Viral Kissing Car / କାରରେ ପ୍ରେମିକାଙ୍କ ୩୪୦୦ ଚୁମ୍ବନ ଚିହ୍ନ; ୩ ଘଣ୍ଟାର ପରିଶ୍ରମ, ୫୫ ଲକ୍ଷ ଭ୍ୟୁଜ୍....ତା ପରେ ଏମିତି ହେଲା ପୋଲିସର ଏଣ୍ଟ୍ରି

ଭୋପାଳ: କାରରେ ପ୍ରାୟ ୩୪୦୦ ଲିପଷ୍ଟିକ୍ ଚୁମ୍ବନ ଚିହ୍ନ । ସାଢ଼େ ୩ ଘଣ୍ଟାର କଠିନ ପରିଶ୍ରମ । ୮୦୦ରୁ ୯୦୦ ଟଙ୍କା ଖର୍ଚ୍ଚ । ସାଧାରଣ କାରକୁ ଅତରଙ୍ଗି କରି ସୋସିଆଲ ମିଡିଆରେ ଭାଇରାଲ ହେବା ପାଇଁ ଏତେସବୁ ଯୋଜନା ଥିଲା । ଏଥିରେ ଯୁବକ ସଫଳ ମଧ୍ୟ ହେଲେ । କିସିଙ୍ଗ କାର ରିଲ୍‌ ଚୁଟକିରେ ଭାଇରାଲ ହେଲା । ଦେଖୁ ଦେଖୁ ୫ ମିଲିଅନରୁ ଅଧିକ ଭ୍ୟୁ ମିଳିଲା । କିନ୍ତୁ ଏବେ ଅସୁବିଧାରେ ପଡ଼ିଛନ୍ତି ଯୁବକ । ଘରେ ପହଞ୍ଚିଛି ପୋଲିସ ।

• ଏବେ ପୋଲିସ ପାର୍କିଂରେ କିସିଙ୍ଗ କାର୍

ଭାଇରାଲ କିସିଙ୍ଗ୍ କାରର ଦର୍ଶକଙ୍କ ମଧ୍ୟରେ ଥିଲେ ଗ୍ବାଲିୟର ଟ୍ରାଫିକ୍ ପୋଲିସ । ଭିଡିଓଟି ଭାଇରାଲ ହେବା ପରେ ଯୁବକଙ୍କୁ ଧରିଥିଲା ପୋଲିସ । ସୋସିଆଲ ମିଡିଆରେ ଭାଇରାଲ କିସିଙ୍ଗ୍ କାରର ଏବେ ନୂଆ ଠିକଣା ପାଲଟିଛି ପୋଲିସ ଷ୍ଟେସନ ପାର୍କିଂ । ଯୁବକଙ୍କଠାରୁ ୫୫୦୦ ଟଙ୍କା ଜୋରିମାନା ଆଦାୟ ହେବା ସହ କାର ମାଲିକ ନିଜ ହାତରେ ହଜାର ହଜାର ଲିପଷ୍ଟିକ୍ ଚିହ୍ନ ସଫା କରୁଥିବା ଦେଖିବାକୁ ମିଳିଛି । ଏହା ହେଉଛି ଗ୍ବାଲିୟରର ଆଦିତ୍ୟ ସିକରୱାରଙ୍କ କାହାଣୀ । ଭାଇରାଲ ସୋସିଆଲ ମିଡିଆ ଟ୍ରେଣ୍ଡକୁ ଅନୁସରଣ କରି ଆଦିତ୍ୟ ତାଙ୍କ ପ୍ରେମିକାଙ୍କ ସହାୟତାରେ କାରକୁ କିସ୍ ଚିହ୍ନରେ ପୂର୍ଣ୍ଣ କରିଥିଲେ ।

• ଆଇଡିଆ ଦେଇଥିଲେ ପ୍ରେମିକା

ପୋଲିସର କହିବା ଅନୁଯାୟୀ, ସୋସିଆଲ ମିଡିଆରେ ଲିପଷ୍ଟିକ୍ ଚୁମ୍ବନ ଚିହ୍ନରେ ଭର୍ତ୍ତି ଏକ ସ୍ୱିଫ୍ଟ କାର ସହରର ରାସ୍ତାରେ ଦ୍ରୁତ ଗତିରେ ଯାଉଥିବା ଦେଖାଯାଇଥିଲା । ଭିଡିଓ ଭାଇରାଲ ହେବା ପରେ, ପୋଲିସ କାର ଏବଂ ଏହାର ମାଲିକଙ୍କୁ ଚିହ୍ନଟ କରିବାକୁ ଚେଷ୍ଟା କରିଥିଲା । ଶେଷରେ ପୋଲିସ କାର ମାଲିକ ଆଦିତ୍ୟ ସିକରୱାରଙ୍କ ନିକଟରେ ପହଞ୍ଚିଥିଲା । ତାଙ୍କୁ ପଚରାଉଚରା ସମୟରେ ପ୍ରକୃତ କଥା ସାମ୍ନାକୁ ଆସିଥିଲା । ପ୍ରେମିକାଙ୍କ କଥାରେ ପଡ଼ି ଆଦିତ୍ୟ ଭାଇରାଲ ହେବା ପାଇଁ ଏପରି କରିଥିବା କହିଥିଲେ । ପୂରା କାରକୁ କିସିଙ୍ଗ୍ ଚିହ୍ନରେ ଭରିବା ପାଇଁ ସେ ୮୦୦ରୁ ୯୦୦ ଟଙ୍କା ଖର୍ଚ୍ଚା କରିଥିବା କହିଛନ୍ତି ।

ପଢନ୍ତୁ ଏହି ଖବର: ଆଇଫୋନ ପାଇଁ ଆତ୍ମହତ୍ୟା ଘଟଣା; ଫୋନ ନୁହଁ ଥିଲା ଅନେକ କିଛି କାରଣ, ପଡ଼ୋଶୀ କହିଦେଲେ

• ପୋଲିସ ଷ୍ଟେସନରେ ସଫା କଲେ କାର୍

ଏହାପରେ ପୋଲିସ ଚାଲାଣ କାଟିବା ସହ ତାଙ୍କୁ କାର ସଫା କରିବା ପାଇଁ କହିଥିଲେ । ଏଇଠି ସରିଥିଲା ଭାଇରାଲ କିସିଙ୍ଗ କାରର କାହାଣୀ । ଶେଷରେ ଆଦିତ୍ୟ ପୋଲିସ ଷ୍ଟେସନ ପରିସରରେ ପାର୍କିଂ ହୋଇଥିବା ତାଙ୍କ କାରରୁ ଲିପଷ୍ଟିକ୍ ଚିହ୍ନକୁ ଗୋଟିଏ କରି ଗୋଟିଏ ସଫା କରିଥିଲେ । ଏହାପରେ ଆଦିତ୍ୟ କହିଛନ୍ତି ଯେ ଏପରି ରିଲ୍ ଏବଂ ଟ୍ରାଫିକ୍ ନିୟମ ପ୍ରତି ତାଙ୍କର ଅବହେଳା ତାଙ୍କୁ ଆଇନଗତ ସମସ୍ୟାରେ ପକାଇପାରେ ବୋଲି ତାଙ୍କର କୌଣସି ଧାରଣା ନଥିଲା । ଏପରି ଆଗକୁ କରିବେ ନାହିଁ ବୋଲି ପୋଲିସକୁ ପ୍ରତିଶ୍ରୁତି ଦେଇ ଘରକୁ ଫେରିଥିଲେ ଆଦିତ୍ୟ ।