Odisha Weather / ଦୁର୍ବଳ ହେଲା ଲଘୁଚାପ; କାଁ ଭାଁ କିଛି ସ୍ଥାନରେ ବର୍ଷା ସମ୍ଭାବନା

ଭୁବନେଶ୍ଵର: ରାଜ୍ୟରୁ ଦୁର୍ବଳ ହେଲା ଲଘୁଚାପର ପ୍ରଭାବ । ତେଲେଙ୍ଗାନା ଏବଂ ସଂଲଗ୍ନ ଆନ୍ଧ୍ରପ୍ରଦେଶ ଉପରେ ରହିଥିବା ଲଘୁଚାପ କ୍ଷେତ୍ର ଏବେ ଦୁର୍ବଳ ହୋଇଯାଇଛି । ତେବେ ଆଗାମୀ ୨୪ ଘଣ୍ଟା ମଧ୍ୟରେ ଓଡ଼ିଶାର କିଛି ସ୍ଥାନରେ ହାଲୁକାରୁ ମଧ୍ୟମ ବର୍ଷା ସହ ଘଡ଼ଘଡ଼ି ଓ ବିଜୁଳି ମାରିବାର ସମ୍ଭାବନା ରହିଛି । ତେବେ ୮ ତାରିଖରୁ ରାଜ୍ୟରେ ତାପମାତ୍ରା ୨ରୁ ୪ ଡିଗ୍ରୀ ହ୍ରାସ ପାଇବ । ଫଳରେ ରାଜ୍ୟରେ ଅନୁଭୂତ ହୋଇପାରେ ଶୀତ ।

ଆସନ୍ତାକାଲି କୋରାପୁଟ, ମାଲକାନଗିରି, ରାୟଗଡ଼ା, ଗଞ୍ଜାମ ଓ ଗଜପତି ଜିଲ୍ଲାର କିଛି ସ୍ଥାନରେ ଘଡ଼ଘଡ଼ି ସହ ହାଲୁକାରୁ ମଧ୍ୟମ ବର୍ଷା ହୋଇପାରେ । ନଭେମ୍ବର ୭ ତାରିଖରେ ମଧ୍ୟ ଏହି ୫ଟି ଜିଲ୍ଲାର କାଁ ଭାଁ ସ୍ଥାନରେ ବର୍ଷା ସମ୍ଭାବନା ରହିଛି । ଅନ୍ୟ ଜିଲ୍ଲାଗୁଡ଼ିକରେ ପାଗ ମୁଖ୍ୟତଃ ଶୁଖିଲା ରହିବ । ସେହିପରି ୮ ତାରିଖରୁ ୧୧ ତାରିଖ ଯାଏଁ ରାଜ୍ୟରେ ପାଗ ମୁଖ୍ୟତଃ ଶୁଖିଲା ରହିବ । ଏହି ସମୟ ପାଇଁ କୌଣସି ପାଣିପାଗ ଚେତାବନୀ ଜାରି କରାଯାଇନାହିଁ ।

• ରାତି ତାପମାତ୍ରା କମିବ

ଅନ୍ୟପଟେ ରାଜ୍ୟରେ ରାତି ତାପମାତ୍ରା ଆଗାମୀ ୨୪ ଘଣ୍ଟା ଯାଏଁ ବିଶେଷ ପରିବର୍ତ୍ତନ ହେବନାହିଁ । ତେବେ ୬ରୁ ୮ ତାରିଖ ମଧ୍ୟରେ ରାତି ତାପମାତ୍ରା ୨ରୁ ୪ ଡିଗ୍ରୀ ସେଲସିୟସ୍ ହ୍ରାସ ପାଇପାରେ । ଏହାପରେ ତାପମାତ୍ରାରେ ବିଶେଷ ପରିବର୍ତ୍ତନ ହେବନାହିଁ । ଚଳିତ ବର୍ଷ ନଭେମ୍ବର ମାସରେ ମଧ୍ୟ ଶୀତ ଅନୁଭୂତ ହୋଇନାହିଁ । ସାଧାରଣତଃ କାର୍ତ୍ତିକ ମାସ ଆସିଲେ ରାଜ୍ୟରେ ଶୀତ ଅନୁଭୂତ ହୁଏ । ମାତ୍ର ଚଳିତ ବର୍ଷ ବର୍ଷା ଏଯାଏଁ ଛାଡ଼ିନଥିବାବେଳେ ଶୀତ ମଧ୍ୟ ଅନୁଭୂତ ହେଉନାହିଁ ।

ପଢନ୍ତୁ ଏହି ଖବର: ଭୂସ୍ଖଳନ ମୃତାହତ ରୋକିବାକୁ ସରକାରଙ୍କ ବଡ଼ ପ୍ଲାନ୍; ସ୍ଥାନାନ୍ତର ହେବ ସମ୍ପୂର୍ଣ୍ଣ ଗାଁ

• କଟକରେ ସର୍ବାଧିକ ବର୍ଷା ରେକର୍ଡ

ଗତ ୨୪ ଘଣ୍ଟାରେ ମୈଦାନୀ ଅଞ୍ଚଳ ମଧ୍ୟରେ ପାରଳାଖେମୁଣ୍ଡିରେ ସର୍ବନିମ୍ନ ୧୭.୫ ଡିଗ୍ରୀ ଏବଂ ପାହାଡ଼ିଆ ଅଞ୍ଚଳ ଦାରିଙ୍ଗବାଡ଼ିରେ ୧୭ ଡିଗ୍ରୀ ସେଲସିୟସ୍ ତାପମାତ୍ରା ରେକର୍ଡ ହୋଇଛି । ଏହି ସମୟରେ କଟକ ଜିଲ୍ଲାରେ ସର୍ବାଧିକ ୫୫ ମିଲିମିଟର ଏବଂ ବରଗଡ଼ ଜିଲ୍ଲାରେ ୫୪ ମିଲିମିଟର ବର୍ଷା ରେକର୍ଡ ହୋଇଛି । ସେପଟେ ଆଗାମୀ ଦିନରେ ଆଉ ଏକ ଲଘୁଚାପ ସୃଷ୍ଟି ନେଇ ଚର୍ଚ୍ଚା ହେଉଥିବା ବେଳେ, ଏ ସମ୍ପର୍କରେ ଏଯାଏଁ ଭାରତୀୟ ପାଣିପାଗ ବିଭାଗ ପକ୍ଷରୁ କୌଣସି ନୂଆ ସୂଚନା ଜାରି କରାଯାଇନାହିଁ । ରାତି ତାପମାତ୍ରା ହ୍ରାସ ପାଉଥିବାରୁ ଖୁବଶୀଘ୍ର ରାଜ୍ୟରେ ଶୀତ ଅନୁଭୂତ ହୋଇପାରେ ।