ରାଜ୍ୟରେ ଏବେ ଅସହ୍ୟ ଗରମ ସହ ଗୁଳୁଗୁଳି ଜନ ଜୀବନକୁ ଅସ୍ତବ୍ୟସ୍ତ କରିଦେଇଛି । ଝାରସୁଗୁଡ଼ା ୪୪.୧ ଡିଗ୍ରୀ ସହ ସବୁଠୁ ଉତ୍ତପ୍ତ ସହର ପାଲଟିଥିବା ବେଳେ ଆଉ ୨ ଦିନ ଏଭଳି ସ୍ଥିତି ଜାରି ରହିବ । ତେବେ ଏହି ତାତି ଭିତରେ ଏକ ଆଶ୍ୱସ୍ତିର ଖବର ଆସିଛି । ଆସନ୍ତା ୨୮ ତାରିଖରୁ ରାଜ୍ୟରେ କାଳବୈଶାଖୀର ପ୍ରଭାବ ବଢ଼ିବ ଏବଂ ଏହା ସହ ଚଳିତ ବର୍ଷ ମୌସୁମୀ ମଧ୍ୟ ସ୍ୱାଭାବିକ ରହିବ ବୋଲି ପୂର୍ବାନୁମାନ କରାଯାଇଛି ।

ରାଜ୍ୟରେ ଜାରି ରହିଛି ତାତିର ରାଜ । ପ୍ରବଳ ଗୁଳୁଗୁଳୁ ହେଉଥିବା ବେଳେ ଅସହ୍ୟ ହେଉଛି ତାତି । ଆହୁରି ୨ ଦିନ ଏଭଳି ସ୍ଥିତି ରହିବା ସହ ଗରମ ଗୁଳୁଗୁଳିରୁ ନାହିଁ ନିସ୍ତାର । ୨୮ ତାରିଖରୁ କାଳବୈଶାଖୀ ଆଣିବ ତାତିରୁ ଆଶ୍ବସ୍ତି । ଆସନ୍ତା ୨୪ ଘଣ୍ଟାରେ ପ୍ରବଳ ଗରମ ଗୁଳୁଗୁଳି ଅନୁଭୂତ ହେବ । ଏନେଇ ୧୧ ଜିଲ୍ଲାକୁ ୟେଲୋ ଓ୍ବାର୍ଣ୍ଣିଂ ଜାରି କରିଛି ପାଣିପାଗ ବିଭାଗ । ବାଲେଶ୍ୱର, ଭଦ୍ରକ, କଟକ ଓ ଖୋର୍ଦ୍ଧା ଭଳି ଜିଲ୍ଲାରେ ଉଷ୍ମ ଓ ଆଦ୍ର ସ୍ଥିତି ରହିବ । ତେବେ ୨୮ ତାରିଖରୁ ଟ୍ରାପ୍ ଲାଇନ୍ ପ୍ରଭାବରେ କାଳବୈଶାଖୀ ବର୍ଷା ଆରମ୍ଭ ହେବ, ଯାହା ଫଳରେ ତାପମାତ୍ରା ୨ ରୁ ୪ ଡିଗ୍ରୀ ହ୍ରାସ ପାଇବ । ଏହି ସମୟରେ ସମୁଦ୍ର ଅଶାନ୍ତ ରହିଥିବାରୁ ମତ୍ସ୍ୟଜୀବୀଙ୍କୁ ସମୁଦ୍ର ଭିତରକୁ ଯିବାକୁ ବାରଣ କରାଯାଇଛି ।

ଅଧିକ ପଢ଼ନ୍ତୁ: ରାଜ୍ୟରେ ୪୫ ଡିଗ୍ରୀ ମୁହାଁ ପାରଦ, ୧୩ ଜିଲ୍ଲାକୁ ଗରମ ଗୁଳୁଗୁଳି ନେଇ ଆଲର୍ଟ

ଖାଲି କାଳବୈଶାଖୀ ନୁହେଁ, ଚଳିତ ବର୍ଷ ମୌସୁମୀକୁ ନେଇ ମଧ୍ୟ ଭଲ ଖବର ଆସିଛି । ୨୦୨୬ ମୌସୁମୀ ଋତୁରେ ଓଡ଼ିଶାରେ ବର୍ଷାର ପରିମାଣ ସ୍ୱାଭାବିକ ରହିବ । ‘ଲା ନିନା’ ପରିସ୍ଥିତି ସୃଷ୍ଟି ହେଉଥିବାରୁ ଏବଂ ଅଗଷ୍ଟ-ସେପ୍ଟେମ୍ବର ବେଳକୁ 'ପଜିଟିଭ୍ IOD' ସକ୍ରିୟ ହେବାକୁ ଥିବାରୁ ମୌସୁମୀର ଦ୍ୱିତୀୟାର୍ଦ୍ଧ ବେଶ୍ ଶକ୍ତିଶାଳୀ ହେବ । ଏହା ଚାଷୀକୂଳ ପାଇଁ ବଡ଼ ଆଶ୍ୱସ୍ତି ଆଣିଦେଇଛି ।

ବଢୁଥିବା ପ୍ରଦୂଷଣ ଯୋଗୁଁ ତାପମାତ୍ରା ବଢ଼ୁଛି । ପରିବେଶବିତଙ୍କ ଅନୁସାରେ, ଗାଡ଼ିରୁ ନିର୍ଗତ ଧୂଆଁ ଓ ଶୀତତାପ ନିୟନ୍ତ୍ରକ ଯନ୍ତ୍ର ବାହାର ପରିବେଶକୁ ଅଧିକ ଉତ୍ତପ୍ତ କରୁଛି । ଯଦି ଏବେଠାରୁ ସାବଧାନ ନହେବା, ତେବେ ଆଗାମୀ ୧୦ ବର୍ଷ ପରେ ସ୍ଥିତି ଆହୁରି ଭୟଙ୍କର ହେବ ।

ସାମୟିକ ଭାବେ କାଳବୈଶାଖୀ ତାତିରୁ ଆଶ୍ୱସ୍ତି ଦେବାକୁ ଯାଉଥିଲେ ମଧ୍ୟ, ଜଳବାୟୁ ପରିବର୍ତ୍ତନ ଏକ ବଡ଼ ଚ୍ୟାଲେଞ୍ଜ ଭାବେ ଉଭା ହୋଇଛି। ତେଣୁ ସଚେତନତା ଓ ପରିବେଶ ସୁରକ୍ଷା ହିଁ ଶେଷ ବିକଳ୍ପ  ।