ରାଜ୍ୟରେ ଦିନକୁ ଦିନ ଗ୍ରୀଷ୍ମପ୍ରବାହ ବଢିଚାଲିଛି । ବଢୁଛି ପ୍ରଚଣ୍ଡ ତାତି ସହ ବହୁଛି ଝାଞ୍ଜି ପବନ । ଆକାଶରୁ ଯେମିତି ନିଆଁ ବର୍ଷୁଛି । ପଶ୍ଚିମରେ ସ୍ଥିତି ଅସମ୍ଭାଳ ହେଲାଣି । ପୂର୍ବରେ ବି ଦିନ ୧୧ଟାରେ ପରେ ଘରୁ ବାହାରିବା ମୁସ୍କିଲ ହୋଇପଡୁଛି । ଟାଣ ଖରାରେ ଶରୀର ଜଳିଗଲା ଭଳି ଲାଗୁଥିବାବେଳେ ଗୁଳୁଗୁଳି କଲବଲ କରୁଛି । ମଧ୍ୟାହ୍ନ ୧୨ଟା ପରେ ରାସ୍ତାଘାଟ ଯେପରି ଖାଁ ଖାଁ ହେଉଛି । ଛତା, ଟୋପି ଓ ପାଣି ବୋତଲ ବିନା ବାହାରକୁ ବାହାରିବା ଅସମ୍ଭବ ହୋଇପଡ଼ିଛି । ଶରୀରକୁ ଥଣ୍ଡା ରଖିବା ପାଇଁ ସହରର ଲସି ଓ ଆଖୁରସ ଦୋକାନରେ ଭିଡ଼ ଜମୁଛି । ଝାରସୁଗୁଡ଼ାରେ ଗତକାଲି ତାପମାତ୍ରା ୪୪.୮ଡିଗ୍ରୀ ଛୁଇଁଛି ।

• ପଶ୍ଚିମରେ ସ୍ଥିତି ଅସମ୍ଭାଳ

ଝାରସୁଗୁଡା, ବଲାଙ୍ଗିର, ସମ୍ବଲପୁର,ସୁନ୍ଦରଗଡ଼ ତାତି ରେକର୍ଡ ଭାଙ୍ଗୁଛି । ଆଭ୍ୟନ୍ତରୀଣ ଓ ଉପକୂଳରେ ତତଲା ଝାଞ୍ଝି ପବନ ଅସ୍ତବ୍ୟସ୍ତ କରୁଛି । ଗତକାଲି ଝାରସୁଗୁଡା ୪୪.୮ଡିଗ୍ରୀ ସେଲସିୟସ୍ ତାପମାତ୍ରା ସହ ସର୍ବାଧିକ ଉତ୍ତପ୍ତ ସହର ପାଲଟିଥିଲା । ସେହିପରି ଟିଟିଲାଗଡ଼ରେ ୪୪ ଡିଗ୍ରୀ, ସମ୍ବଲପୁର ୪୩.୬ ଡିଗ୍ରୀ ରେକର୍ଡ ହୋଇଥିଲା । ଆଜି ବି ପଶ୍ଚିମ ଓଡ଼ିଶାରେ କଲବଲ କରିବ ତାତି । ଝାରସୁଗୁଡ଼ା, ସୁନ୍ଦରଗଡ଼, ବରଗଡ଼, ବଲାଙ୍ଗିର ଓ ସମ୍ବଲପୁରକୁ ସତର୍କତା ଜାରି କରିଛି ପାଣିପାଗ କେନ୍ଦ୍ର । ସେହିପରି ୧୩ ଜିଲ୍ଲାକୁ ଗରମ ଗୁଳୁଗୁଳି ନେଇ ଆଲର୍ଟ ଜାରି ହୋଇଛି ।

• ୧୩ ଜିଲ୍ଲାରୁ ୟେଲୋ ଆଲର୍ଟ

ମୟୂରଭଞ୍ଜ, କେନ୍ଦୁଝର, ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡ଼ା, ଜଗତସିଂହପୁର, କଟକ, ଖୋର୍ଦ୍ଧା, ପୁରୀ, ନୟାଗଡ଼, ଗଞ୍ଜାମ, ଗଜପତି ଜିଲ୍ଲାକୁ ସତର୍କ ରହିବାକୁ ଆଲର୍ଟ କରାଯାଇଛି । ଏହି ଜିଲ୍ଲାରେ ଆଜି ପ୍ରବଳ ଗରମ ସାଙ୍ଗକୁ ଗୁଳୁଗୁଳି ହେବ ବୋଲି ହଳଦିଆ ଚେତାବନୀ ଜାରି କରାଯାଇଛି । ଖରାବେଳେ ଅତି ଆବଶ୍ୟକ ନଥିଲେ ଘରୁ ନ ବାହାରିବାକୁ ପାଣିପାଗ ବିଭାଗ ପକ୍ଷରୁ କୁହାଯାଇଛି ।

• ଏଥର ଆଗୁଆ ଖରା ଛୁଟି

ଖରାକୁ ଦେଖି ଏପ୍ରିଲ୨୭ରୁ ଆଗୁଆ ଖରା ଛୁଟି ଘୋଷଣା କରିଛନ୍ତି ରାଜ୍ୟ ସରକାର । ରାଜ୍ୟର ସମସ୍ତ ସରକାରୀ, ସରକାରୀ ଅନୁଦାନ ପ୍ରାପ୍ତ ଓ ବେସରକାରୀ ବିଦ୍ୟାଳୟ ବନ୍ଦ ରହିବ । ପୂର୍ବ ନିର୍ଦ୍ଧାରିତ ପରୀକ୍ଷା, ଜନଗଣନା କାର୍ଯ୍ୟ ଓ ଅନ୍ୟାନ୍ୟ ଅଫିସ କାମ ପୂର୍ବ ପରି ଜାରି ରହିବ । ପ୍ରଥମେ ପର୍ଯ୍ୟାୟ କ୍ରମେ ଗୋଟିଏ ପରେ ଗୋଟିଏ ଜିଲ୍ଲାରେ ସ୍କୁଲି, କଲେଜ ଛୁଟି ଘୋଷଣା ହେଉଥିଲା । ଏହାପରେ ଏବେ ସମସ୍ତ ସ୍କୁଲକୁ ବନ୍ଦ କରାଯାଇଛି ।

ଅଧିକ ଖବର ପଢନ୍ତୁ...