Argus News - ଆଜିଠୁ ବଦଳିବ ପାଗର ମିଜାଜ୍; ସକ୍ରିୟ ହେଲା ଘୂର୍ଣ୍ଣିବଳୟ

ତାତିରୁ ମିଳିବ ତ୍ରାହି । ଆଜିଠୁ ବଦଳିବ ପାଗର ମିଜାଜ୍ । କାଳବୈଶାଖୀ ବର୍ଷା ନେଇ ସତର୍କ କଲା ପାଣିପାଗ ବିଭାଗ । ଓଡିଶା ଉପରେ ଏକ ଘୂର୍ଣ୍ଣିବଳୟ ସକ୍ରିୟ ରହିଛି । ଉତ୍ତର ଓଡ଼ିଶା ଓ ଏହାର ସଂଲଗ୍ନବର୍ତ୍ତୀ ପଶ୍ଚିମବଙ୍ଗ ଅଞ୍ଚଳ ଦେଇ ଏକ ଘୂର୍ଣ୍ଣିବଳୟ ରହିଛି । ଫଳରେ ବଙ୍ଗୋପସାଗରରୁ ଜଳୀୟବାଷ୍ପ ରାଜ୍ୟକୁ ପ୍ରବେଶ କରିବ । ଯାହା କାଳବୈଶାଖୀ ବର୍ଷା କରିବାରେ ସହାୟକ ହେବ । ଯାହାର ପ୍ରଭାବରେ ବିଭିନ୍ନ ସ୍ଥାନରେ ବର୍ଷା ହୋଇଥିବା ବେଳେ ଆସନ୍ତା ୨୪ ଘଣ୍ଟା ପାଇଁ ପ୍ରବଳ ବର୍ଷା ସହ ସହ ବିଜୁଳି ଘଡଘଡି ନେଇ ଆକଳନ କରାଯାଇଛି ।

ଏଥିଲାଗି ବାଲେଶ୍ଵର, କଟକ, କେନ୍ଦ୍ରାପଡ଼ା, ଜଗତସିଂହପୁର, ଯାଜପୁର, ଭଦ୍ରକ, ମୟୂରଭଞ୍ଜ, କେନ୍ଦୁଝର ଜିଲ୍ଲାକୁ ଜାରି ହୋଇଛି ହଳଦିଆ ଚେତାବନୀ । ଏହି ସମୟରେ ୩୦ରୁ ୪୦ କିମି ପବନ ବହିବାର ସମ୍ଭାବନା ରହିଛି । ସେହିପରି ଆସନ୍ତାକାଲି ପାଇଁ ୪ ଜିଲ୍ଲା ଅର୍ଥାତ କେନ୍ଦୁଝର, ଭଦ୍ରକ, ବାଲେଶ୍ଵର, ମୟୂରଭଞ୍ଜ ଜିଲ୍ଲାରେ ପ୍ରବଳ ବର୍ଷା ସହ ବିଜୁଳି ଘଡଘଡି ହେବାର ସମ୍ଭାବନା ଥିବାରୁ ଜାରି ହୋଇଛି ହଳଦିଆ ଚେତାବନୀ ।

ଅନ୍ୟପଟେ ବିଜୁଳି ଘଡଘଡି ସମୟରେ ବାହାରକୁ ନ ବାହାରିବା ସହ ଗଛ ତଳେ ଛିଡା ହୁଅନ୍ତୁ ନାହିଁ । ବିଜୁଳି ଘଡ଼ଘଡ଼ି ଆସିଲେ ପକ୍କାଘରକୁ ଚାଲି ଯାଆନ୍ତୁ ଏବଂ ସୁରକ୍ଷିତ ସ୍ଥାନରେ ଥିବା ନିଶ୍ଚିତ କରନ୍ତୁ ବୋଲି ଉପଦେଶ ଦେଇଛନ୍ତି ଆଞ୍ଚଳିକ ପାଣିପାଗ ବିଭାଗ । ଏହା ପରେ ଦିନ ତାପମାତ୍ରା ୧ରୁ ୨ ଡିଗ୍ରୀ ହ୍ରାସ ହେବାର ସମ୍ଭାବନା ରହିଛି । ଏ ନେଇ ଭୁବନେଶ୍ଵର ଆଞ୍ଚଳିକ ପାଣିପାଗ ବିଭାଗର ବୈଜ୍ଞାନିକ ସଞ୍ଜୀବ ଦ୍ଵିବେଦୀ ସୂଚନା ଦେଇଛନ୍ତି । 

ମାର୍ଚ୍ଚ ମାସ ଆରମ୍ଭରୁ ରାଜ୍ୟରେ ତାତି ବଢିଛି । ଦିନ ୧୧ଟା ପରେ ଘରୁ ବାହାରିବା ଅସମ୍ଭାଳ ହେଲାଣି । କିଛି ଦିନ ତଳେ ରାଜ୍ୟର ୧୭ଟି ସ୍ଥାନରେ ୩୫ ଡିଗ୍ରୀ ତାପମାତ୍ରା ରେକର୍ଡ କରାଯାଇଛି । ଆଗକୁ ଏଥର ତାତି ଅସହ୍ୟ ହେବ ବୋଲି ଆଶଙ୍କା କରାଯାଉଛି । ତାତି ଅସହ୍ୟ ହେବା ପୂର୍ବରୁ ରାଜ୍ୟରେ ସକ୍ରିୟ ହୋଇଛି ଘୂର୍ଣ୍ଣିବଳୟ । ବର୍ଷା ହେବା ଫଳରେ ଅନେକଙ୍କୁ ତାତିରୁ ରକ୍ଷା ମିଳିବ । 

ଅଧିକ ଖବର ପଢନ୍ତୁ...