Live Heart Transport / ବନ୍ଦେ ଭାରତରେ ଗଲା ଜୀବନ୍ତ ହୃତପିଣ୍ଡ; ମିଥୁନଙ୍କ ହୃଦୟ ପାଲଟିବ ଅନ୍ୟ ଜଣଙ୍କ ସ୍ପନ୍ଦନ

ଗୋଟିଏ ପଟେ ଶୋକାକୁଳ ପରିବାରର ଆଖିରୁ ଝରିପଡ଼ୁଥିଲା ଲୁହ । ଅନ୍ୟପଟେ ଅନ୍ୟ ଜଣଙ୍କ ଜୀବନ ବଞ୍ଚାଇବାର ଜାଗିଥିଲା ମହାନ ଭାବନା । ଓଡ଼ିଆ ପୁଅ ମିଥୁନ ନିଜେ ଚାଲିଗଲେ ସତ, କିନ୍ତୁ ଯାଉ ଯାଉ ୪ ଜଣଙ୍କ ଜୀବନରେ ଭରିଦେଇଗଲେ ନୂଆ ଆଶାର ଆଲୋକ । ଭାରତୀୟ ରେଳବାଇ ଇତିହାସରେ ପ୍ରଥମ ଥର ପାଇଁ ଘଟିଛି ଏକ ଐତିହାସିକ ଘଟଣା । ବନ୍ଦେ ଭାରତ ଏକ୍ସପ୍ରେସରେ ସଫଳତାର ସହ ପରିବହନ କରାଯାଇଛି ଜୀବନ୍ତ ହୃତପିଣ୍ଡ ।

ଗଞ୍ଜାମ ଜିଲ୍ଲା ସୋରଡ଼ା ଅଞ୍ଚଳର କଳାଖାଡି ଗାଁର ଯୁବକ ମିଥୁନ ସ୍ୱାଇଁ । ଗତ ଜୁଲାଇ ୨୮ ତାରିଖରେ ରାତ୍ରିଭୋଜନ ପରେ ହଠାତ୍ ତାଙ୍କ ଶରୀରର ବାମ ପାର୍ଶ୍ୱ ଅଚଳ ହୋଇପଡ଼ିଥିଲା । ଅବସ୍ଥା ଗୁରୁତର ହେବାରୁ ତାଙ୍କୁ ତୁରନ୍ତ ସୁରଟ ସିଭିଲ୍ ହସ୍ପିଟାଲର ICUରେ ଭର୍ତ୍ତି କରାଗଲା । ଡାକ୍ତରୀ ଟିମ୍‌ଙ୍କ ଆପ୍ରାଣ ଉଦ୍ୟମ ସତ୍ତ୍ୱେ ଜୁଲାଇ ୩୦ ତାରିଖରେ ମିଥୁନଙ୍କୁ 'ବ୍ରେନ୍-ଡେଡ୍' ଘୋଷଣା କରାଯାଇଥିଲା । ପରିବାର ଉପରେ ଯେମିତି ଦୁଃଖର ପାହାଡ଼ ଭାଙ୍ଗିପଡ଼ିଲା ।

ମୃତ୍ୟୁ ପରେ ବି ଅନ୍ୟଙ୍କଠାରେ ଜୀବିତ ରହିବେ ମିଥୁନ...
ଗଞ୍ଜାମ କଳାଖାଡ଼ି ଗାଁର ମିଥୁନ ସ୍ୱାଇଁ 'ବ୍ରେନ୍-ଡେଡ୍' ହେବା ପରେ ପରିବାର ନେଲେ ଏକ ବଡ଼ ନିଷ୍ପତ୍ତି। ଅଙ୍ଗଦାନ ମାଧ୍ୟମରେ ମିଥୁନଙ୍କ ଯୋଗୁଁ ଆଜି ୪ ଜଣ ବ୍ୟକ୍ତି ପାଇଲେ ନୂଆ ଜୀବନ।#MithunSwain #Ganjam #OrganDonation #Odisha #LifeAfterDeath #ArgusNews pic.twitter.com/u4VylBqXmL

— Argus News (@ArgusNews_in) August 1, 2026

• ଅଙ୍ଗଦାନ ପାଇଁ ପରିବାରର ନିଷ୍ପତ୍ତି

କିନ୍ତୁ ଏହି ସଙ୍କଟ ସମୟରେ, 'ଅର୍ଗାନ୍ ଡୋନେସନ୍ ଚାରିଟେବଲ୍ ଟ୍ରଷ୍ଟ'ର ସ୍ୱେଚ୍ଛାସେବୀଙ୍କ ବୁଝାସୁଝା ପରେ, ମିଥୁନଙ୍କ ପତ୍ନୀ ଓ ପରିବାର ଭାରାକ୍ରାନ୍ତ ହୃଦୟରେ ନେଇଥିଲେ ଏକ ମହାନ ନିଷ୍ପତ୍ତି । 'ଆମ ମିଥୁନ ଆଉ ଫେରିବନି ସତ, କିନ୍ତୁ ତା’ର ଅଙ୍ଗ ଅନ୍ୟ କାହା ଶରୀରରେ ବଞ୍ଚି ରହିବ' ଏହି ଗୋଟିଏ ନିଷ୍ପତ୍ତି ୪ ଜଣ ବ୍ୟକ୍ତିଙ୍କୁ ଦେଇଛି ନୂଆ ଜୀବନ ।

• ଆଗେଇ ଆସିଲା ଭାରତୀୟ ରେଳୱେ

ଦକ୍ଷିଣ ଗୁଜରାଟରେ ପ୍ରବଳ ବର୍ଷା ଯୋଗୁଁ ବିମାନ ଚଳାଚଳ ସମ୍ପୂର୍ଣ୍ଣ ବାଧାପ୍ରାପ୍ତ ହୋଇଥିଲା । ଜୀବନ୍ତ ହୃତପିଣ୍ଡକୁ ଅତି କମ୍ ସମୟ ମଧ୍ୟରେ ସୁରଟରୁ ଅହମ୍ମଦାବାଦ ପହଞ୍ଚାଇବା ଏକ ବଡ଼ ଚ୍ୟାଲେଞ୍ଜ ଥିଲା । ଏହି ଜରୁରୀକାଳୀନ ପରିସ୍ଥିତିରେ ଆଗେଇ ଆସିଥିଲା ଭାରତୀୟ ରେଳୱେ । ଗାନ୍ଧୀନଗର କ୍ୟାପିଟାଲ୍ ବନ୍ଦେ ଭାରତ ଏକ୍ସପ୍ରେସରେ ସୁରଟରୁ ମାତ୍ର ୩ ଘଣ୍ଟା ୪୫ ମିନିଟରେ ଅହମ୍ମଦାବାଦରେ ପହଞ୍ଚିଥିଲା ଜୀବନ୍ତ ହୃତପିଣ୍ଡ ।

ପଢନ୍ତୁ ଏହି ଖବର: ପରିବାର ପୋଷିବାକୁ ଯାଇ ଗୁଜରାଟରେ ଚାଲିଗଲା ଜୀବନ; ଅଙ୍ଗଦାନ କରି ରଖିଲେ ଓଡ଼ିଶାର ଟେକ

ଜୀବନ୍ତ ହୃତପିଣ୍ଡକୁ ଅହମ୍ମଦାବାଦ ରେଳ ଷ୍ଟେସନର ୧ ନମ୍ବର ପ୍ଲାଟଫର୍ମରୁ 'ୟୁ.ଏନ୍. ମେହେଟ୍ଟା ଇନ୍‌ଷ୍ଟିଚ୍ୟୁଟ୍ ଅଫ୍ କାର୍ଡିଓଲୋଜି' ପର୍ଯ୍ୟନ୍ତ ବିନା କୌଣସି ବାଧାରେ ପହଞ୍ଚାଇବା ପାଇଁ ଗୁଜରାଟ ପୋଲିସ ଏବଂ RPF ମିଳିତ ଭାବେ ଏକ 'ଗ୍ରୀନ୍ କରିଡର' ପ୍ରସ୍ତୁତ କରିଥିଲେ । ଟ୍ରାଫିକ୍‌କୁ ସମ୍ପୂର୍ଣ୍ଣ ମୁକ୍ତ ରଖି ନିର୍ଦ୍ଧାରିତ ସମୟ ଭିତରେ ହୃତପିଣ୍ଡକୁ ହସ୍ପିଟାଲରେ ପହଞ୍ଚାଯାଇଥିଲା, ଯେଉଁଠାରେ ଜଣେ ରୋଗୀଙ୍କ ଶରୀରରେ ଏହାକୁ ସଫଳତାର ସହ ପ୍ରତ୍ୟାରୋପଣ କରାଯାଇଛି । ଜଣେ ଓଡ଼ିଆ ପୁଅର ହୃଦୟ ଆଜି ଅନ୍ୟ ଜଣଙ୍କ ଛାତିରେ ସ୍ପନ୍ଦିତ ହେଉଛି । ମିଥୁନଙ୍କ ଏହି ଅପୂର୍ବ ତ୍ୟାଗ ଏବଂ ଭାରତୀୟ ରେଳୱେର ଏହି ଐତିହାସିକ ପଦକ୍ଷେପକୁ ଚାରିଆଡୁ ପ୍ରଶଂସା କରାଯାଉଛି ।