପୋଲିସ ଏବେ ତନାଘନା କରିଛି । ଏହି ମାମଲା ଚେନ୍ନାରାଓପେଟ୍ ମଣ୍ଡଳର କୋପାକୁଲାପାଡୁ ଗାଁର ବୋଲି ଜଣାପଡ଼ିଛି ।

• ପୁଣି ଚର୍ଚ୍ଚାରେ ୱାରାଙ୍ଗଲର ଇତିହାସ

ଏହି ଖବରଟି ସାମ୍ନାକୁ ଆସିବା ପରେ ନିଆଁ ପରି ବ୍ୟାପିଥିଲା । ଅନେକ ଲୋକ ସୁନା ମିଳିଥିବା ସ୍ଥାନ ଦେଖିବାକୁ ଆସିଥିଲେ । ତେବେ ଏହି ଘଟଣା ୱାରାଙ୍ଗଲର ସମୃଦ୍ଧ ଇତିହାସର କାହାଣୀକୁ ପୁନର୍ବାର ଜୀବନ୍ତ କରିଛି । ପୂର୍ବରୁ ଓରୁଗାଲୁ ଭାବରେ ଜଣାଶୁଣା, ୱାରାଙ୍ଗଲ କାକାତୀୟ ରାଜବଂଶର ରାଜଧାନୀ ଥିଲା । ଏହି ରାଜବଂଶ ୧୨ ଶତାବ୍ଦୀରୁ ୧୪ ଶତାବ୍ଦୀ ମଧ୍ୟରେ ତେଲୁଗୁ ଅଞ୍ଚଳର ଏକ ବଡ଼ ଅଂଶ ଉପରେ ରାଜତ୍ୱ କରିଥିଲେ । କାକାତୀୟ ଶାସକମାନେ ୱାରାଙ୍ଗଲ ଦୁର୍ଗ, ହଜାର ସ୍ତମ୍ଭ ମନ୍ଦିର ଏବଂ ୟୁନେସ୍କୋ ବିଶ୍ୱ ଐତିହ୍ୟ ସ୍ଥାନ ରାମାପ୍ପା ମନ୍ଦିର ନିର୍ମାଣ କରିଥିଲେ । ଏହି ରାଜ୍ୟ ସୁନା, ହୀରା ଏବଂ ମୂଲ୍ୟବାନ ଅଳଙ୍କାର ସମେତ ଏହାର ଅପାର ସମ୍ପତ୍ତି ପାଇଁ ଜଣାଶୁଣା ଥିଲା ।

ପଢନ୍ତୁ ଏହି ଖବର: ହାତରେ ଥିଲା କମ୍ବଳ, କମ୍ବଳ ଭିତରେ ୩୭ କେଜିର ସୁନା; ଏମିତି ମାଡ଼ି ବସିଲା ପୋଲିସ

ମିଳିଥିବା ସୁନା ପ୍ରାଚୀନ କଳାକୃତି ନା ଆଧୁନିକ ଅଳଙ୍କାର ତାହା ଅଧିକାରୀମାନେ ଏପର୍ଯ୍ୟନ୍ତ ନିଶ୍ଚିତ କରିନାହାଁନ୍ତି । ଯଦି ଏଗୁଡ଼ିକର ଐତିହାସିକ କିମ୍ବା ପ୍ରତ୍ନତାତ୍ତ୍ୱିକ ଗୁରୁତ୍ୱ ମିଳେ, ତେବେ ସୁନା ଉପରେ ମାଲିକାନା ମିଳିବା ପୂର୍ବରୁ ପ୍ରତ୍ନତାତ୍ତ୍ୱିକ ବିଭାଗ ଏହାକୁ ସଂଗ୍ରହ କରିବ । ଏହାସହିତ ଏହି ଅଳଙ୍କାରର କେତେ ବର୍ଷ ପୁରୁଣା, କେଉଁଠୁ ଆସିଲା ଓ ଇତିହାସ ସହିତ ଜଡ଼ିତ କି ନାହିଁ ସେ ସମ୍ପର୍କରେ ଅଧ୍ୟୟନ କରାଯିବ ।