Rajnagar Flood / ବତୁରା କାନ୍ଥକୁ ଓଦା ଚୁଲି; ବନ୍ୟା ପରେ ଫେରୁଛି ଜୀବନ, ତଥାପି ପିଛା ଛାଡ଼ିନି ଯନ୍ତ୍ରଣା

କେନ୍ଦ୍ରାପଡ଼ା: ଚୁଲିରୁ ପାଣି ଶୁଖିଛି ହେଲେ ବତୁରା ମାଟିରେ ଭୋକ ମେଣ୍ଟାଇବାର ସଂଘର୍ଷ ସରିନି । ଓଦା ଚୁଲିରେ ନିଆଁ ଧରାଇବାକୁ ଫୁଙ୍କି ଫୁଙ୍କି ହାଲିଆ ହେଲେଣି । ଘର ବାରଣ୍ଡାରୁ ଖସିଥିଲେ ବି ରାସ୍ତାରେ ଏବେ ବି ଅଣ୍ଟାଏ ଉଚ୍ଚର ପାଣି । ଯାହା ଭିତରେ ପଶି ଦଦରା ସ୍ବପ୍ନ ସଜାଡ଼ିବାରେ ଲାଗିପଡ଼ିଛନ୍ତି ବନ୍ୟା ପ୍ରଭାବିତ ଲୋକେ । ବ୍ରାହ୍ମଣୀ ଓ ବୈତରଣୀର ବନ୍ୟା କେନ୍ଦ୍ରାପଡ଼ା ଜିଲ୍ଲା ରାଜନଗର ବ୍ଲକର ଅନେକ ଅଞ୍ଚଳକୁ ବୁଡ଼ାଇଛି ।

• ବନ୍ୟା ଗଲା ପରେ କେମିତି ବିତୁଛି ରାତି ?

ବତୁରା ଭାଗ୍ୟକୁ ନେଇ ବଞ୍ଚୁଥିବା ଲୋକଙ୍କ ନିକଟରେ ପହଞ୍ଚି ସେମାନଙ୍କ ସମସ୍ୟାକୁ ଅତି ନିକଟରୁ ଦେଖିଛି ଅର୍ଗସ । ପାଣି ଖସିଛି ସତ ହେଲେ ଦୁର୍ଦ୍ଦଶା ପିଛା ଛାଡୁନି । ଦିନେ ଯେଉଁ ମାଟି ଘର ଭିତରେ ଅଣ୍ଟାଏ ଉଚ୍ଚର ବନ୍ୟାପାଣି ଚାଲୁଥିଲା । ଏବେ ପାଣି ରାସ୍ତା ଯାଏ ଖସିଛି ହେଲେ ପଛରେ ଛାଡ଼ି ଦେଇଯାଇଛି ଅନେକ ଯନ୍ତ୍ରଣା ଅନେକ କଷ୍ଟ । କାଦୁଅ ପଚ ପଚ ଚଟାଣରେ ଚଳିବା ସମ୍ଭବ ହେଉନଥିବାରୁ ବାଉଁଶ ଭେଳା ଉପରେ ଜୀବନ ବିତୁଛି । ଛାତିଏ ପାଣିରେ ପଶି ଜୀବନ ବଞ୍ଚିବାର ସଂଘର୍ଷ ଏବେ ବି ଜାରି ରହିଛି ।

• ଭରସା ପାଲଟିଛି ଶୁଖିଲା ଚୁଡ଼ା

ଉଜୁଡ଼ା ଦିନର ସ୍ମୃତିକୁ ଭଙ୍ଗା କାନ୍ଥରେ ମାଟି ଲେପ ଦେଇ ଲୁଚାଇବାର ଚେଷ୍ଟା ଚାଲିଛି । ଏବେ ବି ରନ୍ଧା ଖାଦ୍ୟ ଏମାନଙ୍କ ପାଇଁ ସ୍ବପ୍ନ ପାଲଟିଛି । ଶୁଖିଲା ଚୁଡ଼ାରେ ବଞ୍ଚିଛି ଜୀବନ । ସାହାରା ଖୋଜୁଥିବା ମଣିଷ ପାଖରେ ଦେବଦୂତ ସାଜି ଛିଡ଼ା ହୋଇଛି ପ୍ରଶାସନ । ଗତକାଲି ଓଳାଭର ପଞ୍ଚାୟତର ନରସିଂହପୁର ଗାଁରେ ମହିଳାଙ୍କ ସ୍ବାସ୍ଥ୍ୟାବସ୍ଥା ବିଗିଡ଼ିବା ପରେ ଆଣ୍ଠୁଏ ପାଣିରେ ପଶି ସହାୟତା ଯୋଗାଇଛନ୍ତି ତହସିଲଦାର ଭାନୁମତି ମାଝୀ । ଆମ୍ବୁଲାନ୍ସ ଆସି ପାରୁନଥିବାରୁ ନିଜେ ଅଗ୍ନିଶମ ବିଭାଗକୁ ସୂଚନା ଦେବା ସହ ସେମାନଙ୍କ ସହ ଯାଇ ମହିଳାଙ୍କୁ ଯୋଗାଇଥିଲେସ ସହାୟତା ।

ପଢନ୍ତୁ ଏହି ଖବର: ବୈତରଣୀ ଉପରେ ସରକାରଙ୍କ ସ୍ପେଶାଲ ଫୋକସ୍, ନଦୀ ବନ୍ଧ ହେବ ଚଉଡ଼ା ଓ ଉଚ୍ଚା

ବଢ଼ି ପାଣିରେ ସୁଅରୁ ଜୀବନ ସାଉଣ୍ଟିବାର ଚେଷ୍ଟା ଜାରି ରଖିଛନ୍ତି ରାଜନଗର ବ୍ଲକର ଅଧିବାସୀ । ଖସୁଛି ପାଣି, ଫେରୁଛି ଜୀବନ । ପୁଣି ଅଣ୍ଟା ସଳଖି ଛିଡ଼ା ହେବାର ଆଶା ସହ ବୁଣା ଚାଲିଛି । ଗୋଟିଏ ପଟେ ପାଣି ଛାଡ଼ିନଥିବାବେଳେ ଏପଟେ ଉତ୍ତରପଶ୍ଚିମ ବଙ୍ଗୋପସାଗର ସୃଷ୍ଟି ହୋଇଛି ଲଘୁଚାପ । ପ୍ରବଳ ବର୍ଷା ନେଇ ଆସନ୍ତା ୨୪ ଘଣ୍ଟା ପାଇଁ କେନ୍ଦ୍ରାପଡ଼ା ଜିଲ୍ଲାକୁ ଅରେଞ୍ଜ ୱାର୍ଣ୍ଣିଂ ଜାରି କରିଛି ଭୁବନେଶ୍ଵର ଆଞ୍ଚଳିକ ପାଣିପାଗ ବିଭାଗ ।