ମାଡ଼ି ଆସୁଛି ବାତ୍ୟା `ମୋନ୍ଥା' । ଧୀରେ ଧୀରେ ଆନ୍ଧ୍ର ଉପକୂଳମୁହାଁ ହେଉଛି ସମ୍ଭାବ୍ୟ ବାତ୍ୟା । ପଶ୍ଚିମ ଦିଗକୁ ଗତି କରି ବଙ୍ଗୋପସାଗରରେ ସ୍ପଷ୍ଟଚିହ୍ନିତ ଲଘୁଚାପ କ୍ଷେତ୍ର ଅବପାତରେ ପରିଣତ ହୋଇଛି । ସେପଟେ ସମ୍ଭାବ୍ୟ ବାତ୍ୟକୁ ନେଇ ବଡ଼ ବୈଠକ । ରାଜୀବ ଭବନରେ ସମ୍ଭାବ୍ୟ ବାତ୍ୟା ମୋନ୍ଥାକୁ ନେଇ ରାଜସ୍ବ ମନ୍ତ୍ରୀ ସୁରେଶ ପୂଜାରୀଙ୍କ ଅଧ୍ୟକ୍ଷତାରେ ଗୁରୁତ୍ବପୂର୍ଣ୍ଣ ବୈଠକ ଅନୁଷ୍ଠିତ ହୋଇଛି । ଏହି ବୈଠକରେ ବିଭାଗୀୟ ଅଧିକାରୀଙ୍କ ସହ ବିଭିନ୍ନ ଜିଲ୍ଲାର ଜିଲ୍ଲାପାଳ ମଧ୍ୟ ଭିସି ଜରିଆରେ ଉପସ୍ଥିତ ରହିଛନ୍ତି ।

ଅନ୍ୟପଟେ ଯଦି ଦେଖିବା ସମ୍ଭାବ୍ୟ ବାତ୍ୟା ଏବେ ଗୋପାଳପୁରଠୁ ଦକ୍ଷିଣ-ଦକ୍ଷିଣପୂର୍ବ ଦିଗରେ ୧୦୪୦ କିମି ଏବଂ ଆନ୍ଧ୍ରପ୍ରଦେଶ କାକିନାଡାରୁ ୧୦୦୦ କିମି ଓ ବିଶାଖାପାଟନମଠାରୁ ଦକ୍ଷିଣପୂର୍ବ ଦିଗରେ ୯୯୦ କିମି ଦୂରରେ କେନ୍ଦ୍ରୀଭୂତ ହୋଇଛି । ଏହା ପ୍ରାୟ ପଶ୍ଚିମ-ଉତ୍ତରପଶ୍ଚିମ ଆଡ଼କୁ ଗତି କରି ୨୬ ତାରିଖ ସୁଦ୍ଧା ଗଭୀର ଅବପାତରେ ପରିଣତ ହେବାର ସମ୍ଭାବନା ଅଛି । ସେହିପରି ୨୭ ତାରିଖ ସକାଳ ସୁଦ୍ଧା ଦକ୍ଷିଣ-ପଶ୍ଚିମ ଏବଂ ସଂଲଗ୍ନ ପଶ୍ଚିମ କେନ୍ଦ୍ରୀୟ ବଙ୍ଗୋପସାଗର ଉପରେ ଏକ ଘୂର୍ଣ୍ଣିଝଡ଼ରେ ପରିଣତ ହେବାର ସମ୍ଭାବନା ରହିଛି । ୨୮ରେ ଏହା ସିଭିୟର ସାଇକ୍ଲୋନରେ ପରିଣତ ହେବ ।

ଅଧିକ ପଢ଼ନ୍ତୁ: ବଙ୍ଗୋପସାଗରରେ ସମ୍ଭାବ୍ୟ ବାତ୍ୟା ‘ମୋନ୍ଥା’: କିଏ ଦେଇଛି ନାଁ, ଏହାର ଅର୍ଥ କ’ଣ ?

ସମ୍ଭାବ୍ୟ ବାତ୍ୟା ପ୍ରଭାବରେ ଓଡ଼ିଶାରେ ପ୍ରବଳରୁ ଅତି ପ୍ରବଳ ବର୍ଷା ସମ୍ଭାବନା ଅଛି । ୨୭ ତାରିଖରୁ ୨୯ ତାରିଖ ପର୍ଯ୍ୟନ୍ତ ରାଜ୍ୟରେ ପ୍ରବଳରୁ ଅତି ପ୍ରବଳ ବର୍ଷା ହୋଇପାରେ । ବିଶେଷକରି ଦକ୍ଷିଣ ଓ ଉପକୂଳ ଓଡ଼ିଶା ଉପରେ ଅଧିକ ପ୍ରଭାବ ପଡ଼ିପାରେ । ମାଲକାନଗିରି ଓ କୋରାପୁଟରେ ଭୀଷଣ ବର୍ଷା ହେବା ସମ୍ଭାବନା ରହିଛି ।

ଏଥିସହ ଗଞ୍ଜାମ, ଗଜପତି, ରାୟଗଡ଼ା, ପୁରୀ, ଜଗତସିଂହପୁର, କେନ୍ଦ୍ରାପଡ଼ା, ନୟାଗଡ଼, କଟକ, ଖୋର୍ଦ୍ଧାରେ ବାତ୍ୟାର ପ୍ରଭାବ ପଡ଼ିପାରେ ବୋଲି ଭୁବନେଶ୍ବର ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ଆକଳନ କରାଯାଇଛି । ସେହିପରି ସମ୍ଭାବ୍ୟ ବାତ୍ୟାକୁ ଦୃଷ୍ଟିରେ ରଖି ୨୬ରୁ ୨୯ ତାରିଖ ଯାଏଁ ମତ୍ସ୍ୟଜୀବୀଙ୍କୁ ସମୁଦ୍ର ଭିତରକୁ ନ ଯିବାକୁ ପରାମର୍ଶ ଦିଆଯାଇଛି ।

ସେପଟେ ସମ୍ଭାବ୍ୟ ବାତ୍ୟା ଦୃଷ୍ଟିରେ ରଖି ଚାଷୀମାନଙ୍କ ପାଇଁ ଆଡ ଜାରି ହୋଇଛି ଆଡଭାଇଜରି । ଧାନ ଫସଲ ୮୫ ପ୍ରତିଶତରୁ ଅଧକ ହୋଇ ଯାଇଥିଲେ ଅମଳ କରି ନିଅନ୍ତୁ । ବର୍ଷା ସମୟରେ ଫସଲରେ ପେଷ୍ଟିସାଇଡ୍ ଏବଂ ଫର୍ଟିଲାଇଜର ସିଞ୍ଚନ କରିବାରୁ ୪ ଦିନ ପର୍ଯ୍ୟନ୍ତ ବିରତ ରୁହନ୍ତୁ । ସେହିଭଳି ନବରଙ୍ଗପୁର ଓ କୋରାପୁଟର ବର୍ଷା ସମ୍ଭାବନା ରହିଥିବାରୁ ବିଲରୁ ପାଣି ନିଷ୍କାସନ ଲାଗି ପଦକ୍ଷେପ ନେବାକୁ କୁହାଯାଇଛି । ବର୍ଷା ପରେ ତତ୍‌କ୍ଷଣାତ ଧାନ ଅମଳ କରନ୍ତୁ ନାହିଁ । ଧାନ ଫସଲ ଟିକେ ଟାଣ ହେବା ପରେ ଅମଳ କରନ୍ତୁ । ଅମଳ ଧାନକୁ ସୂର୍ଯ୍ୟକିରଣରେ ରଖି ଫଙ୍ଗାଲ ସଂକ୍ରମଣରୁ ରକ୍ଷା ପାଇ ପାରିବେ ।