ବର୍ଲିନ: ଚଳିତ ବର୍ଷ ଖରା ସାରା ବିଶ୍ଵବାସୀଙ୍କୁ ହନ୍ତସନ୍ତ କରିଛି । ଏଥରୁ ବାଦ ପଡ଼ିନି ଜର୍ମାନୀ । ଏହି ୟୁରୋପୀୟ ଦେଶରେ ଚଳିତ ବର୍ଷ ପ୍ରବଳ ଗରମ ଆତଙ୍କ ସୃଷ୍ଟି କରିଛି । କେବଳ ଏହି ବର୍ଷ ୫,୧୨୦ ଜଣଙ୍କ ଜୀବନ ଯାଇଛି । ମହିଳାମାନେ ସବୁଠାରୁ ଅଧିକ ପ୍ରଭାବିତ ହୋଇଛନ୍ତି । ପୁରୁଷଙ୍କ ତୁଳନାରେ ଗରମରେ ଅଧିକ ମହିଳା ମୃତ୍ୟୁବରଣ କରିଥିବା ପରିସଂଖ୍ୟାନ ଦର୍ଶାଉଛି ।

ଜନସ୍ୱାସ୍ଥ୍ୟ ପାଇଁ କାର୍ଯ୍ୟ କରୁଥିବା ରବର୍ଟ କଚ୍ ଇନଷ୍ଟିଚ୍ୟୁଟ୍ ଏହି ତଥ୍ୟ ସେୟାର କରିଛି । ସଂସ୍ଥା ଅନୁଯାୟୀ, ଜୁନ୍ ମାସରେ ସର୍ବାଧିକ ମୃତ୍ୟୁ ଘଟିଥିଲା, ଯେତେବେଳେ ହାରାହାରି ତାପମାତ୍ରା ବହୁତ ଅଧିକ ଥିଲା । ମୃତ୍ୟୁବରଣ କରିଥିବା ପ୍ରାୟ ୪,୨୭୦ ଜଣଙ୍କ ବୟସ ୭୫ ବର୍ଷ କିମ୍ବା ତା’ଠାରୁ ଅଧିକ ଥିଲା ।

• ଜୁନରେ ସବୁଠୁ ଅଧିକ ଗରମ

ହିଟୱେଭର ପ୍ରଭାବ କେବଳ ଜର୍ମାନୀରେ ଦେଖାଯାଇନଥିଲା, ୟୁରୋପୀୟ ସଂଘର କୋପର୍ନିକସ୍ ଜଳବାୟୁ ପରିବର୍ତ୍ତନ ସେବା ଗୁରୁବାର ଏକ ବୁଲେଟିନରେ କହିଛି ଯେ ପଶ୍ଚିମ ୟୁରୋପରେ ଜୁନ ରେକର୍ଡର ସବୁଠାରୁ ଗରମ ମାସ ଥିଲା । ଜୁନ ୨୦ରୁ ୨୮ ତାରିଖ ମଧ୍ୟରେ ଫ୍ରାନ୍ସ, ବେଲଜିୟମ, ସ୍ପେନ୍ ଏବଂ ନେଦରଲ୍ୟାଣ୍ଡରେ ହୋଇଥିବା ଗରମ ପ୍ରବାହରେ ୪୭୦୦ରୁ ଅଧିକ ଲୋକଙ୍କ ମୃତ୍ୟୁ ହୋଇଥିବା ରିପୋର୍ଟ କରାଯାଇଛି। କ୍ୟାପିଟାଲ ସିଟି ବର୍ଲିନର ଜୁନ ମାସର ଗରମ ଏତେ ତୀବ୍ର ଥିଲା ଯେ ଶନିବାର ତାପମାତ୍ରା ୩୯ ଡିଗ୍ରୀ ସେଲସିୟସରେ ପହଞ୍ଚିଥିଲା ​​। ଏହାପରେ ପୋଲିସ ସହର ଚାରିପାଖରେ ଦୁଇଟି ପାଣି ଟ୍ୟାଙ୍କର ମୁତୟନ କରି ଆଶ୍ୱସ୍ତି ଚାହୁଁଥିବା ଲୋକଙ୍କ ଉପରେ ସିଞ୍ଚନ କରିଥିଲା ।

• ୪୧.୫ ଡିଗ୍ରୀ ସେଲସିୟସ ତାପମାତ୍ରା ରେକର୍ଡ

ପୂର୍ବବର୍ତ୍ତୀ ରାଜ୍ୟ ସାକ୍ସନି-ଆନହାଲ୍ଟର ମୋକର୍ନ-ଡ୍ରେୱିଜ୍‌ ଠାରେ ୪୧.୫ ଡିଗ୍ରୀ ସେଲସିୟସ ତାପମାତ୍ରା ରେକର୍ଡ ହୋଇଥିଲା, ଯାହାକି ସର୍ବାଧିକ ଥିଲା । ଆରହସ୍ ନିକଟରେ ୩୭ ଡିଗ୍ରୀ ସେଲସିୟସ୍‌ ତାପମାତ୍ରା ରେକର୍ଡ କରାଯାଇଛି, ଯାହା ୧୮୭୪ ମସିହାରେ ମାପ ଆରମ୍ଭ ହେବା ପରଠାରୁ ସର୍ବାଧିକ ବୋଲି କୁହାଯାଉଛି । ଚେକରେ ମଧ୍ୟ ୪୦.୮ ଡିଗ୍ରୀ ସେଲସିୟସ୍‌ ତାପମାତ୍ରା ରେକର୍ଡ କରାଯାଇଛି ।

ପଢନ୍ତୁ ଏହି ଖବର: ଭୟଙ୍କର ଭୂସ୍ଖଳନ; ଭୁଶୁଭୁଶୁ ହୋଇ ଭାଙ୍ଗିଲା କୋଠା, ସାମ୍ନାକୁ ଆସିଲା ଛାତିଥରା ଭିଡିଓ

• ମହିଳା ସବୁଠୁ ଅଧିକ ପ୍ରଭାବିତ

ରବର୍ଟ କୋଚ୍ ଇନଷ୍ଟିଚ୍ୟୁଟର ସୂଚନା ଅନୁସାରେ, ମୃତକଙ୍କ ମଧ୍ୟରେ ସବୁଠୁ ଅଧିକ ମହିଳା ଅଛନ୍ତି । କାରଣ ଜର୍ମାନୀର ବୃଦ୍ଧ ଜନସଂଖ୍ୟାରେ ଅଧିକ ଭାଗ ମହିଳା ଅଛନ୍ତି । ୪୨୭୦ ମୃତକଙ୍କ ମଧ୍ୟରୁ ଅଧିକ ୭୫ ବର୍ଷ ବୟସ ବା ତଦୁର୍ଦ୍ଧ୍ଵ ବୟସର ଅଛନ୍ତି । ସାଧାରଣତଃ ଜର୍ମାନୀରେ ଜୁନରେ ୨୦.୭ ଡିଗ୍ରୀ ସେଲସିୟସ ହାରାହାରି ତାପମାତ୍ରା ରହିଥାଏ । ଏଥର ତାପମାତ୍ରା ୪୧ ଡିଗ୍ରୀ ସେଲସିୟସ ହେବାପରେ ଏଠାକାର ନାଗରିକ ଖରାକୁ ସହ୍ୟ କରିପାରିନାହାନ୍ତି । ବିଶ୍ଵ ସ୍ଵାସ୍ଥ୍ୟ ସଂଗଠନ ପ୍ରବଳ ଖରାରେ ଅସହ୍ୟ ହୋଇପଡ଼ି ହୋଇଥିବା ମୃତ୍ୟୁକୁ 'ନିରବ ମୃତ୍ୟୁ' ବୋଲି କହିଛି । ଆଗାମୀ ଦିନରେ ମୃତ୍ୟୁ ସଂଖ୍ୟା ରୋକିବା ପାଇଁ ଆବଶ୍ୟକୀୟ ପଦକ୍ଷେପ ଗ୍ରହଣ କରିବାକୁ ସ୍ଥାନୀୟ ପ୍ରଶାସନକୁ ନିର୍ଦ୍ଦେଶ ଦେଇଛି ।