October Cyclone Update / ଆସୁଛି କି ବାତ୍ୟା ? ଅକ୍ଟୋବର ଶେଷ ବେଳକୁ ବଦଳିବ କି ରାଜ୍ୟର ପାଣିପାଗ

ଭୁବନେଶ୍ଵର: ମାସ ଶେଷ ବେଳକୁ ବଦଳିବ କି ରାଜ୍ୟର ପାଣିପାଗ । ଆସିବ କି ବାତ୍ୟା ? ଏବେଠୁ ସ୍ପଷ୍ଟ ଆକଳନ ହୋଇନଥିବା ବେଳେ ଭାରତୀୟ ପାଣିପାଗ ବିଭାଗର ଆକଳନ ୨୧ ତାରିଖବେଳକୁ ଆଣ୍ଡାମାନ ସାଗରରେ ଏକ ଘୂର୍ଣ୍ଣିବଳୟ ସୃଷ୍ଟି ହେବା ସମ୍ଭାବନା ଅଛି । ୨୪ ତାରିଖ ବେଳକୁ ଦକ୍ଷିଣ-ପୂର୍ବ ବଙ୍ଗୋପସାଗରରେ ଲଘୁଚାପ ହୋଇପାରେ । ଆଗକୁ ଏହାର ତୀବ୍ରତା, ସମ୍ଭାବ୍ୟ ଗତିପଥ ନେଇ ପାଣିପାଗ ବିଭାଗ କିଛି ସ୍ପଷ୍ଟ କରିନଥିବା ବେଳେ ବିଭିନ୍ନ ମଡେଲର ବାତ୍ୟା ପୂର୍ବାନୁମାନ ଓ ଅକ୍ଟୋବର ସଂଯୋଗ ବଢ଼ାଇଛି ଡର ।

ବିଭିନ୍ନ ଆନ୍ତର୍ଜାତିକ ପାଣିପାଗ ମଡେଲର ତାଜା ପୂର୍ବାନୁମାନ ହେଲା, ବଙ୍ଗୋପସାଗରରେ ଚଳିତ ମାସ ଶେଷବେଳକୁ ଆସିପାରେ ବାତ୍ୟା । କିନ୍ତୁ ଭାରତୀୟ ପାଣିପାଗ ବିଭାଗ ପକ୍ଷରୁ ଏଯାଏଁ କୌଣସି ସୂଚନା ଦିଆଯାଇନାହିଁ । ପ୍ରତିବର୍ଷ ଅକ୍ଟୋବର ମାସରେ ବାତ୍ୟା ଭୟ ଉପକୂଳିଆ ଲୋକଙ୍କୁ ଡରାଇଥାଏ । ଏହାରି ଭିତରେ ଅନ୍ତର୍ଜାତୀୟ ପାଣିପାଗ ରିପୋର୍ଟ ଚିନ୍ତା ବଢାଉଛି । ମାତ୍ର ଯେପର୍ଯ୍ୟନ୍ତ ଭାରତୀୟ ପାଣିପାଗ ବିଭାଗ IMD ପକ୍ଷରୁ ସତର୍କ ନ କରାଯାଇଛି, ସେପର୍ଯ୍ୟନ୍ତ ଏନେଇ କିଛି କହିହେବ ନାହିଁ।

• ଏହି ଜିଲ୍ଲାରେ ବର୍ଷା ହେବ

ରାଜ୍ୟରେ ଏବେ ସକ୍ରିୟ ରହିଛି ଟ୍ରପ୍ ଲାଇନ୍ । ଏହାସହ ଉପରି ବାୟୁମଣ୍ଡଳରେ ଘୂର୍ଣ୍ଣିବଳୟ ପ୍ରଭାବରେ ଆସନ୍ତା ୨୪ ଘଣ୍ଟା ମଧ୍ୟରେ ଉପକୂଳ ଏବଂ ଆଭ୍ୟନ୍ତରୀଣ ଓଡ଼ିଶାରେ ବର୍ଷା ହୋଇପାରେ । କେନ୍ଦ୍ରାପଡ଼ା, ଜଗତସିଂହପୁର, ପୁରୀ,ଗଞ୍ଜାମ,ଗଜପତି, ରାୟଗଡ଼ା, କୋରାପୁଟ, ମାଲକାନଗିରି ଓ ନବରଙ୍ଗପୁର ଜିଲ୍ଲାରେ ବିଜୁଳି ଘଡ଼ଘଡ଼ି ସହ ହାଲୁକା ମଧ୍ୟମ ଧରଣର ବର୍ଷା କିମ୍ବା ସ୍ଥାନେ ସ୍ଥାନେ ପ୍ରବଳ ବର୍ଷା ହେବାର ସମ୍ଭାବନା ଥିବାରୁ ଆଂଚଳିକ ପାଣିପାଗ କେନ୍ଦ୍ର ପକ୍ଷରୁ ଜାରି ହୋଇଛି ୟେଲୋ ଆଲର୍ଟ ।

ପଢନ୍ତୁ ଏହି ଖବର: ଭିଜିବ କି ପାର୍ବଣ? ଦଶହରାରେ ବର୍ଷା ହେବ ନା ଶୁଖିଲା ରହିବ ପାଗ? ୨୨ରୁ ପୁଣି ଲଘୁଚାପ ସମ୍ଭାବନା...

• ୧୯ ତାରିଖଠାରୁ ପାଗ ଶୁଖିଲା

ଆସନ୍ତା ୨୪ ଘଣ୍ଟା ପରେ ଅର୍ଥାତ୍ ୧୯ ତାରିଖଠାରୁ ୨୫ ତାରିଖ ପର୍ଯ୍ୟନ୍ତ ପାଗ ଶୁଖିଲା ରହିବା ସହ ବର୍ଷା ହେବାର ସମ୍ଭାବନା ନାହିଁ । ଏଣୁ ଏଥର ଦଶହରାରେ ପାଗ ଶୁଖିଲା ରହିବ । ଏହାସହିତ ଆସନ୍ତା ୬ରୁ ୭ ଦିନ ପର୍ଯ୍ୟନ୍ତ ଦିନ ଓ ରାତି ତାପମାତ୍ରାରେ ସେପରି କୌଣସି ବଡ଼ ଧରଣର ପରିବର୍ତ୍ତନ ହେବ ନାହିଁ । ରାଜଧାନୀରେ ଏବେ ଦିନ ତାପମାତ୍ରା ୩୪ ଡିଗ୍ରୀ ସେଲସିୟସ ରହୁଥିବାବେଳେ ସର୍ବନିମ୍ନ ତାପମାତ୍ରା ୨୪ ଡିଗ୍ରୀ ସେଲସିୟସ ରହୁଛି । ସେହିପରି କଟକରେ ସର୍ବାଧିକ ତାପମାତ୍ରା ୩୩ ଡିଗ୍ରୀ ସେଲସିୟସ ଓ ସର୍ବନିମ୍ନ ତାପମାତ୍ରା ୨୫ ଡିଗ୍ରୀ ସେଲସିୟସ ରହୁଛି ।