ଭୁବନେଶ୍ଵର: ଆଜି ବଙ୍ଗୋପସାଗରରେ ସୃଷ୍ଟି ହୋଇପାରେ ଘୂର୍ଣ୍ଣିବଳୟ । ୧୫ରୁ ରାଜ୍ୟରେ ବଢ଼ିବ ବର୍ଷା, ଲଘୁଚାପ ସୃଷ୍ଟି ହେବାର ଚିତ୍ର ଏବେ ଅସ୍ପଷ୍ଟ ରହିଛି । ତଥାପି ଆଗକୁ ଉତ୍ତର ଓ ପଶ୍ଚିମ ଓଡ଼ିଶାରେ ଅଧିକ ବର୍ଷିବା ନେଇ ପାଣିପାଗ ବିଜ୍ଞାନୀ ଶରତ ଚନ୍ଦ୍ର ସାହୁଙ୍କ ସୂଚନା । ରଥଯାତ୍ରା ସମୟରେ ପୁରୀରେ ସେମିତି ବର୍ଷାର ଆଶଙ୍କା ନାହିଁ । ଆଜି ରାଜ୍ୟର କିଛି ଜିଲ୍ଲାରେ କାଁ ଭାଁ ବର୍ଷା ହେବା ସମ୍ଭାବନା ରହିଛି ।

• ୧୫ରୁ ରାଜ୍ୟରେ ବଢ଼ିବ ବର୍ଷା

୧୬ ତାରିଖ ବେଳକୁ ଏହା ଉତ୍ତର ପଶ୍ଚିମ ଦିଗକୁ ଗତିକରି ପଶ୍ଚିମବଙ୍ଗ କିମ୍ବା ଓଡ଼ିଶା ଝାଡ଼ଖଣ୍ଡ ବର୍ଡ଼ର ଆଡ଼କୁ ଗତି କରିବ । ଅଧିକ ଘନୀଭୂତ ହେଲେ ୧୭ ତାରିଖ ଆଡ଼କୁ ଲଘୁଚାପରେ ପରିଣତ ହେବା ସହିତ ସାରା ଉତ୍ତର ଓ ପଶ୍ଚିମ ଓଡ଼ିଶାରେ ପ୍ରବଳ ବର୍ଷା ହେବା ନେଇ ଆକଳନ କରିଛନ୍ତି ବିଶିଷ୍ଟ ପାଣିପାଗ ବିଜ୍ଞାନୀ ଶରତ ଚନ୍ଦ୍ର ସାହୁ । ମୟୂରଭଞ୍ଜ, କେନ୍ଦୁଝର, ସୁନ୍ଦରଗଡ଼, ଝାରସୁଗୁଡ଼ା, ବରଗଡ଼, ସମ୍ବଲପୁର ଓ ବଲାଙ୍ଗୀର ଆଦି ଜିଲ୍ଲା ଗୁଡ଼ିକରେ ବର୍ଷାର ପରିମାଣ ଅଧିକ ରହିବ । ରଥଯାତ୍ରା ବେଳକୁ ପୁରୀରେ ସେମିତି ବର୍ଷାର ସମ୍ଭାବନା ନଥିବା କଥା ସେ କହିଛନ୍ତି ।

• ଦେଶରେ ମୌସୁମୀର ତାଣ୍ଡବ

ଅନ୍ୟପଟେ ଦେଶ ତମାମ ଜାରି ମୌସୁମୀର ତାଣ୍ଡବ । ଦିଲ୍ଲୀରୁ ମୁମ୍ବାଇ ଏବଂ ଉତ୍ତରାଖଣ୍ଡରୁ ରାଜସ୍ଥାନ ପର୍ଯ୍ୟନ୍ତ ମୌସୁମୀ ବର୍ଷା ଏବେ ତାଣ୍ଡବ ରଚିଛି। ଭାରତୀୟ ପାଣିପାଗ ବିଭାଗ ପକ୍ଷରୁ ଅନେକ ରାଜ୍ୟ ପାଇଁ ହାଇ ଆଲର୍ଟ ଜାରି କରାଯାଇଛି । ଉତ୍ତରାଖଣ୍ଡ ଏବଂ ହିମାଚଳ ପ୍ରଦେଶରେ ସ୍ଥିତି ସବୁଠାରୁ ସଂଗୀନ ହୋଇପଡ଼ିଛି। ପ୍ରବଳ ବର୍ଷା ଯୋଗୁଁ ଯମୁନୋତ୍ରୀ ଜାତୀୟ ରାଜପଥ ସହ ୧୨୦ରୁ ଅଧିକ ରାସ୍ତା ସମ୍ପୂର୍ଣ୍ଣ ବନ୍ଦ ରହିଛି। ଅନେକ ସ୍ଥାନରେ ପାହାଡ଼ ଧସିବା କାରଣରୁ ଯାତ୍ରୀ ଓ ପର୍ଯ୍ୟଟକମାନେ ଫସି ରହିଛନ୍ତି।

ପଢନ୍ତୁ ଏହି ଖବର: ଜର୍ମାନୀରେ 41 ଡିଗ୍ରୀ ଖରା; ୬ ମାସରେ ଗଲାଣି ୫୦୦୦ରୁ ଅଧିକ ଜୀବନ

ସେପଟେ ଦେଶର ରାଜଧାନୀ ଦିଲ୍ଲୀ ଏବଂ ଆର୍ଥିକ ରାଜଧାନୀ ମୁମ୍ବାଇରେ ପ୍ରବଳ ବର୍ଷା ଯୋଗୁଁ ରାସ୍ତାଘାଟ ବୁଡ଼ି ରହିଛି, ଯାହାଫଳରେ ଯାତାୟାତ ସମ୍ପୂର୍ଣ୍ଣ ବାଧାପ୍ରାପ୍ତ ହୋଇଛି। କେବଳ ସେତିକି ନୁହେଁ, ମଧ୍ୟପ୍ରଦେଶ, ଉତ୍ତର ପ୍ରଦେଶ, ବିହାର ଏବଂ ରାଜସ୍ଥାନରେ ମଧ୍ୟ ବନ୍ୟା ପରିସ୍ଥିତି ସୃଷ୍ଟି ହୋଇଛି। ନଦୀଗୁଡ଼ିକର ଜଳସ୍ତର ବିପଦ ସଙ୍କେତ ଉପରେ ରହିଥିବା ବେଳେ ପ୍ରଶାସନ ପକ୍ଷରୁ ଲୋକଙ୍କୁ ସତର୍କ ରହିବାକୁ କୁହାଯାଇଛି। ଆଗାମୀ ୨ରୁ ୩ ଦିନ ପର୍ଯ୍ୟନ୍ତ ଏହି ପ୍ରବଳ ବର୍ଷା ଜାରି ରହିବ ବୋଲି ପାଣିପାଗ ବିଭାଗ ଚେତାବନୀ ଦେଇଛି ।