Heavy Rain Alert / ବଙ୍ଗୋପସାଗରରେ ନୂଆ ସାଇକ୍ଲୋନିକ ସିଷ୍ଟମ୍ ସକ୍ରିୟ; ଉପକୂଳରୁ ଆଭ୍ୟନ୍ତରୀଣ ପ୍ରବଳ ବର୍ଷିବ

ଜୁନ୍ ମାସରେ ଓଡ଼ିଶାରେ ସ୍ୱାଭାବିକଠାରୁ ପ୍ରାୟ ୪୭ ପ୍ରତିଶତ କମ୍ ବର୍ଷା ରେକର୍ଡ କରାଯାଇଥିବା ବେଳେ, ଜୁଲାଇ ପ୍ରାରମ୍ଭରୁ ରାଜ୍ୟ ପାଇଁ ଏକ ବଡ଼ ଆଶ୍ଵାସନାଜନକ ସୂଚନା ମିଳିଛି । ବଙ୍ଗୋପସାଗରରେ ଏକ ନୂଆ ସାଇକ୍ଲୋନିକ ସିଷ୍ଟମ୍ ସକ୍ରିୟ ହେଉଥିବାରୁ ଆଗାମୀ ଦିନରେ ରାଜ୍ୟରେ ପ୍ରବଳ ବର୍ଷାର ପୂର୍ବାନୁମାନ କରାଯାଇଛି । ଆସନ୍ତା ୭ ଦିନ ମଧ୍ୟରେ ଓଡ଼ିଶାରେ ଭଲ ବର୍ଷା ହେବ ବୋଲି ସୂଚନା ଦେଇଛନ୍ତି ଭାରତୀୟ ପାଣିପାଗ ବିଭାଗ (IMD)ର ମହାନିର୍ଦ୍ଦେଶକ ଡକ୍ଟର ମୃତ୍ୟୁଞ୍ଜୟ ମହାପାତ୍ର ।

• ଆସୁଛି ଲଘୁଚାପ

ଉତ୍ତର ବଙ୍ଗୋପସାଗର ଏବଂ ସଂଲଗ୍ନ ବାଂଲାଦେଶ ଉପରେ ଏକ ଘୂର୍ଣ୍ଣିବଳୟ କେନ୍ଦ୍ରୀଭୂତ ରହିଛି, ଏହା ଫଳରେ ଆସନ୍ତା ଜୁଲାଇ ୩ ତାରିଖ ବେଳକୁ ଉତ୍ତର-ପଶ୍ଚିମ ବଙ୍ଗୋପସାଗର (ଉତ୍ତର ଓଡ଼ିଶା ଓ ପଶ୍ଚିମବଙ୍ଗ ପାଖାପାଖି ଅଞ୍ଚଳ)ରେ ଏକ ଲଘୁଚାପ କ୍ଷେତ୍ର ସୃଷ୍ଟି ହେବ । ଏହି ଲଘୁଚାପଟି ଧୀରେ ଧୀରେ ପଶ୍ଚିମ ଏବଂ ଉତ୍ତର-ପଶ୍ଚିମ ଦିଗକୁ ଗତି କରିବ । ବର୍ତ୍ତମାନ ଏହା କୌଣସି ଅବପାତ ବା ଗଭୀର ଅବପାତର ରୂପ ନେବାର ସମ୍ଭାବନା ନାହିଁ, ବରଂ ଏକ ସାଧାରଣ ଲଘୁଚାପ ହିସାବରେ ଗତି କରିବ। ଯଦି ଅଧିକ ଧୀର ଗତି କରିବ ବର୍ଷା ଅଧିକ ହେବ ।

ବିଶେଷ କରି ଜୁଲାଇ ୫ ତାରିଖ ପର୍ଯ୍ୟନ୍ତ ରାଜ୍ୟର ଅଧିକାଂଶ ସ୍ଥାନରେ ବର୍ଷା ହେବା ସହ କେତେକ ଜାଗାରେ ପ୍ରବଳରୁ ଅତି ପ୍ରବଳ ବର୍ଷାର ସମ୍ଭାବନା ରହିଛି । ସମଗ୍ର ଜୁଲାଇ ମାସର ପୂର୍ବାନୁମାନ ଅନୁଯାୟୀ, ଉପକୂଳଠାରୁ ଆରମ୍ଭ କରି ଆଭ୍ୟନ୍ତରୀଣ ଓଡ଼ିଶା ପର୍ଯ୍ୟନ୍ତ, ବିଶେଷ କରି କେନ୍ଦ୍ରୀୟ ଅଞ୍ଚଳ (ମଧ୍ୟ ଓଡ଼ିଶା)ରେ ସ୍ୱାଭାବିକ କିମ୍ବା ସ୍ୱାଭାବିକଠାରୁ ଅଧିକ ବର୍ଷା ହେବ ଯାହାକି ଆଶ୍ବସ୍ତିକର ଖବର । ଓଡ଼ିଶାର ଉଚ୍ଚଭୂମି ଓ ପୂର୍ବଘାଟ ପର୍ବତମାଳା ଭଳି ଭୌଗୋଳିକ ସ୍ଥିତି ମୌସୁମୀ ବାୟୁ ସହ ପ୍ରତିକ୍ରିୟା କରୁଥିବାରୁ, ଆଭ୍ୟନ୍ତରୀଣ ଓଡ଼ିଶାରେ ଉପକୂଳ ଅପେକ୍ଷା ଅଧିକ ବର୍ଷାର ସମ୍ଭାବନା ରହିଛି ।

• ଚାଷୀଙ୍କ ପାଇଁ ଖୁସି ଖବର

ଜୁଲାଇ ମାସର ପ୍ରଥମ ଦୁଇ ସପ୍ତାହର ବର୍ଷା ଓଡ଼ିଶାର ଧାନ ଚାଷ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଜୁନ ମାସର ନିଅଣ୍ଟିଆ ବର୍ଷାକୁ ଭରଣା କରିବାରେ ଏହି ଲଘୁଚାପ ସହାୟକ ହେବ । ଏହା ଚାଷୀମାନଙ୍କୁ ଧାନ ତଳି ରୋପଣ ଏବଂ ବୁଣା କାର୍ଯ୍ୟ ସୁଚାରୁରୂପେ କରିବାରେ ବେଶ୍ ସାହାଯ୍ୟ କରିପାରେ ।

• ସେପ୍ଟେମ୍ବରକୁ ଶକ୍ତିଶାଳୀ ହେବ ଏଲନିନୋ

ଗ୍ଲୋବାଲ୍ ପାଣିପାଗ ସ୍ଥିତିକୁ ଦେଖିଲେ, ଜୁନ ୧୦ ତାରିଖରେ ଏକ ଦୁର୍ବଳ ଏଲ୍‌ନିନୋ ସ୍ଥିତି ସୃଷ୍ଟି ହୋଇଥିବା ଘୋଷଣା କରାଯାଇଥିଲା । ବର୍ତ୍ତମାନ ଏହାର ତୀବ୍ରତା ଧୀରେ ଧୀରେ ବଢୁଛି । ଜୁଲାଇ ଏବଂ ଅଗଷ୍ଟରେ ଏହା 'ମଧ୍ୟମ' (Moderate) ସ୍ଥିତିରେ ରହିବ ଏବଂ ସେପ୍ଟେମ୍ବର ବେଳକୁ ଏହା ଏକ 'ଶକ୍ତିଶାଳୀ' (Strong) ଏଲ୍‌ନିନୋରେ ପରିଣତ ହେବ, ଯାହା ପାଣିପାଗ ଉପରେକୁ ପ୍ରଭାବ ପକାଇପାରେ ।

ପଢନ୍ତୁ ଏହି ଖବର: ଜୁଲାଇ ୩ ବେଳକୁ ବଙ୍ଗୋପସାଗରରେ ଲଘୁଚାପ ସମ୍ଭାବନା; ୧୧ ଜିଲ୍ଲାକୁ ୱାର୍ଣ୍ଣିଂ ଜାରି

ତେବେ ଏହାର ପ୍ରତିକାର ସ୍ୱରୂପ ଭାରତ ମହାସାଗରରେ 'ଇଣ୍ଡିଆନ୍ ଓସେନ୍ ଡାଇପୋଲ୍' (IOD) ସେପ୍ଟେମ୍ବର ମାସ ଆଡ଼କୁ ନିଉଟ୍ରାଲ୍‌ରୁ 'ପଜିଟିଭ୍' (Positive IOD) ସ୍ଥିତିକୁ ଗତି କରିବା ନେଇ ପୂର୍ବାନୁମାନ କରାଯାଇଛି । ପଜିଟିଭ୍ ଆଇଓଡି ପ୍ରଭାବରେ ସୋମାଲିଆ ଓ ଆରବ ସାଗର ଅଞ୍ଚଳରେ ସମୁଦ୍ର ପୃଷ୍ଠର ତାପମାତ୍ରା ବୃଦ୍ଧି ପାଏ, ଯାହା ଦକ୍ଷିଣ ଗୋଲାର୍ଦ୍ଧରୁ ମୌସୁମୀ ବାୟୁକୁ ଭାରତ ଆଡ଼କୁ ଅଧିକ ସକ୍ରିୟ ଭାବେ ପ୍ରବାହିତ କରାଏ । ଏହା ଏଲ୍‌ନିନୋର ପ୍ରଭାବକୁ ରୋକିବାରେ ସମର୍ଥ ହେବ, ଯାହା ସେପ୍ଟେମ୍ବର ଏବଂ ଅକ୍ଟୋବର ମାସରେ ଚାଷ କାର୍ଯ୍ୟ ପାଇଁ ବେଶ୍ ଶୁଭଦାୟକ ହେବ ।

• ବର୍ଷା ନହେଲେ କଲବଲ କରିବ ତାତି

ରାଜ୍ୟରେ ଏବେ କୌଣସି ହିଟ୍‌ୱେଭ୍ ବା ଗ୍ରୀଷ୍ମ ପ୍ରବାହର ସ୍ଥିତି ନାହିଁ । ବର୍ଷା ଯୋଗୁଁ ପ୍ରଥମ ସପ୍ତାହରେ ତାପମାତ୍ରା ନିୟନ୍ତ୍ରଣରେ ରହିବ । କିନ୍ତୁ ମୌସୁମୀ ପ୍ରବାହ ଯୋଗୁଁ ବାୟୁମଣ୍ଡଳରେ ଆର୍ଦ୍ରତା (Humidity) ଅଧିକ ରହିବ, ତେଣୁ ଜୁଲାଇ ମାସରେ ଯେଉଁ ସମୟରେ ବର୍ଷା ନହେବ, ସେହି ଦିନଗୁଡ଼ିକରେ ପ୍ରବଳ ଗୁଳୁଗୁଳି ସହ ଅସହ୍ୟ ପାଗ ଅନୁଭୂତ ହେବ ।